Ebiholwa 7 - EBBAIBBO EMBOOSI YA NASAAE

Enomanoma ya Sitefaano

¹ Omulaamisi muhuluundu yateeba Sitefaano ati, “Sino syadyeeri nisyo?”

² Nae Sitefaano yaboola ati, “Basyaange neende balaata yaange, mundekeerese. Nasaae w'oluyaali luhoongo muno, yabonehera Abburahamu seefwe, niyali naali mu Mesopotamia, n'ateecha yamenya mu Harani

³ yamuboolera ati, ‘Tula mu syaalo syao neende mu banaluyia bao, omale ochie mu syaalo sinja ohuhweekesa.’

⁴ Yatula mu syaalo sy'Abakaludaayo, yaacha yamenya mu Harani. Nae luunyuma lwa laatang'ene ohufwa, Nasaae yamutusa ao, yamuleeta mu syaalo sino si mumenyeremo bulaanu;

⁵ nae haba siyamubaaho obusiha bwoosi mu bweene muno, kata obuleeyi bwaaka neende emiita ndala yoong'ene, nae yasuubisa ohusimuberesa sibe esyae alala neende olwiibulo lwae olwiicha-nyuma, kata neende niyali nataali neende omwaana.

⁶ Nasaae haandi yalomaloma nasilala atyo, ati olwiibulo lwae luno luchia ohuba olukeni mu syaalo sy'abaandu baandi, abacha ohubeekalira mu buwaambe, emyaaka emia chine emilaamba.

⁷ Haandi Nasaae yaboola ati, ‘Nae njia ohuheengera omusaango esyaalo esyo sibacha ohuba nibasihalaabanira batyo, luunyuma lw'esyo, bachia ohutulamo mani beeche baanyinamire abuundu bweene ano.’

⁸ Nasaae yaberesa Abburahamu Endagaano y'ohuhebwa. Abburahamu yaheba omwana waye Yisaka, hu ludaalo lwa chitaanu-na-chidatu; mani Yisaka laatang'ene Yakobbo, yaaba laatang'ene bakuuka yeefwe bahuluundu ehumi-na-babiri.

⁹ “Bakuuka yeefwe abo, ehali-hali nilyabadiira hulwa Yosefu, bamukusa mu Misiri; nae Nasaae yaba nae,

¹⁰ yamuwonia yamutusa mubuchuuni bwae bwoosi, yamala yaamuheera, yamuba amakesi maangi muno mu moni wa omutuki wa Misiri, yamuhola yaaba gafana wa Misiri, haandi ow'edaala lyae lyoosi.

¹¹ Bulaanu esiminyu syakwaao mu Misiri mwoosi neende mu Kanani, neende obudinyu buungi muno, bakuuka abo baahaywa ohunyoolaho esyohulya syoosi.

¹² Nae Yakobbo yawulira ati emere yali niyiri mu Misiri, yaatuma bakuuka yeefwe abo ehabi litaangira.

¹³ Hu lukeendo lwaabwe lwohubiri, Yosefu yemanyisa eyiri bamwaanang'ina abo, enyuumba yaabwe Yosefu yamanyihana eyiri omutuki wa Misiri.

¹⁴ Yosefu yatuma balaanga Yakobbo laatang'ene, neende abanaluyia bae boosi, abaandu amahumi kataanu-na-kabiri;

¹⁵ Yakobbo yehirira yaachia mu Misiri. Mani Yakobbo yaafwa alala neende bakuuka yeefwe abo boosi,

¹⁶ bakiingwa baakaluswa engo Sekemu mani basiihwa mu ng'ani yi Abburahamu yakula obuungi bw'eseende ch'efeesa chi yatusa hu basyaani ba Hamori mu Sekemu bweene omwo.

¹⁷ “Nae koti lu siha syalakwa nisyali aambi ohwoola, si Nasaae yali yadiisa Abburahamu, abaandu abo bachaaka ohwemeeda muno, neende ohwiingiya nibali mu Misiri

¹⁸ ohwoola lu mutuki wuundi wa Misiri, owali nataamanyire Yosefu yachaakira ohutuka.

¹⁹ Yasaandya enyuumba yeefwe, yayikaanga bakuuka yeefwe abo ohusukunaanga abaana badoto baabwe, n'atadaha babeeo abalamu.

²⁰ Esiha sino nisyo si Musa yebulirwamo yaaba omulai muno mu moni wa Nasaae. Yahusirwaho mu nyuumba ya laatang'ene hulw'embaka y'emyoosi kidatu kyoong'ene;

²¹ niyamala ohusukunwa, omuhaana wa omutuki wa Misiri yaamudoola yaamuhusa koti omwaana wae mweene.

