Amalako Kohubiri 19 - EBBAIBBO EMBOOSI YA NASAAE

Ebiko by'ohwiiruhiraangamo

¹ “Omwaami Nasaae weeng'we niyahamale ohusihirisa ebyaalo byeene loba li Omwaami Nasaae ali ohubaberesa, mani mubituke haandi mumenye mu biko byaabwe neende mu nyuumba chaabwe,

² muchia ohwedooleramo ebiko bidatu mu syaalo si Omwaami Nasaae weeng'we ali ohubaberesa ohutuka.

³ Muchia ohutereesa engira, mani mwaawulemo esyaalo si Omwaami Nasaae weeng'we ali ohubaberesa ohutuka sibeemo ebituundu bidatu, buli muundu onabecheenge niyeetere omuundu n'atachiririire anyale ohwiiruhira mu silala hu biko bidatu ebyo ohweewonia.

⁴ Omwiiti oneruhireenge mu silala hu biko bidatu bino mani awonia obulamu bwae, niye onaabecheenge niyeetere omuundu otaali omusuku wae n'atachiririire.

⁵ Esyohuboneraho, omuundu n'achia neende owaasye mu sichaha ohutema omusaala, mani eyaywa yae yaasabuha mu mwiini kwayo yaahuya owaasye oli aambi nae yaamwiita, omuundu oyo anyala ohwiiruhira mu silala hu biko bidatu ebyo mani yaawonia obulamu bwae.

⁶ Nae esiko nisiba silala syoong'ene, mani olukeendo lwaaba oluleeyi muno ohusyoolamo, omwiiho w'omuundu mufu odaha ohwetuunga yaaba neende etima yamwongaho n'amukiiya yamudiira yamuhuya mani yaamunyayaala, aba yeeta sa omuundu obulaho omusaango.

⁷ Mani sakira mbalagira endi, muchia ohwaawulamo ebiko bidatu.

⁸ Nae Omwaami Nasaae weeng'we naatakalasa enjaho ch'esyaalo syeeng'we, koti lu yechubira bakuuka yeeng'we, yaababeresa esyaalo syoosi si yasuubisa ohubaberesa.

⁹ Mwehaliirisaanga bulai ohudiira amalako kae, ka mbalagira enyaanga yino, nimuheera Omwaami Nasaae weeng'we haandi buli ludaalo mwaaholaanga by'adaha. Muchia ohumeeda ebiko bidatu biindi hu biko bidatu ebyo.

¹⁰ Muchia ohuhola mutyo hu baandu bataaliho omusaango bahaywe ohwiitwa mu syaalo si Omwaami Nasaae weeng'we ali ohubaberesa ohuba esyeeng'we, mani omusaango kw'ohwiidisa amabaanga kuhaye ohubabechaangaho.

¹¹ “Nae omuundu nanasyuuleenge owaasye, mani amweliindirira hu ngira, amukwaaho, amwiita, mani yeeruhira mu biko bino,

¹² ao abeemirisi b'esiko syaabwe baba bachia ohutumaanga abaandu bachia bamutusayo, mani bamudiisa mu mahono k'omwiiho w'omufu ohoyera ohwetuunga amabaanga k'omuundu yeetwa oyo, mani yeesi yeetwa.

¹³ Mutakwiiraanga omuundu mwiiti koti oyo esisa, nae mumwiiteenge mumumalao ohutula mu Yisiraeli, hu biindu biba binabachiiraanga bulai.

Enjaho ehale

¹⁴ “Mu busiha bu muchia ohunyoola mu syaalo si Omwaami Nasaae weeng'we ali ohubaberesa ohutuka, mumanyaanga muteeyakaangayo amakoonge k'enjaho ch'abaasyeeng'we ba musibiraane nabo, akataakwa neende abaandu ba hale.

Ebidiira hu baloli

¹⁵ “Omuloli mulala yeeng'ene haba sanaakereenge omusaango kuhira omuundu hulw'esibi, oba hulw'esiindu sibi syoosi si muundu aba naaholere. Omusaango kunomiisweenge neende abaloli babiri, oba badatu.

¹⁶ Niwiichuhana omuundu yeesi yaabachira owaasye bihaya,

¹⁷ abaandu batawuliirisania abo boombi baba banaachicheenge mu moni w'Omwaami, mani baheengerwa eyo omusaango eyiri abalaamisi oba abakayi banaabecheengeo ebiha ebyo.

¹⁸ Abakayi baba bachia ohuteeberesaanga bulai bweene, mani niwiichuhana baafuumbula bati aliwo hu abo otusire obuloli bw'obubacha, haandi yaayirisa owaasye bihaya,

¹⁹ munamubereseenge omuloli w'obubacha chana oyo esinyaaso si waasye oyo abeere naachia ohunyoola. Nimuhola mutyo humuba muchia ohweemalaho esyonoono esyo.

²⁰ Abaandu baandi baba bachia ohuwuliraanga, mani batya bahaya ohuholaangaho esyonoono siri sityo ehabi liindi.

²¹ Mutaboneraanga esiindu siri sityo esisa. Esinyaaso siba sinabechaanga mbwe obulamu butuungwa neende obulamu, emoni yituungwa neende emoni, eliino lituungwa neende eliino, omuhono kutuungwa neende omuhono, haandi mbwe ohukulu hutuungwa neende ohukulu.