Abakayi 8 - EBBAIBBO EMBOOSI YA NASAAE

Ohuyiingirwa hw'Abamidia humaliirihayo

¹ Bulaanu abaandu ba Efuraimu beemao baboolera Gidioni bati, “Lwasiina ewe haba siwatulaangaho niwali n'ochia ohulwaania Abamidia? Lwasiina watuyira otyo?” Bekanyiirisa neende etima muno hu mboosi yino.

² Nae yaababoolera ati, “Ese esiindu si ndali niinyala ohuhola syali esidiidi muno n'okeraania neende bi eng'we mwahola mweesi. Kata sa ebiindu bihiramo obudiidi bi baandu ba Efuraimu eng'we mwahola, bihirira elalira eyale muno ebiindu bi nono yaange yoosi yahola.

³ Kata neende nibiri mbwe ohubitira mu bunyala bwa Nasaae, eng'we mwanyala ohwiita abaami babiri ab'Abamidia, aba Orebbu neende Sebbu. Naange siina syeene esihoongo si holere esihiraho hu esyo n'obikeraania?” Mani niyamala ohuboola atyo, etima lulu lyabawuchuluhaho, mani baakama ohunyoolera muno.

⁴ Nae esiha syeene esyo, Gidioni alala neende abasaacha bae bala emia chidatu (300) enaamba, bali nibamalire ohwiicha ohwoola hu Mwaalo kwa Yorodaani, haandi nibamalire ohukwaambuha. Bali nibajoong'ere muno, nae bali nibasyoongere sa hu basuku baabwe abo.

⁵ Niboola mu Sukoti, Gidioni yaboolera abasaacha bomu siko omwo ati, “Nimufukiriira, mu bereseho abasaacha baange bano emigaati balyeeho. Bajoong'ere muno, nae ese syongere sa hu Sebba neende Salimuuna, abatuki ba Abamidia.”

⁶ Nae abeemirisi ba Sukoti baboola bati, “Siina syeene esikera efwe hwaaberesa eye lyao esyohulya syoosi? Ewe mbao kata otaanyalaho ohuwaambaho Sebba neende Salimuuna kata nabudiidi.”

⁷ Gidioni nae yabakobolamo ati, “Byoosi bilai sa! Mani Omwaami nanamala ohuumberesa Sebba neende Salimuuna boombi mu mahono kaange, njia ohukobola ano mani mbaalise mbahubbe embooko haandi mbanaale esaala ch'amawa neende amakaha ebitula mu syaalo sy'esiparara esyo!”

⁸ Gidioni yemeeda ohuchia mu moni ohwoola lu yoola mu Penueli haandi yaasaba atyo abaandu b'ebweene eyo, nae haandi abaandu ba Penueli abo bosi baakobolamo sa koti lu baandu ba Sukooti bosi bakobolamo.

⁹ Mani haandi yesi yaabakobolamo n'aboola ati, “Ese manyire endi njia ohunyala ohukobola ni ndi omulamu abweene, mani niinjia ohuhola endyo, njia ohulikula omunara kweeng'we kuno kuweere aasi!”

¹⁰ Hane, Sebba neende Salimuuna bali nibali mu Karikoori alala neende amaye kaabwe. Hu ye ly'abaandu bomu siparara lyoosi, abasaacha elifu ehumi neende chitaanu (15,000) boong'ene nibo abali nibadoong'ereo abalamu; abanamaye elifu emia ndala neende amahumi kabiri (120,000), bali nibamalire ohwiitwa.

¹¹ Gidioni bulaanu yaloondera hu ngira yiri hu ndulo w'esyaalo sy'esiparara, ebukwe wa Nobba neende Yogibbeeha, mani yaseeta eye elyo lyoosi alala masiindusa.

¹² Abatuki babiri bala ab'Abamidia, Sebba neende Salimuuna, beecha baanyala ohwiiruha bawaao, nae kata katyo Gidioni yabaloondaho sa, ohwoola lu yabakaana mani yabaamba, yaakera eye elyo lyoosi lyakwaamo oluteengo.

¹³ Gidioni niyali naakobola naatula mu biita, naabitira hu ngira ya Obubitiro bwa Hereesi,

¹⁴ haandi yaamba omwaana muraaga ohutula mu Sukooti, mani yamwiihasa aasi yachaaka ohumuhemeresa. Omusyaani muraaga oyo nae yaandiikira sa Gidioni ameeta amahumi kataanu-na-kabiri neende kataanu-na-kabiri ak'abasaacha bahunuufu abali nibamenya mu Sukooti.

¹⁵ Mani Gidioni yeemao yaachia eyiri abasaacha ba Sukooti, yaboola ati, “Mani eng'we mwiichulisa bulai bweene koti lu mwahaya ohuhoonyaho? Mwaboola muti mbwe eng'we haba simunyala mwaaberesa abasaacha baange bali nibajoong'ere muno ebyohulya baalya, mbwe olwohuba ndali nitaanyala ohuwaamba Sebba neende Salimuuna. Eee, mbano bulaanu bali ano!”

¹⁶ Yatusayo esaala ch'amawa neende amakaha ohutula mu syaalo sy'esiparara esyo, mani n'achaaka ohuchehoonyera ohusaandya abeemirisi ba Sukooti.

