Danieli 5 - EBBAIBBO EMBOOSI YA NASAAE

Esidyaalo sya Bbelisasa

¹ Olwoola, omutuki Bbelisasa n'aholera abachweenufu bae elifu esidyaalo sy'amaani, mani naang'wa nabo amalwa.

² Bbelisasa niyaang'wa amalwa mani nikamulyooyera, yalagira ati baleete ebikoombe eby'esaabbu neende eby'efeesa bi Nebukadineesa, laatang'ene yatusa mu nyuumba ya Nasaae Yerusalemu, ati abatuki, neende abaami bae, neende abahasi bae, abahasi b'erwaanyi bae banyale ohubing'weeramo.

³ Mani nibaleeta ebikoombe eby'esaabbu neende eby'efeesa bi bali nibatusire mu nyuumba ya Nasaae eyomu Yerusalemu. Mani omutuki neende abaami bae, neende abahasi bae, neende abahasi b'erwaanyi bae nibabing'weeramo.

⁴ Mani nibang'wa amalwa, nibafumia banasaae baholwa mu saabbu neende mu feesa, ab'ebihomo, neende ab'ebichuma, ab'emisaala, neende ab'amakina.

⁵ Abweene-na-abweene ao enjala ch'omuhono kw'omuundu chaboneha nichaandiika hu sida sy'edooho ly'omutuki, esitingalaane neende esiteeni sy'etaala. Mani omutuki n'abona omuhono koti lu kwaandiika.

⁶ Efwaani y'omutuki mani niyikaluuhana, niyeyendeherera muno, n'achaaka ohuteengereha, mani amahuumbo nikahinaakiriha.

⁷ Mani omutuki n'ahubba embuungu ati baleete abalakusi, Abakalidaaya, neende abahiingi, neende abasomera eby'eng'iniing'ini. Mani omutuki n'aboolera abakeraki b'amakesi bomu Bbabbilooni ati: “Oyo onasome esyandiiko sino, haandi yatuumbula amahuluundu kasyo, achia ohufwaaswa ebyefwaalo by'abachweenufu, haandi abe neende olunyolo lw'esaabbu mu kosi, haandi anabereswa edaara lyohudatu ely'obutuki mu bwaami.”

⁸ Ao mani abakeraki b'amakesi b'omutuki nibeengira, nae haba sibanyala ohusoma esyandiiko oba ohutuumbulira omutuki amahuluundu kasyo.

⁹ Mani omutuki Bbelisasa niyemeeda ohutya muno, mani efwaani yae niyikaluuhana; mani nibiheehera abaami bae.

¹⁰ Mani omutuki muhasi niyawulira ohuyokera hw'omutuki neende ohw'abaami bae, esyatulira mu nyuumba yi omutuki neende abaami bae bali nibaliira esidyaalo; mani niyeengira mu nyuumba eyo. Mani n'aboola ati: “Ewe omutuki, yiindira endaalo choosi! Leha ohweyendeherera neende ohukaluuhania efwaani yao.

¹¹ Aliwo omusaacha mu bwaami bwao olimo mwooyo wa banasaae boolerefu. Mu ndaalo cha laatao, cha ohubona eyale, ohumanya neende amakesi, koti amakesi ka banasaae, byanyoolehana mu musaacha wuno, mani Omutuki Nebukadineesa, laatao, yamuhola ohuba omuhuluundu w'abalakusi, ab'amayia, Abakalidaaya, abahiingi neende abasomera eby'eng'iniing'ini.

¹² Olwohuba ali neende mwooyo w'aakulu muno, mukesi haandi atuumbula amahuluundu k'ebilooto, neende ohumanya amahuluundu k'eminaye, neende ak'ebiindu bidinyu ohumanya. Bino byoosi binyolehana mu Danieli wuno, yi mutuki yakuliha Bbelitesaasa. Mani bulaanu, leha balaange Danieli, mani achia ohuhutuumbulira amahuluundu.”

Danieli atuumbula amahuluundu k'obwandiike

¹³ Ao mani nibaleeta Danieli mu muno w'omutuki. Mani omutuki n'ateeba Danieli ati: “Niiwe Danieli, mulala hu Bayudaaya abanyakibwa, ba Laata yaange yatusa mu Buyudaaya?

¹⁴ Ndawulira endi Mwooyo wa Nasaae Mwoolerefu ahulimo, haandi koti obona eyale muno haandi omanyire muno, haandi oli neende amakesi k'aakulu muno.

