Amalako Kohubiri 22 - EBBAIBBO EMBOOSI YA NASAAE

¹ “Mutabonaanga eng'oombe yo wasyeeng'we oba ekoondi lyae nibikota, mani mwaabileha sa byaawaao. Muhoyere ohubikobosaanga eyiri omweenebyo.

² Nae omweenebyo naataali aambi naang'we, oba nimutaamumanyire, mubiyireenge engo weeng'we mani mubiliindira eyo ohwoola lu mweenebyo abikoonyera, hu mwaamukobosera.

³ Munaholeenge nasilala mutyo nimunyoola esuhiri yae niyikotere; oba nimunyoola engubo yae niyikotere; mutahayaanga ohudeebayo.

⁴ Mutabonaanga esuhiri yo wasyeeng'we oba esurusi yae niyikwiire hu ngira, mani muyibitaho sa muhaya ohuyihoonya. Muhoyere ohuyihoonya yaasiingira.

⁵ “Abahasi haba sibafukiirirwa ohwefwaala ebyefwaalo by'abasaacha, oba abasaacha ohwefwaala eby'efwaalo by'abahasi. Olwohuba esiindu siri sityo sy'omusiro nisyo eyiri Omwaami Nasaae weeng'we.

⁶ “Nimunanyooleenge esiyu sy'eyoni hu musaala kwoosi oba hu loba, nisirimo obwaana oba amaki, neende ng'ina nilikonere hu bwaana oba hu maki, mutayiraanga eyoni elyo neende obwaana bwaalyo.

⁷ Munyala ohuyira obwaana nae mwaalehuula ng'ina lyaabburuha lyaawaao, hu biba binabachiira bulai haandi muyiindire muno.

⁸ “Nimwoombahaanga enyuumba njaaha, mutechaanga esichafu hu sirama, hu muhayeenge ohuba neende omusaango omuundu niyaanuha yaatula hu sirama esyo yaakwa aasi.

⁹ “Mutataakaanga esirime siindi mu ndalo yeeng'we y'emisabbiibbu, nimuhola mutyo, haba simunafukirirweengwe ohuyira esyaamwo syoosi Abuundu Woolerefu, ebyaamo by'esirime si muba ni mwataaka esyo neende ebyaamo by'emisabbiibbu chana.

¹⁰ Mutalimisiryaanga endaawu neende esuhiri hu koombo lala.

¹¹ Mutefwaalaanga engubo yi basonera obuwuusi bw'obwooya bw'amakoondi alala neende obuwuusi buundi.

¹² “Munaasoneenge ebijweenge hu sonda chine ch'engubo cheeng'we chi mwefwaala.

Amalako kadiira hu huba alala hulai hw'abasaacha neende abahasi

¹³ “Omusaacha n'anadeehyeenge omuhasi, mani yaaba alala nae, nae luunyuma yaamwebwaaba,

¹⁴ haandi yamutaaho omusaango n'amulomalomaho bubi, yamutaaho eliita bi n'amudiisa esoni, n'aboola ati, ‘Ndayira omuhasi wuno, nae nindaba alala nae, ndanyoola endi bali nibamala ohumutusamo omubiri,’

¹⁵ laatang'ene neende ng'ina muhaana oyo banaabukuleenge esuuka liriho amabaanga li beeyalisaho hu ludaalo lw'ohudeehisania mani baliyira balyeekesa abeemeresi b'esiko esyo, abuundu yi baheengeramo emisaango, akeekesa kati yali n'asisiiri ohumanyaho eby'abasaacha.

¹⁶ Laatang'ene muhaana anaboolereenge abeemeresi ati: Ndaberesa omusaacha wuno omuhaana waange amudeehye, nae bulaanu amwebwaabire.