²² Musa yakerakirwa neende amakesi koosi akali kahoyera Abamisiri, mani yaaba neende enomanoma alala neende ebihole bihunuufu muno.

²³ “Niyoosa emyaaka ky'obuhuluundu amahumi kane, yaheengao mu mwooyo kwae ohuchia ohukeniya abaana ba Yisiraeli abali abanaluyia bae.

²⁴ Niyabona mulala hu abo naali ohusaandisibwa, yalwaania omusaacha Mumisiri oyo, yamwiitirawo.

²⁵ Nasiyira ati Abaisiraeli baasye bali nibachia ohumanya bati hane Nasaae niye owali naali ohubanunula neende omuhono kwae, nae haba sibamanya batyo.

²⁶ Nibwahya oludaalo luloondaho, Musa yeecha yi bali yakaana Abaisiraeli abo nibali ohusoolana, yaheengao ohubakaya n'ababoolera ati, ‘Eng'we, muli abebulaane, lwasiina muli ohusoolanaanga abeene-na-beene?’

²⁷ Nae omusaacha wali naali niye oli ohukoseraanga owaasye yaasindiha Musa endulo n'amuboolera ati, ‘Ewe Musa, wiina mweene ohubekereo ohuba omweemeresi weefwe, haandi ohuba omukayi weefwe?

²⁸ Ewe oli ohudaha ohunjita koti lu weetere Omumisiri wula ekulo?’

²⁹ Musa niyawulira sino, yeeruha, yaacha yekisa mu syaalo sya Midia, yi yebulira abaana basyaani bae babiri.

³⁰ “Emyaaka amahumi kane nikyabitao, malaika yeecha yaamubonehera naali mu siparara esy'Olugulu Sinai, naali mu muliro kwaaduha mu sichaha.

³¹ Musa niyabona atyo, yawuka muno emboneha eyo; nae niyali hwasuda aambi ohwehaliirisa, ekono ly'Omwaami lyeecha lyawuliirihana liti,

³² ‘Niise Nasaae wa balataao, Nasaae wa Abburahamu neende Yisaka neende Yakobbo.’ Musa yateenga muno byamuhaya ohwehaliirisa bulai.

³³ Omwaami yamuboolera ati, ‘Fwalulamo ebiraato ebyo, olwohuba abuundu yi wemere ao, woolerefu niwo.

³⁴ Mubwadyeeri bweene, ese malire ohubonera elalira ohusaandisibwa hw'abaandu baange abali mu Misiri, haandi neende ohuwulira ohwelirira hwaabwe, mani njihire aasi ohubaabina. Ewe bulaanu yicha, njia ohuhutuma ochie Misiri.’

³⁵ “Musa wuno, niye yi baandu Baisiraeli bali bebwaaba nibaboola bati, ‘Ewe wiina mweene owahutaao ohuba omweemeresi haandi omukayi?’ Niye yi Nasaae mweene yaatuma achie abe omweemeresi haandi omununuli niyehoonyera omuhono kwa malaika wula owamubonehera naali mu sichaha.

³⁶ Musa oyo yaabeemirira yabatusayo, n'amalire ohuhola eby'amayia neende ebiwuukisa biingi muno mu Misiri neende hu Enyaanja Njahanyu, haandi neende mu siparara ohumala emyaaka amahumi kane.

³⁷ Musa wuno niye oyo oweecha yaboolera Abaisiraeli ati, ‘Nasaae achia ohubasiingisira omunabbi ohutula mu beebulaane beeng'we beene koti lu yasiingisa ese.’

³⁸ Wuno niye omweene oyo owali mu mukaanda kwali mu siparara alala neende malaika oyo owamulomalomera hu Lugulu lwa Sinai, haandi neende bakuuka yeefwe; haandi niye oyo owadiiswa amalako malamu ohutuberesa.

³⁹ Bakuuka yeefwe abo baahaya ohumuwulira, nae bamusiindiha sa endulo, mani mu myooyo kyaabwe bakaluuhana balingaala Misiri,

⁴⁰ nibaboolera Arooni bati, ‘Ewe tuholere banasaae banaatwiimirireenge; olwohuba Musa wuno owatwiimirira ohutulira elalira mu syalo sy'e Misiri, efwe hukoterwe esimweeholeheho.’

⁴¹ Bahola esiloongaloongwe sifwaana koti esurusi mu ndaalo echo, mani beemao bachaaka ohutusira esilongaloongwe esyo ebiyaanwa, haandi bamala bachaaka ohwehoyera emirimo ky'amahono kaabwe echo.

