Engaado 24 - EBBAIBBO EMBOOSI YA NASAAE

Olukaado lw'ehumi-na-chitaanu-na-chine

¹ Otadiiriraanga abahola-mbi embaliha, noomba wekoomba ohuba alala nabo;

² olwohuba babaasa eby'obwaalaba, haandi balomaloma ebiindu bidoondobania abaandu.

Olukaado lw'amahumi kabiri

³ Enyuumba yeema hu musiingi kw'amakesi, haandi yoombahwa ohweema hu humanya.

⁴ Ebiseenge byao biichula neende ohumanya neende eby'engaanga byoosi neende eby'obuyiinda bisangaasa.

Olukaado lw'amahumi kabiri-na-lulala

⁵ Omuundu w'amakesi niye ow'amaani ohuhira oyo owehoonyera esirifu, haandi omuundu muwulisi ahira oyo oli neende amaani;

⁶ olwohuba ohulwaana eye, sidaha mberi ohuhola hwa makesi, haandi yibaberesi b'amakesi baangi yibali, ao niyo yihunyiingira yi huli.

Olukaado lw'amahumi kabiri-na-chibiri

⁷ Eby'amakesi bihira eyale muno omusiru ohumanya; haandi sibulao esiindu si anyala ohulomaloma yibaheengera emisaango.

Olukaado lw'amahumi kabiri-na-chidatu

⁸ Oyo otekeha ohuhola esibi bachia ohumulaanga bati, omuholi w'ebidinyu.

⁹ Buli siindu si musiru atekeha ohuhola siba esyonoono, haandi abuundu haba si badaha omulekeeresi.

Olukaado lw'amahumi kabiri-na-chine

¹⁰ Nooba omukata mu biha bi onyooleramo ebidinyu, ao amaani kao kaba amadiidi.

Olukaado lw'amahumi kabiri-na-chitaanu

¹¹ Yabina abo abali ohuyirwa ohwiitwa; wonia abo abali ohuchia ohusiinjwa bihaya.

¹² Nimuboola muti, “Bone, sino haba sihubeere nihusimanyire,” nae Nasaae omanyire ebiri mu mwooyo haba saasibona? Oyo oliinda obulamu bwao asimanyire, haandi achia ohuhuberesa buli mukabo ohweema hu biholwa byao.

Olukaado lw'amahumi kabiri-na-chisaasaba

¹³ Mwaana waange, lya obuuhi, olwohuba bulai nibwo, haandi koti lu buuhi budoonya nibutula mumabbaangara k'obuuhi bunyunyuula n'ohoomba,

¹⁴ manya oti nilwo lu makesi kanyunyuulira obulamu bwao; n'okanyoola, wahabe bulai mu bulamu bwao, haandi esuubi lyao haba silyahakame.

Olukaado lw'amahumi kabiri neende chitaanu-na-chibiri

¹⁵ Otaba koti abahola-mbi abaliindirira amadaala k'abaandu baluungifu; otayaaya edaala lyae.

¹⁶ Olwohuba omuundu muluungifu kata yahakwa amahabi kataanu-na-kabiri, asiingirao buli habi li akwiira aasi; nae omuundu mubi, amasira kahamusihirise.

Olukaado lw'amahumi kabiri neende chitaanu-na-chidatu

¹⁷ Otasangaalaanga omusuku wao n'akwiireho obudinyu, haandi otehoyaanga nasyeluluuha mani yaakwa.

¹⁸ Olwohuba Omwaami anyoolera naabona ati oholere otyo, mani yakamira ao ohumunyoolerera.

Olukaado lw'amahumi kabiri-na-chitaanu-na-chine

¹⁹ Otafukiiriraanga abahola-mbi bakera wenyendeherera, haandi otebadiiriraanga ehali-hali;

²⁰ olwohuba omuhola-mbi abula esuubi; haandi yahasime koti etaara.

Olukaado lw'amahumi kadatu

²¹ Mwaana waange, yiisaanga oluyaali mu Omwaami neende mu mutuki, haandi otaholeraanga alala neende abajeemu;

²² olwohuba amasira ohutula eyiri Omwaami neende eyiri omutuki kahabakweeho-bukwa, haandi abulao omanyire koti lu kahaake.

Engaado chiindi echemeedaho

²³ Haandi chino choosi ngaado echakaadwa neende abaandu bakesi. Ohwehubbira mu huheenga emisaango haba sisilai nisyo.

²⁴ Oyo oboolera omuundu wahola esyonoono ati, “Obulaho omusaango,” abaandu bahamubwaabe, haandi buli muundu yahamusyuule.

²⁵ Nae abo aboolobya abahola-mbi bahanyoole esangaalo, haandi bahabecheenge neende ehabi.

²⁶ Oyo okobolamo esyadyeeri nisyo esilolero sy'obwiicha.

²⁷ Taangira otekehetekehe bulai emirimo kyao ky'erwaanyi, otereese bulai endalo yao, mani huwoombahe enyuumba yao.

²⁸ Otatusaanga obuloli ohuyiingania owaasyo ataali esifune syoosi, haandi otamulomalomaanga eby'obubacha.

²⁹ Otaboolaanga oti, “Syesi ndahamuholeho esiindu sy'aholere; ndaheetuunge esiindu sy'aholere.”

³⁰ Ndabita mu ndalo y'omuundu mukata, mu ndalo y'emisabbiibbu y'omuundu obulamo amakesi;

³¹ bone, yali niyichuulemo amawa; yoosi niyisihiremo esiino, haandi olukaka lwaao lw'amakina nilukwiire aasi.

³² Ndayitingaala mani nimbaasa muno; ndayitingaala mani ndabaaho neende singerakirwa.

³³ Wemeede okuunuheho, haandi wemeede okoneho, wemeede ohufuumba amahono mani owuluuheho,

³⁴ obumanani bwahahuseete koti omunyaka, ahuseeta n'adiirire ebilwaaniso.