Danieli 1 - EBBAIBBO EMBOOSI YA NASAAE

Olukano lwa Danieli neende abaasye 1:1—6:28 Danieli neende abaasye baleetwa mu dooho lya Nebukadineesa

¹ Mu mwaaka kwohudatu okw'obutuki bwa Yehoyakimu omutuki wa Buyudaaya, Nebukadineesa omutuki wa Bbabbilooni, yaseeta Yerusalemu mani n'asyebodoohania.

² Mani Omwaami n'amuleha n'awaamba Yehoyakimu omutuki wa Buyudaaya, alala neende ebiindu biindi ebyomu nyuumba ya Nasaae; mani n'abiyira mu syaalo sya Sinaari, mu sabo lya nasaae wae, mani n'abita mu sibiihiro sya nasaae wae.

³ Mani omutuki n'alagira Asupenaasi, omulooe wae muhuluundu, adoole mu Baisiraeli bawaambe, abaana baraaga ab'olwiibulo lw'abatuki neende abatula mu madaala mahunuufu.

⁴ Yali owohudoola abaraaga abataaliho embala hu mibiri kyaabwe, ababoneha bulai, abakesi, haandi abaangu b'ohweekesa, haandi abanyala ohuhalaabanira mu dooho ly'omutuki. Asupenaasi yahuutirwa ohubeekesa ohusoma, ohwandiika neende ohulomaloma olulimi lw'Abakaludaaya.

⁵ Omutuki yalagira ati buli ludaalo bababereseenge ebyohulya neende ebyohung'wa bilai bi mutuki yalichaanga haandi yang'wechaanga. Bali abohweekeswa bati ohumala embaka y'emyaaka kidatu, nikiba nikiweereho, hu bamale bachie babaanjule eyiri omutuki.

⁶ Mu baraaga badoolwamo nimwo omwaali Danieli, Hanania, Misaeli neende Asaria, boosi bali ab'enono ya Yuda.

⁷ Mani omuhuluundu wa bahalaabani balooye naakuliha abaraaga abo ameeta kano: Danieli n'amukuliha ati, Bbelitesaasa, Hanania n'amukuliha Sadiraka, Misaeli n'amukuliha Mesaka n'amukuliha nae Asaria n'amukuliha ati, Abbedinego.

⁸ Nae Danieli n'aheengao ohutalya ebyohulya bilai by'omutuki, oba ohung'wa amalwa omutuki kayang'wechaanga, n'atadaha ohulya ebyohulya by'omusiro. Mani sakira, yasaba omuhuluundu w'abalaawe amukwiire esisa ahaye ohuhola ebitamuhoyera.

⁹ Mani Nasaae n'aberesa Danieli ehabi yohuheerwa muno neende ohukwiirwa esisa mu moni wa Asupenasaari omuhuluundu wa balooye.

¹⁰ Mani omuhuluundu w'abalaawe n'aboolera Danieli ati: “Ese tya omwaami waange omutuki, omweene niye owalagira ebyohulya bi muhoyere ohulya neende ebyohung'wa byeeng'we. Nae n'abona ati haba simubonehana bulai koti abaraaga baasyeeng'we, omutuki anyala ohuhola bubi mani yanjita.”

¹¹ Nae Danieli n'aboolera omuliindi yi muhuluundu wa balooye yali niyadoola ohuliinda Danieli, Hanania, Misaeli, neende Asaria ati:

¹² “Hwekweeda oteemeho abahalaabani bao embaka y'endaalo ehumi; leha batubereseenge elyaani lyoong'ene ohulichaanga, neende amaachi koong'ene ohung'wechaanga.

¹³ Mani ochia ohutukeraania neende abaraaga balya ebyohulya bilai ebitula hu meesa y'omutuki, mani omweene oheengeo esy'ohuhola ohweema hu ngeri yihubonehanamo.”

¹⁴ Mani omuliindi oyo n'afukiirira ohubateema hulw'embaka y'endaalo ehumi.

¹⁵ Endaalo ehumi nichawa, abaraaga bano babonehana bulai muno haandi bali nibahomeere muno ohuhira abaraaga baandi boosi abalichaanga ebyohulya byali bitulaanga hu meesa y'omutuki.

¹⁶ Mani ohutula hu ludaalo olwo, omuliindi oyo n'abatusa hu byohulya bilai neende hu by'ohung'wa bilai byohu meesa y'omutuki, mani n'ababeresaanga elyaani lyoong'ene ohulya.

¹⁷ Mani Nasaae n'aberesa abaraaga bane bano amakesi neende ohumanya bi beekesa byoosi bwaangu muno. Nae Danieli nameedwaho ohumanyaanga amahuluundu k'ohuboneherwa neende ak'ebilooto.

¹⁸ Mani ebiha bi omutuki Nebukadineesa bi yalagira ati baanjulwe, omuhuluundu w'abalaawe n'abayira babaanjule eyiri omutuki.

¹⁹ Omutuki naalomaloma nabo, mani nasiimamo Danieli, Hanania, Misaeli, neende Asaria ohuhiramo mu boosi. Mani bane bano nibadoolwamo ohuba abahalaabani b'omutuki.

²⁰ Mani mu buli siindu sy'amakesi neende ohumanya si omutuki yabateebaanga, yabona ati, bane bano bahira amahabi ehumi abalakusi boosi neende ab'amayia boosi abomu butuki bwae bwoosi.

²¹ Danieli yadoong'a mu dooho ly'omutuki ohwoola mu mwaaka kutaangira okw'omutuki Siiraasi omutuki wa Pa.