Danieli 11 - EBBAIBBO EMBOOSI YA NASAAE

¹ Mani ese, mu mwaaka kutaangira okw'omutuki Dario Omumeedi, ndasiingira ohuhugumya haandi ohumukobosamo amaani.

² Mani bulaanu njia ohuhweekesa obwadyeeri. Malaika oyo yeemao yaboola ati, “Abatuki baandi badatu bachia ohutukaho Perisia mberi, hu huloondeho owuundi owohune, ochia ohuba omuyiinda ohuhiraho abaasye abo boosi. Nae niyahamale ohwomiira muno mu bunyala bwae obwo neende niyahamale ohuyiindiyala muno, achia ohuchaaka ohuyiingania obwaami bwa Bugiriki.

Obutuki bwa Misiri neende Siria

³ “Ao mani wahabeeo omutuki w'amaani, olituka neende obunyala buungi, haandi yahahole buli siindu sy'adaha.”

⁴ Nae niyahamale ohwomiira mu bunyala, obutuki bwae bwahafunihe, mani bwakabuhanamo ebituundu bine; esy'ebukwe, esy'emuumbo, esy'emukulu neende esy'emwaalo. Nae obutuki obwo haba sibwahabereswe ab'olwiibulo lwae, noomba ohutukwa neende obunyala koti bu yatukiraho. Olwohuba obutuki obwo bwahabe obw'abaandu baandi abataali ob'olwiibulo lwae.

⁵ Mani omutuki w'emwaalo yahabe ow'amaani muno; nae mulala hu bahunuufu bae yahehole ow'amaani muno ohumuhira. Mani alituka obutuki bwae neende obunyala bw'amaani muno.

⁶ Nae emyaaka nichahabiteo, wahabeeo endagaano ey'ohuholera alala. Nae ohudaha ohwomiisa endagaano eyo, omuhaana w'omutuki w'emwaalo yahachie mani n'adeehera omutuki w'emukulu. Nae ohudeehisania hwaabwe haba sihwahayiindire daawe. Nae omuhaana w'omutuki oyo yaheetwa, alala neende abahalaabani abahabe nibachiire nae, neende omusaacha wae, alala neende omwaana waabwe.

⁷ Mu ndaalo echo, mulala hu beeho b'omuhaana w'omutuki oyo yahehole omutuki, naakobola mu makulu ka laatang'ene. Mani aliseeta eye ly'omutuki w'emukulu. Mani yaheengira mu dooho site ly'omutuki oyo. Yahabalwaanie, mani abayiingire.

⁸ Mani aliyaaya banasaae baabwe betaanywa, haandi aliyaaya ebiindu byaabwe by'engaanga eby'efeesa neende eby'esaabbu, mani n'akobolayo nabyo Misiri. Mani alimala emyaaka miingi hooho n'ataseeta omutuki w'emukulu.

⁹ Nae emyaaka echo nichiriba nichiweere, omutuki w'emukulu aliseeta omutuki w'emwaalo, mani naayiingirwa, mani n'ayiikwa ohukobolayo mu syaalo syae syeene.

¹⁰ Mani abaana bae baheetekehere ohulwaana eye, mani nibabuusa alala eye hoongo muno, elyaheeche mani niriichula mu syaalo koti omuhula kw'amaachi, mani niriyiingira abasuku baalyo, niribabitamo, mani niryolera elalira hu dooho lyae.

¹¹ Omutuki w'emwaalo yahanyoolere muno, mani n'atulayo ohulwaania omutuki w'emukulu, yaseeta eye ly'omutuki oyo elyali ehoongo muno, mani n'aliyiingira.

¹² Nae n'amalire ohuyiingira eye hoongo elyo, yahehuduumbasa mu mwooyo kwae olw'ohuyiingira neende ohwiita abalwaani b'amaye baangi muno. Nae ohuyiingira hwae haba sihwahayiindire daawe.

¹³ Olwohuba omutuki w'emukulu yahakobole engo wae, mani abuuse alala eye hoongo muno ohuhiraho elyataangira. Mani esiha syahoole, niyibitireo emyaaka kiyeraho, mani n'akobola naali neende eye hoongo neende ebilwaaniso by'amaani biingi muno.

¹⁴ “Haandi mu biha ebyo, wahabeeo abaandu baangi muno abahatuleyo ohulwaania omutuki w'emwaalo. Mani abaandu baandi abaalaba muno, abomu syaalo syao ewe Danieli, bahajeeme ohwooseresa ebiindu bi wabone muhuboneherwa, nae bahayiingirwe.