¹⁵ Bulaanu abakeraki b'amakesi neende abalakusi baleeterwe mu moni waange ohusoma obwandiike buno neende ohumboolera amahuluundu kaabwo; nae abulao onyalire ohumboolera amahuluundu kaabwo.

¹⁶ Nae mbuliire nibahulomalomaho bati onyala ohutuumbula amahuluundu k'eby'engiso neende amahuluundu k'eby'amaya. Bulaanu, n'onanyala ohusoma obwandiike mani wamboolera amahuluundu kaabwo, ochia ohufwaalwa engubo ch'abachweenufu, obe neende olunyolo lw'esaabbu mu kosi, mani obe omuhuluundu wohudatu mu bwaami.”

¹⁷ Mani Danieli n'alomalomera mu moni w'omutuki n'aboola ati: “Ebiyaanwa byao neende omukabo kwao leha bihudoong'ere, oba biberese omuundu wuundi. Nae ese, ewe omutuki, njia ohuhusomera ebyandiiko haandi huboolere amahuluundu kabyo.

¹⁸ Ewe omutuki, Nasaae w'Aakulu Muno yaberesa Nebukadineesa, laatao obutuki neende obwaami, neende oluyaali, neende obuhuluundu.

¹⁹ Haandi olwohuba obuhuluundu bu yamuberesa, abaandu boosi, neende ebyaalo byoosi, neende abaandu b'enimi choosi, batya haandi baateengereha mu moni wae. Yetaanga oyo yi yadahaanga ohwiita, haandi yawoniaanga oyo yi yadahaanga ohuwonia. Haandi yakiniaanga oyo yi yadahaanga ohufumia; haandi yaloongoyasyaanga oyo yi yadaha ohuloongoyasa.

²⁰ Nae niyehuduumbasaanga niyoomerania omwooyo kwae, ao mani niyeeruswa hu sisaala syae sy'obutuki, naatuswa hu luyaali lwae.

²¹ Mani niyeeruswa ohutula mu baandu, mani ebibaaso byae nibiba koti eby'esolo, mani n'amenyaanga alala neende esuhiri chomu siino mani n'alichaanga obunyaasi koti endaawu, mani omubiri kwae nikudoswa neende olume lwomu kulu; ohwoola lu yamanya ati, Nasaae w'Aakulu Muno niye otuka obwaami bw'abaandu, haandi niye obuberesa oyo yeesi y'adaha.

²² Mani ewe Bbelisasa, omwaana wae, haba siweloongoyaase, kata wahaba niwamanya ebyo byoosi.

²³ Nae ewe weninisiirye hu Omwaami wo muukulu; mani nibaleeta mu moni wao ebikoombe bibatusa mu nyuumba ya Nasaae, mani ewe, neende abaami bao, neende abahasi bao, neende abahasi b'erwaanyi bao, mani nimubeng'eramo amalwa. Mani noofumia banasaae b'efeesa neende esaabbu, b'omugasa, neende ab'echuma, neende ab'emisaala, neende ab'amakina, abatabona oba bamanya, nae Nasaae oyo oli neende obunyala hu bulamu bwao, haandi ohuliinda mu biindu byoosi, haba somudeebaho daawe.

²⁴ “Mani sakira, Nasaae atuma omuhuno ohwandiika emboosi chino.

²⁵ Mani obwandiikwe bwandiikwa nibwo buno: MENE, MENE, TEKELI, neende PARISINI.

²⁶ Amahuluundu k'emboosi chino niko kano: MENE, Nasaae abalire endaalo ch'obutuki bwao, mani n'abona ati chakaame.

²⁷ TEKELI, opiimirwe hu latiri, mani niwakaanwa n'osibulwaho.

²⁸ PERESI, obutuki bwao bukabuhaniemo mani bwabereswa Abamedia neende Abaperisi.”

²⁹ Ao mani Bbelisasa n'alagira ati bafwaale Danieli ebifwaalo by'abachweenufu, neende olunyolo lw'esaabbu mu kosi, haandi bamulaange ohuba omuhuluundu wohudatu mu bwaami.

³⁰ Mu siro syeene esyo, Bbelisasa, omutuki w'Abakalidaaya mani nibamwiita.

³¹ Dario Omumeedi, yanyaala obutuki naali neende emyaaka amahumi kasaasaba neende chibiri eky'obuhuluundu.