Abaibburania 7 - EBBAIBBO EMBOOSI YA NASAAE

Omulaamisi Melikisedeki

¹ Melikisedeki wuno, yali omutuki wa Salemu, haandi omulaamisi wa Nasaae w'Aakulu Muno. Koti lu Abburahamu yali n'atula mu biita bi yeeteramo abatuki bane, Melikisedeki yabukaanana nae mani yamuberesa ehabi.

² Mani Abburahamu yeecha yaamuberesa esituundu silala hu buli bituundu ehumi ebyabuli siindu si yali ayaayire mu hulwaana eye elyo. (Amahuluundu kataangira ak'eliita Melikisedeki niko, “Omutuki w'Obuluungifu”; haandi koti luyali omutuki wa Salemu, amahuluundu k'eliita lyae haandi niko, “Omutuki w'Omuleembe.”)

³ Ebimulomalomwaho, haba sibituumbula ebidiira hu laatang'ene oba ng'ina, oba hu bakuukaang'ene boosi; oba ebidiira hu hwiibulwa hwae oba hu hufwa hwae. Melikisedeki afwaana koti Omwaana wa Nasaae; mani adoong'a naali omulaamisi endaalo choosi.

⁴ Boneho koti lu yanyoola oluyaali! Abburahamu kuuka yeefwe mumanyirifu, yesi yamuberesa esituundu silala hu bituundu ehumi sya buli siindu si yali n'ayaayire mu biita.

⁵ Olwohuba amalako kafukiirira abeechuhulu ba Leefi abali abalaamisi ohusolosa esituundu silala hu bituundu ehumi esya buli siindu ohutula eyiri abaandu ba Yisiraeli. Sino syeekesa siti, esituundu esyo sisoloswa ohutula hu baandu baabwe beene, kata neende bahaba nibali abeechuhulu ba Abburahamu.

⁶ Melikisedeki wuno haba siyali ow'olwiibulo lw'enono ya Leefi, nae yasolosa esituundu silala sy'ebituundu ehumi ohutula hu Abburahamu, haandi yaamuberesa ehabi koti omuundu naali neende esisuubise sya Nasaae.

⁷ Ataali ohukana-kana hwoosi, omuundu oberesa ehabi w'oluyaali ohuhira omuundu yaaberesa ehabi chae.

⁸ Nae ebidiira hu balaamisi, esituundu silala hu bituundu ehumi sisoloswaanga neende abaandu bafwa; nae ebidiira hu Melikisedeki, esituundu silala hu bituundu ehumi, syasoloswa neende omuundu mulamu, koti lu byandiiko byoolerefu biboola.

⁹ Haandi hunyala ohuboola huti Abburahamu yatuunga esituundu silala hu bituundu ehumi, ohweekesa ati Leefi (yi beechuhulu baasolosa esituundu silala hu bituundu ehumi) yesi yasituunga ohubitira mu mahono ka Abburahamu.

¹⁰ Olwohuba Leefi yali n'asisiiri ohwiibulwa, nae yali n'asisiiri mu Abburahamu kuukaang'ene lu Melikisedeki yabukaanana neende Abburahamu.

¹¹ Ohweema hu mulimo kwa Abaleefi kw'obulaamisi, nimwo omwatula amalako akaberesebwa abaandu ba Yisiraeli. Bulaanu, emirimo ch'Abaleefi chiba nichali emilai, lwasiina haandi abalaamisi baandi abafwaana koti Melikisedeki badahibwa, ataali bafwaana koti Arooni?

¹² Olwohuba niyibaao ohukaluuhana mu malako k'abalaamisi, ao wosi yiba yiruwo engaluuhana mu malako ka Musa mwosi.

¹³ Haandi Omwaami weefwe, yi biindu bino bilomalomaho, yali ow'enono yiindi, haandi abula omuundu wuundi yeesi ow'enono yae owali ahalaabaneho koti omulaamisi.

¹⁴ Olwohuba simanyihaane bulai bweene siti, Omwaami weefwe yali ow'enono ya Yuda, haandi Musa haba siyatuumbulaho hu nono yino n'alomaloma hu balaamisi.

Omulaamisi wuundi oli koti Melikisedeki

¹⁵ Emboosi yino yemeeda ohubonehera elalira alafu; olwohuba omulaamisi wuundi yabonehana oli koti Melikisedeki.

¹⁶ Haba siyaholebwa omulaamisi ohweema hu malako k'abaandu; nae yeehola omulaamisi, ohweema hu maani k'omuundu oli neende obulamu butaakama.

¹⁷ Olwohuba ebyandiiko byoolerefu biboola biti, “Ochia ohuba omulaamisi endaalo choosi, oli koti Melikisedeki.”

¹⁸ Sakira elako hale lisudisibwa endulo, olwohuba lyali ekata haandi elibulamo obuhoonyi.

¹⁹ Olwohuba amalako ka Musa kali nikatanyala ohuhola esiindu syoosi ohuba esyoolerefu. Nae bulaanu, esuubi lihira obulai lileeterweo li hubitiramo hwoola aambi neende Nasaae.

²⁰ Nae sino haba sisyaholehana ataali esyeyamo sya Nasaae. Hale esyeyamo siti haba sisyabechaangao abaandu nibehaswaanga ohuba abalaamisi.

²¹ Nae Yesu yeehaswa ohuba omulaamisi ohweema hu syeyamo koti lu Nasaae yamuboolera ati, “Omwaami yeyamire esyeyamo mani haba saachia hukaluuhania ebibaaso byae: ‘Oli omulaamisi endaalo choosi.’”

²² Mani sakira ohwechuba ohwo hwahola Yesu yaaba esyomiiso syomiisa endagaano ndai yihira ehale.

²³ Haandi aliwo engabuhana yiindi: abalaamisi baandi abo bali abaangi, olwohuba bali nibafwa, mani sibanyala ohwemeeda neende omulimo kwaabwe okwo.

²⁴ Nae koti Yesu ali omulamu endaalo choosi, omulimo kwae koti omulaamisi, sikunyala hudiiswa omuundu wuundi koti omusiha.

²⁵ Sakira Yesu anyala ohuwonisira elalira baandu bachia eyiri Nasaae nibamubitiramo, olwohuba aliwo omulamu endaalo choosi ohubalaamira eyiri Nasaae endaalo choosi.

²⁶ Yesu niye Omulaamisi Muhuluundu onyala ohutuhoonya mu buli siindu si hudaha. Olwohuba mwoolerefu niye, haandi abulaho esisobyo syoosi, oba esyonoono syoosi; mwoolerefu haandi yaawulibwa ohutula hu bahola-mbi, mani yakiingwa yaaninisibwa aakulu ohubita ekulu.

²⁷ Haba saali koti abalaamisi bahuluundu baandi; haba saadahibwa ohuwaana ebiyaanwa buli ludaalo hulw'ebyonoono byae omweene, neende ohuwaana ebiyaanwa hulw'ebyonoono by'abaandu baandi bosi. Yawaanira elalira esiyaanwa silala syoong'ene, koti lu mweene yeweerayo koti esiyaanwa.

²⁸ Amalako ka Musa kahola omuundu otaali omwoolerefu ohuba omulaamisi muhuluundu; nae esisuubise sya Nasaae si yahola niyeeyama, esyeechao luunyuma lw'Amalako, sihola Omwaana wa Nasaae mweene, owaholwa ohuba omwoolerefu w'elalira endaalo choosi.