Abakayi 2 - EBBAIBBO EMBOOSI YA NASAAE

Malaika w'Omwaami owali mu Bbochimu

¹ Malaika w'Omwaami yeemao yaatula Giligaali mani yaachia mu Bbochimu n'aboola Abaisiraeli ati, “Ese ndabatusa mu Misiri mani ndaabaleeta mu syaalo si ndasuubisa bakuuka yeeng'we. Ese mweene ndaboola endi, ‘Siinjia huhalaka endagaano yaange naang'we.

² Haandi endi eng'we haba simuhoyere ohuchia mwaaholaho endagaano yiindi neende abaandu bamenya mu syaalo sino. Endi eng'we haandi muhoyere ohuchia mani mwaakwiisa alutaari chaabwe choosi.’ Nae eng'we haba simwaholaho kata nabudiidi esiindu syoosi sindababoola ohuhola daawe. Eng'we naang'we mwahola sa biitadaha muhole!

³ Mani sakira bulaanu ese mbaboolera endi, haba siinjia haandi ohwiirusaanga abaandu bano nimunabeechaanga nimubayinduula daawe. Bachia sa ohuba abasuku beeng'we, haandi eng'we niing'we abachia ohuteemwaanga neende ohwiinamiraanga banasaae baabwe.”

⁴ Mani malaika niyamala ohuboola bino, abaandu ba Yisiraeli boosi batuunduha sa ohulira,

⁵ mani sakira abuundu ao alaangwa Bbochimu. Ebweene eyo niyo yibayaanira ebiyaanwa eyiri Omwaami.

Ohufwa hwa Yosua

⁶ Bulaanu Yosua yeemao yaseebula abaandu ba Yisiraeli boosi beweerao, mani buli muundu yechiira ohwebukulira buli mukabo kw'eloba kwalichiingi okwae.

⁷ Yosua niyali nasisiiriwo omulamu, abaandu ba Yisiraeli bahalaabaniraanga sa Omwaami, haandi kata neende luunyuma lwae ohufwa, bemeeda sa ohuholaanga batyo abeemirisi balichiingi nibasisiiriwo abalamu abali nibeeboneraho neende emoni chaabwe abeene ebiindu bihunuufu bi Omwaami yali niyaholeraanga Yisiraeli.

⁸ Yosua, omuhalaabani w'Omwaami, haandi omwaana wa Nuuni yeemao yaafwa naali neende obuhuluundu bw'emyaaka emia ndala neende ehumi (110).

⁹ Yasiihwa mu situundu sy'eloba syae mu Timunaati Seera mu syaalo sy'ebigulu-gulu esya Efuraimu, emukulu wa Lugulu lwa Gaasi.

¹⁰ Olwiibulo olwo lwoosi lweecha lwaafwa lwaawa, mani olwiibulo lwaloondaho nalwo lweecha lweebirira Omwaami, haandi ebiindu byoosi bi yali niyaholera Yisiraeli.

Yisiraeli yaakama ohwiinamiraanga Omwaami

¹¹ Ao olwoola, abaandu ba Yisiraeli beemao bachaaka ohwonoonaanga eyiri Omwaami, nibachaaka ohuhalaabaniraanga ba Bbaali.

¹² Baakamira elalira ohwiinamiraanga Omwaami, Nasaae owa bakuuka yaabwe, Nasaae owabatusa mu Misiri, nae bachaaka ohwiinamiraanga banasaae baandi, banasaae b'abaandu bali nibabebodoohaanie. Babakwiiraanga aasi, mani banyoolesa Omwaami.

¹³ Baakamira elalira ohwiinamiraanga Omwaami, mani bachaaka ohuhalaabaniraanga ba Bbaali neende ba Asitarooti.

¹⁴ Mani sakira Omwaami yeemao yaaba omwaalaba eyiri Abaisiraeli, mani yaaleha abapeeyi babasetaanga haandi nibabanyaka. Yaleha abasuku boosi abali nibabebodoohania, baanyala ohubayiingira, mani Abaisiraeli boola ohuhayirwa elalira engeri y'ohweliindiramo.

¹⁵ Buli siha balichiingi sa bulaanu nga bakwa mu biita, olwohuba Omwaami yali niyabatulaho, koti sa lu yali niyaboola hale ati aba achia ohuhola. Beecha boola mu sibeera sihoongo muno.

¹⁶ Mani sakira bulaanu Omwaami yeecha yaaberesaanga Abaisiraeli abeemirisi abanyala ohubawoniaanga ohutula hu bapeeyi.

¹⁷ Nae Abaisiraeli haba sibanyala kata ohufwaayo hu beemirisi baabwe abo daawe. Yisiraeli yali niyimalire ohweholera elalira eyiteesikiha eyiri Omwaami, niyinamiraanga bulaanu banasaae baandi sa. Bakuuka yaabwe bali nibeesa oluyaali mu bilagiro by'Omwaami, nae olwiibulo luyaaha luno, lwaleha bwaangu muno ohuholaanga lutyo.

¹⁸ Mani buli lu Omwaami yaberesaanga Abaisiraeli omwiimirisi, Omwaami yateemaangaho muno ohubona ati ahoonya omwiimirisi oyo mani yanyalaanga ohuwoniaanga abaandu abo ohutula hu basuku baabwe, esiha esyo syoosi si mwiimirisi oyo aba nasisiiriwo naali omulamu. Omwaami yabonaanga ati abakwiira esisa olwohuba balichiingi nibeesisiiha nibali mu husaanda hwaabwe neende ohwiihalwaho hwaabwe.

¹⁹ Nae omwiimirisi niyafwichaanga, abaandu beekoboleraangayo sa mu ngira chaabwe ehale chira, mani nibeyira bubi ohuhiraho olwiibulo luba nilwabita. Bahalaabaniraanga, haandi nibeenamiraanga banasaae baandi, haandi nibemeeda sa neende esyeejo mu ngira chaabwe embi echo.

²⁰ Mani Omwaami yeechaanga anyoolerera muno Yisiraeli mani aboola ati, “Ngandi mbano olwiibulo luno lwoosi lumalire ohuhalaka endagaano yi ndali nindalagira bakuuka yaabwe ohwooseresaanga. Mani koti lu bahaire ohuumbulira,

²¹ siinjia hwemeeda ohwiirusaanga omusuku waabwe yeesi, owali niyadoong'a mu syaalo omwo ohwoola koti Yosua yoola ohufwa.

²² Njia ohwehoonyeraanga abeene bano ohumanya Abaisiraeli bano nikali mbwe bananyalaanga ohuloondakana neende engira chaange koti bakuuka yaabwe baholaanga, oba haba daawe.”

²³ Mani sakira Omwaami yeemao yaaleha enono chiindi chino chosi chaadoong'a mu syaalo sy'abaandu ba Yisiraeli sino; Haba siyahoonya Yosua yaanyala ohubayiingira daawe, haandi kata siyabeerusa baatulayo bwaangu luunyuma lw'ohufwa hwa Yosua.