Amalako Kohubiri 8 - EBBAIBBO EMBOOSI YA NASAAE

Esyaalo silai sy'ohuyira

¹ “Muloondeenge bulai ebilagiro bi mbalagira enyaanga yino, hu munyale ohuyiindira, mwiingiye, haandi mwiingire mumenye mu syaalo si Omwaami yechuba ohuberesa bakuuka yeeng'we.

² Mwiichuliseenge koti lu Omwaami Nasaae weeng'we yabeemiriramo mu siparara emyaaka amahumi kane kino kyoosi, hu anyale ohubaloongoyasa, n'abateema ati anyale ohumanya ebiri mu myooyo kyeeng'we, abone nimunyala ohuloonda amalako kae kose haba.

³ Yabaloongoyasa yaaleha enjala yaabaluma, mani yaabaliisa mana yi mwali nimutaamanyire, kata yi bakuuka yeeng'we bali nibataamanyire, abeekese mumanye muti, omuundu saabechaangao omulamu hulw'ebyohulya byoong'ene, nae ati omuundu abechaangao omulamu hulw'emboosi choosi chi Omwaami aboola.

⁴ Emyaaka amahumi kane kino, engubo cheeng'we haba sichabataanduhaho, oba kata sa amakulu keeng'we ohufwiimbaho.

⁵ Mwiichulise mu myooyo kyeeng'we muti, koti lu muundu yahakolola omwaana wae, nilwo nasilala lu Omwaami Nasaae weeng'we abakolola.

⁶ Mani muloondeenge amalako k'Omwaami Nasaae weeng'we, muloondakaneenge neende by'abalagira haandi mumwiiseengemo oluyaali.

⁷ Omwaami Nasaae weeng'we ali ohubayira mu syaalo sirimo emyaalo neende esulo, neende emyaalo kihulukusa nikitula mu mahooho neende mu bigulu.

⁸ Esyaalo syaamamo engaano neende amabere masuungu, esirimo emisabbiibbu neende emituli neende amapomegiranati, esyaalo sirimo emiseituuni neende obuuhi.

⁹ Esyaalo si munalicheengemo ebyohulya mani bihaya ohubahendeeraho, haba simuliba neende esiindu si mwekoomba, esyaalo si makina kasyo katulamo ebyuuma, haandi mu bigulu byasyo biyabwamo ebikomo.

¹⁰ Mwahalye mani mwiikute, mani mweebaseenge Omwaami Nasaae weeng'we hulw'esyaalo silai siyababeresa.

Ohulabula hudiira hu hwiibiriraanga Omwaami

¹¹ “Mumanyaanga mwiibirira Omwaami Nasaae weeng'we, muhaya ohuloonda ebilagiro bae neende engeraka yae neende amalako kae, ka ndi ohubalagira enyaanga yino.

¹² Mani nimuba nimumalire ohunyoola ebyohulya bimala haandi mweekuta, nimuba nimumalire ohwoombaha enyuumba ndai mani mwamenyamo,

¹³ haandi eng'oombe cheeng'we neende ebyaayo byeeng'we nibyemeeda, efeesa cheeng'we neende esaabbu byeeng'we nibyemeeda, buli siindu si muli nasyo nisyemeeda,

¹⁴ mutateemaangaho ohweniinia mu myooyo kyeeng'we mani mweebirira Omwaami Nasaae weeng'we, owabatusa mu syaalo sy'e Misiri yi mwali koti abawaambe.

¹⁵ Omwaami wabeemiriramo nimubita mu siparara sihoongo haandi esitiisa muno, esyalimo endemo ch'obusiba neende amahala. Nimubita mu siparara esyo esyalimo eloba lyoomu, omubula amaachi, oyo owababeresa amaachi nikatula mu lwaanda lwoomu.

¹⁶ Omwaami oyo owababeresa mana yi bakuuka yeeng'we bali nibatamanya ohulya, anyale ohubaloongoyasa haandi ohubateema, hw'amale ababerese ebiindu bilai.

¹⁷ Mweliinde mani muhaye ohubaasa mu myooyo kyeeng'we muti, ‘Obunyala bweefwe neende amaani keefwe nibyo ebitunyaliire ohunyoola obuyiinda buno.’

¹⁸ Nae yichuliseenge Omwaami Nasaae weeng'we, olwohuba niye owababeresa obunyala bwohunyoola obuyiinda obwo; mani hw'anyale ohwomiisa endagaano yi yechubira bakuuka yeeng'we, koti lu aholere enyaanga yino.

¹⁹ Nae nimwiibirira Omwaami Nasaae weeng'we mani mwaloonda banasaae baandi, haandi mwabahalaabanira mani nimubeenamira, mbalabula mubwadyeeri bweene enyaanga yino endi haba simwahahaye ohusihiriswa.

²⁰ Nimwahahaye ohuwulira Omwaami, muchia ohusihirira koti ebyaalo ebyo bicha ohusihirisa eng'we nimwoola, olwohuba haba simwawulira ekono ly'Omwaami Nasaae weeng'we.”