¹⁵ Mani omutuki w'emukulu yaheechie mani n'alima obuko ohwebodoohania esiko syasitwa. Mani amaye k'emwaalo haba sikahanyale ohumulwaania,, kata abasikaari bahiriramo elalira obukodyo; olwohuba haba sibahabe neende amaani k'ohumukayira.

¹⁶ Nae omutuki oyo owahamuseete, alihola buli siindu sy'adaha, mani abulao owahamukayire daawe. Mani yaheeme mu Syaalo sy'Oluyaali, mani syoosi sibe mu bunyala bwae.

¹⁷ Omutuki w'emukulu oyo, yahehoonyera amaani kae k'obutuki bwae koosi, ohwiichia ohuseeta. Alihola endagaano ohuleetao omuleembe neende omutuki w'emwaalo. Mani ohudaha ohumwesudyaho, alimuberesa omwaana wae muhaana ohumhdeehya. Nae esyo syoosi haba sisyahabitemo, haandi sisyahamuhoonye daawe.

¹⁸ Mani ebyo nibyahawe, alikaluuhana mani n'aseeta ebisiinga, mani yahayiingire ebisiinga biingi muno. Nae omwimirisi w'amaye mateende, yahaakamye esirekeresi syae esyo. Mubwadyeeri bweene, alimulekeeresa koti lu yeesi yaleekeresa abaandu baandi.

¹⁹ Mani omutuki oyo yahakoboleyo mu biko byae bisite ebyomu syaalo syae syeene; nae yahayiingirwe, mani yahaya ohubonehanaho kata nabudiidi.

²⁰ “Mani omutuki wuundi niye owahakobole mu makulu kae. Omutuki wuundi oyo, yahatume omutoosa w'omusolo owahafwiinyirire abaandu n'abatusaho omusolo, naali neende esichiiririrwa sy'ohwiingiya obuyiinda mu butuki bwae. Nae mu siha sidiidi, omutuki oyo yaheetwe, ataali obusoolo noomba ebiita.”

Omutuki mubi w'Asiiria

²¹ Oyo ofwaanana koti omuundu niyemeeda ohulomaloma naange n'aboola ati: “Mu bweyango sy'omutuki oyo, mwahakobolemo omuundu otahoyera ohuba omutuki.” Oyo yaheechie ataali ohulabula mani n'anyoola obutuki niyehoonyera obukodyo.

²² Oyo yeesi omuyiingania, yahasihiriswe elalira, kata Omulaamisi Muhuluundu wa Nasaae ohulira endagaano, yesi yahasihiriswe.

²³ Mani neende obukodyo bwae, yahabachirise ebyaalo biindi bihole nae endagaano, mani abe ow'amaani muno, kata yaahaba naali neende abaandu badiidi muno.

²⁴ Aliseeta ebituundu by'omuyiinda muno nibitamanyire. Mani alihola ebiindu bi balaata yae, noomba bakuukaang'ene bataaholaho daawe. Alikabula abaandu bamusiira ebiindu neende abaandu baanyakire. Alihola endekeha yohuseeta ebiko by'amaani; nae sino syahamale ebiha bidiidi muno.

²⁵ “Mani neende esimyeeni siingi, alibuusa alala eye hoongo mani n'aseeta omutuki w'emwaalo.” Nae omutuki w'emwaalo alitekeha eye hoongo muno haandi ely'amaani muno, ohulwaana ebiita. Nae omutuki oyo haba siyahayiingire, olwohuba aliheengerwa olukwe.

²⁶ Haandi abo abalichaanga ebyohulya bae bilai, nibo abahamusihirise. Abasikaari bae baangi baheetwe, mani eye lyae nirisalaana-salaana.

²⁷ Nae ebidiira hu batuki abo boombi, emyooyo kyaabwe kyahabaase ohuholera alala, nae esichiiririrwa syaabwe syahabe esy'obusuku. Bahabachirisanie nibehaale alala hu meesa ndala. Nae bibateesa haba sibyahabeeo daawe; olwohuba ebiha byatekehwa ohuba eby'enjakamo byahabe nibisisiiri ohwoola.

²⁸ Omutuki wa Siria oyo alikobolayo mu syaalo syae neende eby'obuyiinda biingi muno bi anyakire. Nae omwooyo kwae kwahabe nikusyuulire ediini y'abaandu ba Nasaae. Mani niyahamale ohuhola by'adaha, alikobolayo mu syaalo syae.

²⁹ Alikobolayo mu biha bi Nasaae yatekeha. Nae ehabi lino, haba sisyahabe koti ehabi lyataangira.

