Abarooma 13 - EBBAIBBO EMBOOSI YA NASAAE

Ebidahibwa ohuholera abatuki

¹ Buli omuundu ahoyere ohuwulira abatuki b'esyaalo, olwohuba bubulao obunyala bw'obutuki bwoosi obutatula eyiri Nasaae, haandi abatuki baliwo boosi Nasaae niye owabataao.

² Buli muundu oyiingania obutuki buliwo, aba ali ohuyiingania esiindu si Nasaae yataao; haandi buli muundu ohola atyo, achia ohweleetera omusaango omweene.

³ Olwohuba abaandu bahola ebiindu bilai, haba sibatya batuki, ohumalaho abahola-mbi nibo ababatya. Odaha ohuba omuundu otatya abatuki? Mani hola ebilai, mani bachia ohuhufumia,

⁴ olwohuba abatuki abo, bahalaabani ba Nasaae, hulw'obulai bweeng'we. Nae nimwonoona mubatye, olwohuba bali neende obunyala bw'ohusaandya abonooni. Abatuki abo bahalaabani ba Nasaae, mani booseresa ohusaandya hwa Nasaae eyiri abahola-mbi.

⁵ Hulw'esifune sino, buli muundu ahoyere ohuwulira abatuki ataali ohutya ohusaandisibwa hwa Nasaae, nae koti ebibaaso by'omwooyo kwae bimweekesa.

⁶ Esyo syosi nisyo esikera nimutooya emisolo olwohuba abatuki bahalaabanira Nasaae, nibaba nibooseresa emirimo kyaabwe.

⁷ Mani mutuunge bi muhoyere ohubatuunga; mubatuunge emisolo kyeeng'we abeene neende emisolo ki bata hu biindu byeeng'we, haandi mubaticheenge neende ohubeesamo boosi oluyaali.

Ebidahibwa ohuholera abaandu basyeeng'we

⁸ Mutabechaanga neende ekobi eyiri omuundu yeesi, ekobi li muhoyere ohuba nalyo nilyo ely'ohuheeranaanga. Omuundu yeesi owuheera owaasye, oyo aba yooseresa amalako.

⁹ Amalako kaboola kati, “Otahola obucheke; oteetaanga; otebaanga; otekoombaanga ebiindu by'omuundu wuundi.” Amalako kano koosi, neende akaandi kadoong'ereo, kabuusibwa mu lako lala liti, “Heeraanga owaasyo koti lu weeheera omweene.”

¹⁰ Omuundu yeesi owuheera owaasye, siyahamuhola esibi. Sakira ohuheerana nihwo ohwooseresa amalako koosi.

¹¹ Muhoyere ohuhola sino, olwohuba mumanyire muti ebiha byeeng'we by'ohusimuha byoolere. Olwohuba ebiha bi huhoyeere ohuwonisiribwamo, bisuudire aambi ohuhira koti lu hwachaaka ohufukiirira.

¹² Esiro siri aambi ohuwa, haandi obwiire buli aambi ohuhya. Sakira lehe hulehe ohuhola ebiindu byomu siirima, mani hubukule ebilwaaniro by'obulafu.

¹³ Lehe hube neende ebiima bilai, ebihoyera abaandu bamenya mu bulafu bw'esideete, ataali ohusangaasa emibiri, oba ohumeera, ataali obucheke oba obuyirani, ataali ohulwaana oba ebihali-hali.

¹⁴ Ohumalaho, mwefwaale Omwaami Yesu Kristo, mani mutaberesaangaho emibiri kyeeng'we obweyaango bw'ohwonoona bi kyekoomba.