Ebiholwa 25 - EBBAIBBO EMBOOSI YA NASAAE

Paulo atusa obuloli emberi w'Omutuki muhunuufu

¹ Bulaanu, Fesito niyali n'amalire ohwiicha mu situundu sy'esyaalo syae sino, luunyuma lw'endaalo chidatu ohuwa, yacha mu Yerusalemu n'atula mu Kaisarea.

² Mani abalaamisi bahuluundu neende abaandu bahunuufu abali mu Bayudaaya bamweekesa ebidiira hu Paulo; haandi bamwekweeda,

³ nibamusaba n'adaha ohubasangaasa, anyale ohufukiirira omusaacha oyo yeerekeswe mu Yerusalemu, nibali ohutekeha oluhobo ohumunyoola bamwiite naali hu lukeendo olwo.

⁴ Fesito nae yakobolamo ati Paulo yali ahoyere ohuliindibwa naali mu Kaisarea, haandi ati yesi yali n'atekehaanga ohuchia ebweene eyo bwaangu.

⁵ “Mani sakira, yemeeda ohuboola ati, mulehe abasaacha b'oluyaali abali mweeng'we bachie naange, nisiruwo esiindu syoosi esitahoyeera hu musaacha oyo, hu beemeo bamufunaane.”

⁶ Niyali niyahamala ohuba nabo hulw'embaka y'endaalo chitabita mu ndaalo chitaanu-na-chidatu oba ehumi chiti, yacha mu Kaisarea; mani hu ludaalo luloondaho, yehala hu sisaala syae sy'ohuheengeraho emisaango mani naamala n'alagira ati Paulo aleetwe yaali.

⁷ Paulo niyali amalire ohwiicha, Abayudaaya abali nibatulire mu Yerusalemu beema bamweebodoohania, nibamuwabira emisaango mibi muno chi batanyala kata ohwomiisa.

⁸ Paulo niyali huyeosaho yaboola ati, “Kata eyiri amalako ka Musa ak'Abayudaaya, eyiri Enyuumba ya Nasaae, kata eyiri Kaisaari, abulao yeesi yi ndakosera kata nabudiidi.”

⁹ Nae kata katyo, olwohuba Fesito yali n'adaha ohukwiira Abayudaaya, yaboolera Paulo ati, “Onyala ohuba n'odaha ohuchia mu Yerusalemu, yooba n'odaha ohuba n'onyala ohuwoseserwa emisaango kino choosi mu moni waange?”

¹⁰ Nae Paulo yaboola ati, “Ese mbano nyemere mu moni w'esiina sya Kaisaari, yihoyere ohuba ninjaasibwa; eyiri Abayudaaya, ese haba sindaholaho esiindu syoosi esitahoyera, koti wesi lu omanyire bulai bweene.

¹¹ Mani nikali mbwe ese ndi omukoseefu, nihaandi ndamala ohuhola esiindu syoosi siimba nihoyera ohufwiiraho, ese haba si ndi ohukoonya endi ndeekaye ohufwa daawe; nae nikali mbwe mu misaango kyaabwe echo, sibulamo esiindu syoosi esinjooma, abulao omuundu yeesi oba ali neende obunyala ohuundeha mi mahono kaabwe. Mani ese ndusa obuloli eyiri Kaisaari.”

¹² Bulaanu Fesito, niyali n'amalire ohweteeba hu siina syae, yakobolamo ati, “Mbao omweene otusire obuloli eyiri Kaisaari; mani ni eyiri Kaisaari niyo y'ochia ohuchia.”

Paulo naali mu moni wa Agiripa neende Bbanisi

¹³ Bulaanu endaalo chiyera nichali nichahamala ohubitao, Agiripa omutuki neende Bbarusi boola mu Kaisarea ohubukaanira Fesito.

¹⁴ Koti lubehala eyo endaalo enyiingi hooho, Fesito yaanyala ohuta omusaango kwa Paulo mu moni w'omutuki oyo n'aboola ati, “Aliwo ano omusaacha yi Felikisi yaleha naali omuboye;

¹⁵ mani nindali ni ndi mu Yerusalemu, abalaamisi bahuluundu alala neende abahuluundu b'enono Bayudaaya bamuumbooleraho akamudiiraho, nibasaba mbwe ese muheengere omusaango kumuhire.

¹⁶ Nae ese ndeecha ndabakobolamo endi eyo haba siyali ehola y'Abarooma ohuheengera omusaango omuundu yeesi, ositaakibwa nasisisiiri ohubukaananaho neende abamuwabiire, haandi nataberesebwaho ehabi yohutusa obuloli bwae budiira hu sifune si baba bamubeeyera.

¹⁷ Mani sakira nibeecha bebuusira ano, ese haba sindabahiindya daawe, nae hu ludaalo lwaloondaho, ndabukula ndeehala hu sisaala syaange siheengerwaho emisaango, ndalagira omusaacha oyo yengisibwe mukati.

¹⁸ Mani abaabirwa nibasiingira beema, haba sibanyala ohuleeta ohwekanyiirisa hwoosi ohudiira hu musaango kwae kuno ohubi muno koti lu ndali nimbaasa daawe;

¹⁹ nae byaboneha sa mbwe bali neende amayiingani akati waabwe neende omusaacha oyo akadiira hu misiro chaabwe abeene haandi neende hu muundu wuundi olaangwa Yesu, owali niyamala ohufwa, nae yi Paulo yali niyomiisaanga ati aliwo mulamu.

²⁰ Mani olwohuba mbwe ese haba sindali ninyala ohumanya bulai bweene engeri yinyala ndateeberesa bulai ebiindu bidiira hu biteebo bino, ese ndeecha ndamuteeba naaba n'adaha ohuchia mu Yerusalemu mani anyale ohuwoseserwa ebweene eyo emisaango kino.

²¹ Nae Paulo niyali n'amalire ohusaba ati ahole nasiliinda sa, n'aliindiriire eheengao y'omutuki muhunuufu oyo, ese ndeecha ndalagira endi ahoyeere ohuba n'adiirwa sa ohwoola lundahanyale ohumuyira eyiri Kaisaari.”

²² Agiripa yaboolera Fesito ati, “Ese ndaha omweene mbuliirise omusaacha oyo byaalomaloma omweene.” Fesito yamukobolamo ati, “Muchuli bweene, onaba omuwuliirisa.”

²³ Mani sakira nibwahya muchuli, Agiripa neende Bbanisi bahola omuholo omuhoongo muno, mani bamala beengira mu nyuumba y'olwichuule lw'abaandu alala neende omuhuluundu w'Abasikaari, neende abaandu bahunuufu bomu siko omwo.

²⁴ Fesito yachaaka ohulomaloma n'aboola ati, “Omutuki Agiripa alala neende abaandu boosi abali ano naafwe, muboneho omusaacha wuno yi Bayudaaya boosi baandeekanyiirisiraho, kata ni ndi mu Yerusalemu neende haandi ni ndi mu ano, nibehuuma bati haba s'ahoyeere ohubaao omulamu n'atafwiire.

²⁵ Nae ese ndafumbula endi haba siyali naali naaholereho esiindu syoosi esimuhoyera ohwiitwa; nae koti omweene yatusa obuloli eyiri omutuki muhunuufu, ndaheengao ohumutuma yaali.

²⁶ Nae ese omweene mbulaho esiindu syomiifu si nyala ndandiikira omwaami waange esimudiiraho.

²⁷ Olwohuba esiindu sino simbonehera ohuba esitaalimo amahuluundu koosi, endi ni mba ninduma omuboye yeesi, ohutanyala ohuboolaho ebidiira hu musaango kwae.”