⁴² Nae Nasaae yabakaluhania, mani yabachoomya ohwiinamiraanga ebiloongaloongwe by'aakulu, koti sa lu byandiikwa mu sitabo sy'abanabbi biti: ‘Mwamberesaangaho ebisolo bisiinjirwe alala neende ebiyaanwa, emyaaka amahumi kane ekyo nimuli mu siparara, eng'we enyuumba ya Yisiraeli?

⁴³ Mani mwabukula eyeema lya nasaae olaangwa Moleki neende esifwaananii sya nasaae olaangwa Refani, eng'ining'ini yeeng'we, ebiloongaloongwe ebyo bi mwahola ohubinamiraanga; mani njia ohubayira mububoye eyale muno ohubita Bbabbilooni.’

⁴⁴ “Balaata baali neende eyeema lya Nasaae mu siparara, koti lwooyo owalomaloma neende Musa yali yamubaliirira koti lu ahoyere ohulihola libe, ohuchiana neende omusono ku yali abweeneho omweene.

⁴⁵ Baseefwe bosi batyo, baliingisa neende Yosua nibali nibamalire ohwiirusa mu byaalo abaandu beenebyo koti lu Nasaae yabasukunaanga erwaanyi mu moni wa baseefwe, bali abeene nibamalire ohubimenyamo. Byali bityo ohwoolera elalira mu ndaalo cha Daudi,

⁴⁶ Daudi yanyoola ohudahibwa muno mu moni wa Nasaae, yaasaba ohulehwa anyale ohunyoolera Nasaae wa Yakobbo oyo obumenyo bwomiifu.

⁴⁷ Nae syeecha syaaba mbwe ni Solomooni niye owanyala ohwombahira Nasaae oyo enyuumba.

⁴⁸ Kata katyo Nasaae w'Aakulu Muno haba saamenyaanga mu nyuumba choombaahwa neende amahono sa; koti lu munabbi wuundi aboola ati,

⁴⁹ ‘Ekulu nilyo esisaala syaange sy'obutuki, nae esyaalo nisyo esiteeni singeeng'aho amakulu kaange. Nyuumba siina yeene yi ewe onyala ohunyoombahira, Omwaami aboola, oba abuundu siina bweene ayahaba yimbuluuhira?

⁵⁰ Amahono kaange keene haba siniko akahola ebiindu bino byoosi?’

⁵¹ “Eng'we abaandu baangalala amakosi, abatahebwa mu myooyo, neende amatwi, mwamenya nimuyiingania Mwooyo Mwoolerefu. Koti lu balaata yeeng'we baholanga hale, nilwo lu mwesi muli ohuhola sa bulaanu.

⁵² Munabbi siina mweene yi balaata yeeng'we bahayaho ohusaandyaanga? Haandi betaanga abo abalaangiriraanga hale-hale ohwiicha Hw'oyo Omuluungifu, oyo yi bulaanu mwahobere haandi mwamwiita,

⁵³ eng'we beene abadiiswa amalako koti lu kaleetwa neende bamalaika mani mwaahaya ohukadiira.”

Ohwiitwa neende amakina hwa Sitefaano

⁵⁴ Bulaanu, abaandu abo nibawulira ebiindu bino byoosi, baadiirwa neende etima liingi muno, mani bachaaka ohumulumaanisira alala ameeno kaabwe.

⁵⁵ Nae omweene, niyechuulemo Mwooyo Mwoolerefu, yadangaasira emoni chae Muukulu, mani yabona oluyaali luhoongo lwa Nasaae, neende Yesu niyeemere hu muhono muluungi kwa Nasaae;

⁵⁶ n'aboola ati, “Boneho, ndi ohubona Ekulu niliikuulwe, haandi neende Omwaana w'Omuundu niyeemere hu muhono muluungi kwa Nasaae.”

⁵⁷ Nae nabo bachaaka ohuyokerera mu kono hoongo muno neende ohusiba amatwi kaabwe neende ohwiiruhira alala boosi nibamuchoomere.

⁵⁸ Bamusukuna erwaanyi w'esiko sihuluundu esyo, nibamala nibamuhubba amakina ohumwiita; nae abaloli b'ebiindu bino baatechaanga engubo chaabwe mu makulu k'omusyaani muraaga olaangwa ati Saulo.

⁵⁹ Koti lu bali nibali ohuhubbaanga Sitefaano neende amakina, omweene nae yali naali ohusabaanga ati, “Omwaami Yesu, bukula omwooyo kwaange.”

⁶⁰ Sitefaano yasigama aasi, yaalira neende ekono hoongo muno n'aboola ati, “Omwaami, otababaliraho esyonoono sino daawe.” Niyali niyahamala sa ohulomaloma atyo, yaakwiisa omwooyo.