Abakolosaayi 2 - EBBAIBBO EMBOOSI YA NASAAE

¹ Olwohuba ese ndaha eng'we mumanye obukali bw'ohubalwaanira hwaange, neende abo abali mu Laodesia, haandi neende abo boosi abasisiiri ohubonaho obweeni bwaange,

² hu bulaanu emyooyo kyaabwe kinyale ohwomiisibwa koti lu bediira alala mu huheerana, ohunyala ohunyoola engaanga yoosi eyohumanya hweene neende ohumanya esyaama sya Nasaae esya Kristo,

³ owakiswamo obuyiinda bwoosi obw'amakesi neende ohumanya.

⁴ Mboola sino omweene hu bulaanu abuleo omuundu yeesi onyala ohwiicha yababachirisa neende enomanoma ch'obukodyo.

⁵ Olwohuba kata neende ni mba nitaali ao mu mubiri, nae ndi naang'we mu mwooyo, nisangaala ohubona endekeha ndai yeeng'we, neende obwomiifu bw'efukiirira yeeng'we mu Kristo.

Obulamu bwiichufu mu Kristo

⁶ Koti lu mwamala ohunyoola Omwaami Kristo Yesu, mumumenyemo,

⁷ nimumwiingiisemo emisi ky'eng'we, haandi nimumuhuliiremo, haandi nimweyombaahe mu fukiirira, koti sa lu mweekeswa, ni mwichuule ohweebasaanga.

⁸ Muboneenge muti, omuundu yeesi ateecha yaabakaadiirisa niyehoonyera amayiingi neende obubacha buhaya, ebitula mu miduunga ky'abaandu, ohweema hu myooyo kyafwa eky'ohusyaalo huno, ataali ohweema hu Kristo.

⁹ Olwohuba ni mu mweene oyo nimwo mu bwanasaae bwiichufu bwadyeeri bwamenya,

¹⁰ haandi mwanyala ohwaangalira mu mweene oyo, haandi oli omutwe kw'obutuki bwoosi neende obunyala bwoosi.

¹¹ Mu mweene oyo, mwamala ohuhebwa neende ohuhebwa hutaholebwa neende amahono, nimwefwaalula omubiri kw'enyama mu huhebwa hwa Kristo;

¹² haandi mwasiihwa alala nae mu hubatiisibwa, mu mwesi haandi mwasyuuhiswa nae mu fukiirira, muhudaha hwa Nasaae, owamusyuuhisa ohutula mu bafu.

¹³ Mani eng'we abali mwafwiira mu bwonooni neende obutahebwa enyama yeeng'we, Nasaae yabalamusira alala nae, n'amalire ohutulehera ebyonoono byeefwe,

¹⁴ haandi n'amalire ohubwiiha hu sigiingi syali syatuhiinga neende bi malako kadaha; yasudya ebyeene bino endulo, n'abihoma hu musalabba.

¹⁵ Yang'uula emiduunga neende amaani k'esiirima obunyala bwabyo, yabyaaniha alafu yeekesa esihoyera ohubihola byoosi, omweene naabiseenakira.

¹⁶ Mani sakira lehe omuundu yeesi alehe ohubaheengera omusaango hulw'ebidiira hu byohulya neende ebyohung'wa oba neende ohweema hu sidyaalo syoosi, oba hu mwoosi mudoto oba Sabbaato.

¹⁷ Bino byoosi n'esiiniha sy'ebiindu bicha ohwiicha sa; nae amahuluundu keene ka Kristo.

¹⁸ Lehe omuundu yeesi alehe ohubakwiisa, niyeemere hu hudaha ohwesangaasa omweene, neende ohwiinamira bamalaika, n'aheengereo ohuchiira huhuboneherwaanga, neende ohweniinia abula esifune, ohweema hu bibaaso bitaalimo ohwesimiirisa,

¹⁹ ataali ohwediira yeyomiisa hu Mutwe, okuliisa haandi okwambaania alala omubiri kwoosi, nikwehoonyera enyiingo chakwo, neende efwoonero chakwo, kuhula neende ehula yidahibwa neende Nasaae.

Ohufwa neende ohumenya neende Kristo

²⁰ Mu Kristo mwafwa eyiri emyooyo kyafwa kiri mu syaalo muno, lwasiina haandi osiimenyere koti omuundu w'esyaalo sino? Lwasiina oloonda amalako kaboola mbwe,

²¹ “Otadiiraanga hu sino,” “Otahombaangaho hu sino,” “Otegeeng'aangaho hu sino”?

²² (N'olomaloma hu biindu biwa-buwa nibyeehoonyerwa), ohweema hu mbaasa neende enjekesa ch'abaandu sa?

²³ Mubwadyeeri bweene, ebiindu koti bino, bifwaana koti eby'amakesi, mu humeeda omwooyo kw'ohuheera Nasaae, neende ohwefumia omweene, haandi neende ohunyaala omubiri, nae bibulamo obuhoonyi, mu hutuka obwekoombi bw'omubiri.