¹⁷ Haandi yaalikula omunara kwali mu Penueli kwosi kwaweera aasi, mani yaamala yeeta abasaacha bomu siko omwo boosi.

¹⁸ Bulaanu haandi, Gidioni yeemao yaateeba Sebba neende Salimuuna ati, “Abasaacha ba mweetera mu Taboori bali yeena?” Nabo bamukobolamo bati, “Bali sa nibafwaanana neende ewe, buli otula hu nibo yali ni yanyirira koti omwaana w'omutuki.”

¹⁹ Gidioni nae yaboola ati, “Ngandi abo boosi bali bamwaanama, abaana ba maama mweene. Mani ndi ohweeyama endi, muba nimutabeeta, ese syeesi haba siimba niinjia ohubeeta daawe.”

²⁰ Bulaanu yaboolera Yeteeri, omwaana wae muhuluundu ati, “Ewe, chia mu moni, mubeete-bwiita!” Nae omwaana wae oyo yaahaya ohusoolayo olugaanga lwae. Yakanaakana hoomo, olwohuba yali n'asisiiri omwaana muyeere sa.

²¹ Sebba neende Salimuuna abeene baboolera Gidioni bati, “Ewe omweene yicha sa, ewe omweene niiwe oba otwiite sa. Sibukulaanga omuundu musaacha ohuhola omulimo kw'esisaacha.” Gidioni yabeeta, yaamala yaabukula ebyesyaayo byali nibyasyaaywa mu makosi k'engamia chaabwe.

²² Esyo nisyawa sityo, Abaisiraeli baboolera Gidioni bati, “Ngandi ewe niiwe oba obe omutuki weefwe, ewe alala neende abeechuhulu bao abaliicha enyuma wao. Olwohuba onyalire ohutuwonia Abamidia.”

²³ Gidioni nae yaabakobolamo ati, “Ese haba siniise ochia ohuba omutuki weeng'we daawe, kata sa omwaana waange yeesi. Omwaami niye ochia ohuba omutuki weeng'we yeeng'ene.”

²⁴ Haandi yemeeda ohulomaloma n'aboola ati, “Eng'we muleheho mbeteebeho esiindu silala syoong'ene.” Buli mulala hweeng'we yamberese ebitaadi bi yabukula. (Abamidia bano, koti sa abaandu b'esiparara baandi, befwaalaanga ebitaadi by'esaabbu.)

²⁵ Nae abaandu abo bamukobolamo bati, “Efwe huchia ohusangaala muno ohubihuberesa ngandi.” Beecha babaambula engubo, mani buli muundu yeesi yatechaanga hu bweene ohwo ebitaadi bi yalichiingi n'abukuule.

²⁶ Mani ebitaadi by'esaabbu bi Gidioni yanyoola byali nibiri neende obusito buhira ekiloguraamu amahumi kabiri, nae haandi bino byali n'otateereho ebyesyaayo biindi koti ebyomu makosi, ebyomu mahono, engubo chifwaana koti sambaraao chi batuki ba Midia befwaalaanga, kata neende n'otateereho ebyomu makosi k'engamia chaabwe.

²⁷ Gidioni yahola esiloongaloongwe sy'esaabbu, mani naasita mu Ofura, esiko syae syeengo. Abaisiraeli boosi beeruha Nasaae mani bachia beenamira esiloongaloongwe esyo. Esiholwa sino syeemao hane syaaba sa koti olukiriikiri lwa Gidioni neende ab'enyuumba yae boosi.

²⁸ Midia syayiingirwa neende Abaisiraeli mani syaakama ohubeechaanga esitiisa-tiisa Yisiraeli haandi. Esyaalo syeemao bulaanu syabaamo omuleembe ohumala emyaaka amahumi kane amalaamba, ohwoola lu Gidioni yoola yaafwa.

Ohufwa hwa Gidioni

²⁹ Bulaanu, Gidioni yeemao yaakobola engo wae, mani yaamenya ebweene eyo.

³⁰ Yali neende abasyaani amahumi kataanu-na-kabiri, olwohuba yali neende abahasi baangi muno.

³¹ Haandi yali neende omuhasi w'erwaanyi wuundi owali niyamenya mu Sekemu; owamwiibulira omwaana, yi yaakuliha ati Abbimeleki.

³² Gidioni wuno, omwaana wa Yoasi yaafwa naali neende emyaaka miingi muno eky'obuhuluundu, mani yasiihwa mu ng'ani ya Yoasi laatang'ene, mu Ofura, esiko sy'enono ya Abbieseeri.

³³ Haandi luunyuma lw'ohufwa hwa Gidioni, abaandu ba Yisiraeli beemao baahaya ohweesikaanga Nasaae, mani haandi bachaaka ohwiinamiraanga ba Bbaali. Boola ohweholera Bbaali w'Endagaano ohuba nasaae waabwe,

³⁴ mani baalehera elalira ohuhalaabaniraanga Omwaami wali Nasaae wabwe, owali ni yabawonia abasuku baangi muno boosi, abali nibabebodoohania.

³⁵ Kata haba si basiimaho kata nabudiidi edaala lya Gidioni, hulw'ebiindu bilai byoosi bi yali niyaholera Yisiraeli.