Amosi 6 - EBBAIBBO EMBOOSI YA NASAAE

Ohusihiriswa hwa Yisiraeli

¹ “Chibaakaanire, abo abali bulai mu Siyooni, neende abo abataali neende sibatya hu lugulu lwa Samaria, eng'we abachweenufu bomu syaalo sihoongo sya Yisiraeli sino, eng'we b'abaandu beecha yi muli nibakoonya obuhoonyi.

² Mwaambuhe muchie Kalune, mani mubone; mutule eyo, mani muchie mu siko sihoongo sya Hamati; haandi mwiihirire muchie Gaati, esiko sy'Abafilisiti. Ebiko ebyo bihira ebiko byomu Buyudaaya oba ebyomu Yisiraeli obulai? Oba esyaalo syaabwe sihira esyeeng'we obuhoongo?

³ Eng'we muhayire ohufukiirira muti oludaalo lw'amasira luli aambi ohwoola, mani nimuhola ebiindu bi lusudya aambi sa.

⁴ “Chibaakaanire, eng'we abeyalisa hu bitaanda bilai, haandi nimweekolola hu buliri bweeng'we, mani nimuhola ebidyaalo by'enyama y'amakoondi madoto, neende emoosi chomu bidwooli byeeng'we.

⁵ Eng'we bahubbaanga obuhana nimweemba enyembo ch'ohwesaangaasa, haandi muhola obuhana buyaaha koti lu Daudi yaholaanga.

⁶ Eng'we bang'weeraanga efiini mu bikwaada, haandi mweebaha amafuta malai muno, nae haba simuchuunirwa ohusihiriswa hwa Yisiraeli.

⁷ Mani sakira niing'we abahataangire ohuchia mu bwiiruhiro. Mani ebidyaalo byeeng'we bibasaangaasa byahaakame.”

⁸ Omwaami Nasaae, omweene niye owechubire ati (Omwaami Nasaae w'Obunyala) aboola ati: “Haba siindaha ohwehuduumbasa hw'Abaisiraeli, haandi ndekeeresa enyuumba chaabwe ndai; mani njia ohudiisa esiko esyo neende buli siindu sisirimo mu mahono k'abasuku baabwe.”

⁹ Mani abaandu ehumi nibahadoong'e mu nyuumba ndala, boosi bahafwe.

¹⁰ Omwiiho w'omuundu mufu, ohoyere ohumusiiha, niyahatuse omulaambo mu nyuumba, aliteeba oyo owahabe nasidoong'ere mu sigoro syomuukati syeene ati: “Aliwo osidoong'ereho naawe?” Mani yahakobolemo ati: “Daawe.” Yahaboole ati: “Wuleera! Huhaye kata ohutuumbulaho eliita ly'Omwaami.”

¹¹ Olwohuba bone, Omwaami alagira, mani enyuumba hoongo yahalikuhemo mu bituundu-tuundu, neende enyuumba ndiidi niyilikuhamo ebituundu-tuundu.

¹² Efaraasi chiiruhiraanga hu nyaanda? Abaandu balimyaanga endaawu hu nyaanja? Nae eng'we, mukaluuhaanie obwadyeeri ohuba obutwa, haandi obuluungifu, mubukaluuhanie ohuba obuhyaamu.

¹³ Mweehoya hulw'ohuwaamba esiko sya Lodebbari, haandi mweefumia nimuboola muti: “Abeene hwenyoleere neende amaani keefwe mani hwawaamba esiko sya Karinaimu hulw'amaani keefwe.”

¹⁴ Omwaami Nasaae w'Amaye aboola ati: “Eng'we Abaisiraeli, bone, njia ohusiingisa esyaalo siindi ohubalwaania.” “Mani bahabasaandye ohutulira elalira Hamati ohwoola hu haalo ha Arabba emwaalo.”