¹⁷ Haandi bone, anyaasire eliita lyae n'aboola ati, ‘Haba sindanyoolaho mu muhaana wao wuno omubiri.’ Nae bone, lino nilyo esuuka li bakonaho hu ludaalo lu badeehisanisiria, elyeekesa liti yaali n'asisiiri ohweeyalisaho neende omusaacha yeesi. Baba bachia ohwaalaanga esuuka elyo mu moni w'abeemeresi b'esiko esyo,

¹⁸ mani abeemeresi abo badiira omusaacha chana oyo bamunaala embooko.

¹⁹ Haandi baba bachia ohumutungyaanga ebituundu emia ndala by'efeesa, mani baabiberesa laatang'ene muhaana oyo. Olwohuba anyaasire eliita ly'omuhaana wa Yisiraeli. Omuhaana oyo haandi aba chia ohuchiiririraanga ohuba omuhasi wae ataali ohwiiruswaho yaawaao mu bulamu byae bwoosi.

²⁰ Nae niwiichuhana byaaba ebyadyeeri biti omuhasi oyo yali niyamala ohuwaamo omubiri,

²¹ baba banaamuyireenge mu lwaanyi lwa laatang'ene mani abasaacha bomu siko esyo bamuhuyira eyo n'amakina bamwiita, olwohuba yahola esiindu sy'esoni mu Yisiraeli. Yahola obucheke n'asisiiri mu nyuumba ya laatang'ene. Muholeenge mutyo, humuba muchia ohweetusaangaho esyonoono esyo.

²² “Omusaacha n'anadiirweenge naakona omuhasi w'omusaacha wuundi, boombi baba bahoyere ohwiitwa, omusaacha okonere omuhasi oyo, alala neende omuhasi yi bakonere mweene, munyale ohweetusaangaho esyonoono esyomu Yisiraeli.

²³ “Naabaao omuhaana osisiiri ohumanyaho eby'abasaacha, mani omusaacha yaamubukaana mu siko yaakona nae, muba muchia ohubatusaanga erwaanyi w'esiruwa sy'esiko esyo, mubahuye amakina boombi mubeete bafwe.

²⁴ Boombi banaatusweenge erwaanyi w'esiruwa sy'esiko esyo, mani mubahuyireeyo amakina mubeeta. Omuhaana w'engeri eyo anaafwiicheenge olwohuba haba si yoobba embuungu koti lu yali n'ali mu siko esyo. Nae omusaacha chana nae anaafwiicheenge olwohuba mbwe yakona omuhasi w'omusaacha wuundi. Nimuhola mutyo humuba muchia ohweetusaangaho omusaango okwo.

²⁵ “Nae omusaacha nanaakwiicheenge hu muhaana wanjuulwe mu siino, mani amukona hulw'amaani, ao omusaacha w'engeri eyo yeeng'ene niye oba ahoyera ohwiitwa yeeng'ene.

²⁶ Nae haba mutaholaangaho esiindu syoosi hu muhaana yi baba nibakonere hulw'amaani oyo olwohuba sibulao esyonoono syoosi si aba naaholere esihoyera esibonereso sy'ohwiitwa. Olwohuba omusaango kuno kuli koti okw'omuundu oseeta owaasye mani yaamwiita.

²⁷ Olwohuba yamukwaaho neende amaani, nae kata neende omuhaana mwanjulwe niyoobba embuungu n'adaha obuhoonyi, abulao omuundu yeesi owamwaabina.

²⁸ “Nae omusaacha nanaakwiicheenge hu muhaana osisiiri ohumanyaho eby'abasaacha, yaamukona hulw'amaani, mani babanyoola,

²⁹ ao omusaacha omukwiireho oyo aba anaabecheenge laatang'ene muhaana chana oyo ebituundu by'efeesa amahumi kataanu, mani omuhaana oyo amala aba omuhasi wae. Haandi olwohuba mbwe yamutusamo omubiri, haba saanyala ohumwiirusa yaawaao mu bulamu bwae bwoosi.

³⁰ “Omusaacha haba saafukiirirwa ohubukula oba yaakona omuhasi wa laatang'ene.