³⁰ Olwohuba emeeri cha Kitimu chaheeche ohumuseeta, mani naatya, n'amala n'akobola enyuma. Mani alimalira etima lyae hu baandu ba Nasaae, mani n'achaaka ohutekeeresa emboosi ch'abaandu abeebwaaba ediini eyo.

³¹ Abasikaari bae baandi baheeche mani nibahola eby'esifwaabi mu Nyuumba ya Nasaae neende esiko syasyo sigumu. Mani balihola esy'omusiro syebwaabwa.

³² Alyehoonyera emboosi ch'obulyaanga, ohudoondobanisira elalira abaandu bebwaaba ediini yaabwe; nae abo abamanyire Nasaae waabwe baliguma mani beelwaanaho.

³³ Mani mu baandu abo, mwahabeemo abakesi baangi abalikerakira abasyaabwe, kata yahaba mbwe bahamale esiha abaandi hu abo baheeterwe mu biita, mani abaandi nibafwa nibasaambwa omuliro, haandi abaandi nibadiirwa mani bayirwa mu jeela.

³⁴ Nae ohwiitwa nihusyemeeda mu moni, abaandu ba Nasaae beesikwa bahanyoole obuhoonyi budiidi-diidi. Nae kata abaandu bahabeyambaanieho, abaangi mwaabo bahabe neende esichiririrwe sy'obukodyo.

³⁵ Mani abaandi hu baandu bakesi baheetwa, nae esyahatulemo, abaandu bahatereeswe haandi balabiswa; mani nibatuswaho embala choosi, ohwoola esiha sy'enjakamo, si Nasaae mweene yatekeha.

³⁶ Mani omutuki w'Asiiria oyo, alihola koti lu adaha. Mani alyefumia haandi yeniinia n'abaasa ati ahira banasaae boosi. Alilomaloma ebitalomwalomwa, n'alekeeresa Nasaae otuka banasaae boosi. Alimeeda ohuhola atyo, ohwoola lu biha by'ohumusaandya byahoole. Olwohuba esyo si Nasaae yatekeha sichia ohwolerera elalira.

³⁷ Omutuki oyo haba siyaheese oluyaali mu banasaae ba bakuuka yaabwe bahalaabaniraanga, oba ba bahasi baheeraanga. Olwohuba abaasa ati abahira boosi oluyaali.

³⁸ Mu sifwo sy'ohwiisa oluyaali mu banasaae bano, yeesa oluyaali mu nasaae w'esiko sigumu, nasaae yi bakuuka yae bali nibatamanyireho daawe; nasaae oyo niye yi ayaanira esaabbu neende efeesa, neende amakina k'engaanga neende ebiyaanwa by'ebbeyi y'aakulu muno.

³⁹ Alyehoonyera abaandu beenamira nasaae muteende oyo, ohuliindaanga ebiko byae bigumu. Abo boosi abafukiirira mu nasaae oyo, alibameedaho oluyaali, mani naabahola abatuki b'abaandu baangi; haandi alibakaba eloba koti omusaara kwaabwe.

⁴⁰ Mu biha by'enjakamo nibyahabe aambi ohwoola, omutuki w'emwaalo mani aliseeta. Nae omutuki w'emukulu alitulayo koti esiifuusye mani amulwaanie neende amaani kae koosi, niyehoonyera ebigaari neende abeerusi b'efaraasi, haandi neende emeeri nyiingi muno. Aliseeta ebyaalo biingi muno, mani yabibitamo n'ahuluukusa koti amaachi k'omuhula.

⁴¹ Mani aliseeta kata neende Esyaalo sy'Oluyaali, mani niyeeta abaandu baangi muno. Nae ebyaalo bino byahamuwone: Edomu neende Moabbu, neende esituundu sy'Abaamooni sihiramo obuhoongo.

⁴² Mani niyahaseete ebyaalo ebyo byoosi, esyaalo sy'e Misiri haba sisyahaluwone daawe.

⁴³ Aliba neende obunyala hu bibiihiro by'esaabbu neende eby'efeesa, neende ebiindu by'engaanga byomu Misiri. Aliyiingira abaandu bomu Libbya neende abomu Etiopia.

⁴⁴ Nae amahuwa katula ebukwe neende emukulu kahamutiise, mani alitulayo neende etima liingi muno ohumalao neende ohusihirisa abaandu baangi muno.

⁴⁵ Mani alyoombaha amayeema k'ekaambi yae akatikaati w'enyaanja neende Olugulu Lwoolerefu lw'Oluyaali. Nae yesi yahoole hu njakamo yae, n'abulao yeesi omuhoonya.