Abarooma 7 - EBBAIBBO EMBOOSI YA NASAAE

Esyohuboneraho situla muhudeehisania

¹ Basyaange manyire bulai bweene endi muchia ohumanya si njia ohulomalomaho, olwohuba eng'we mweesi mumanyire amalako ka Musa. Elako lituka abaandu nibasisiiri abalamu.

² Esyohuboneraho; omuhasi wadeeha, elako limuboya ohumenya neende wamwe n'asisiiri omulamu; nae wamwe n'amala yaafwa, ao omuhasi oyo elako haba siliba nilisiimuboya ohumenya neende wamwe.

³ Mani sakira omuhasi w'engeri eyo naaba neende omusaacha wuundi wamwe n'asisiiri omulamu, aba achia ohulaangwa omucheke; nae omusaacha naafwa, aba omuhasi mulehuule mani saaba n'ahola obucheke, niwiichuhana yadeehera omusaacha wuundi.

⁴ Basyaange, mwesi muli mutyo. Ebidiirana neende amalako, mwesi muli abafu, olwohuba muli esituundu sy'omubiri kwa Kristo; mani bulaanu muli abaandu b'oyo, owasyuuhiswa ohutula mu bafu, hu munyale ohuba ab'obuhoonyi mu huhalaabanira Nasaae.

⁵ Olwohuba nihwali nihusiitukwa neende obunyala bw'omubiri kweefwe, obwekoombi bubi obwasiingiswa neende amalako, nibwo obwali nibuhola mu mibiri kyeefwe, mani buli siindu si hwaholaanga syali nisituyira mu hufwa.

⁶ Bulaanu efwe huli abalehuule ohutula hu malako, olwohuba hwafwa eyiri esyo esyali nisyatuhola ababoye. Haba sihusihalaabanira nihuloondakana neende engeri hale, ey'elako lyandiikwa, nae huhalaabana mu ngeri njaaha ey'Omwooyo.

Amalako neende esyonoono.

⁷ Bulaanu hunaboole huti, elako lyeene nilyo esyonoono? Haba daawe! Nae elako nilyo elyakera ndaamanya esyonoono. Elako liba nilitaboola liti, “Otekoombaanga esiindu sy'omuundu wuundi,” haba sindahamanyire obwekoombi buno.

⁸ Nae esyonoono syehoonyera elako elyo ohunyoola ehabi y'ohunjakulusamo obwekoombi bubi bwa buli ngeri. Elako liba niliteecha, esyonoono syahabeere esiindu syafwa.

⁹ Ese syesi ndali ni ndi omulamu amalako nikabulao; nae elako nilyeecha, esyonoono syalamuha,

¹⁰ mani ndaafwa. Mani ao, elako elyali ely'ohuleeta obulamu, nae nilyeecha, lyandeetera ohufwa.

¹¹ Esyonoono syanyoola ehabi mani syehoonyera elako, syaambachirisa syaanjita.

¹² Mani sakira, elako koti elako, elyeene lyoolerefu, haandi esilagiro syosi syoolerefu, siluungifu, haandi silai.

¹³ Nae sino syeekesa siti, esyali esilai nisyo esyandeetera ohufwa? Haba daawe! Nae esyonoono nisyo esyaahola sityo nisyehoonyera esiindu silai, mani esyonoono syandeetera ohufwa, hu bubi bw'esyonoono bunyale ohumanyihana alafu. Mani sakira ohweema hu malako, esyonoono syeyekesera elalira ohuba esyonoono muno.

Ohulwaanakana huli mu bulamu bw'omuundu

¹⁴ Efwe humanyire huti amalako kaliwo hulw'obulamu bw'omwooyo; nae ese si ndi ow'obulamu bw'omwooyo, owakuswa ohuba omuhalaabani w'esyoono.

¹⁵ Haba siimanyire esiindu si ndi ohuhola; olwohuba haba siihola esiindu si ndahekoombere ohuhola, ohumalaho hola sitaadahire ohuhola.

¹⁶ Mani koti esiindu si ndi ohuhola nisyo sitahadahire ohuhola, sino syeekesa siti, fukiirira endi elako luungifu nilyo.

¹⁷ Mani haba si neese mweene oli ohuholaanga esiindu sino; ohumalaho esyonoono syaamenyamo nisyo esiri ohuholaanga.

¹⁸ Ese manyire mu ese, koti omuundu, mbulamo esilai daawe, olwohuba ohwekoomba ohuhola esilai huundimo, nae ese haba siinyala ohusihola.

¹⁹ Haba siihola esilai si ndahadahire ohuhola; ohutusaho, hola esyonoono sitaadahire ohuhola.

²⁰ Mani nihola esiindu sitahadahire ohuhola, sino syeekesa siti, haba siniise mweene oli ohusihola, nae esyonoono syaamenyamo nisyo esiri ohusiholaanga.

²¹ Mani liindeholeere elako mbwe nindaha ohuhola esilai, esyonoono si ndi aambi muno.

²² Mu bulamu bwaange bweene, sangaalira amalako ka Nasaae.

²³ Nae mbona endi mu mubiri kwaange, elako liindi eliyiingania elako lya Nasaae, nilyo li makesi kaange kadaha. Sino sikera ndaaba omuboye w'elako ly'esyonoono eliholera mu mubiri kwaange.

²⁴ Ndi omuundu mwelalihirifu! Wiina mweene ochia ohuununula yaanduse mu mubiri kuno okuli ohuunjira mu hufwa?

²⁵ Nasaae yeebasibwe, owununula ohubitira mu Omwaami weefwe Yesu Kristo! Mani nilwo lu ndi: hulwaange omweene, ese nyala ohuhalaabanira amalako ka Nasaae mu bibaaso byaange, nae obulamu bw'omubiri kwaange buhalaabanira elako ly'esyonoono.