Abaibburania 5 - EBBAIBBO EMBOOSI YA NASAAE

¹ Buli mulaamisi muhuluundu adoolebwaanga ohutula mu baandu baasye, mani atumibwa ohuhalaabanira Nasaae hulwaabwe, ohukabula ebirabo alala neende ebiyaanwayo by'ebyonoono.

² Koti lu mweene oyo aba naali omukata mu ngira nyiingi, anyala ohuba omuloonga eyiri abo ababa nibataamanyire esy'ohuhola mani abahola ebyonoono ebiingi.

³ Haandi koti lu mweene ali omukata, omweene yesi ahoyere ohuwaayo ebiyaanwa, ataali hulw'ebyonoono by'abaandu byoong'ene, nae neende hulw'ebyonoono byae byeene.

⁴ Abulao omuundu wedoolera omweene oluyaali lw'ohuba omulaamisi muhuluundu. Nae hulaanga hwa Nasaae nihwo ohukera omuundu naaholebwa ohuba omulaamisi muhuluundu koti lu Arooni yali.

⁵ Mu ngeri nasilala eyo, Kristo mweene haba siyetaaho oluyaali lw'ohuba omulaamisi muhuluundu. Ohutusaho, Nasaae yamuboolera ati, “Oli Omwaana waange; enyaanga yino hwibuule.”

⁶ Omweene oyo haandi abuundu wandi yaboola ati, “Ochia ohuba omulaamisi endaalo choosi, mu ngeri y'obulaamisi bwa Melikisedeki.”

⁷ Yesu mu bulamu bwae naali hu syaalo, yalaamanga Nasaae, haandi niyekweeda niyehuuma mu kono hoongo, haandi n'alira amasika maangi, Nasaae wali n'achia ohumuwonia ohufwa. Olwohuba yali omuloonga haandi omufukiiriri muhuluundu, Nasaae yamuwuliraanga.

⁸ Kata neende niyali Omwaana wa Nasaae, yeekera mu husaanda hwae ohuba omuwulisi.

⁹ Mani niyaholwa ohuba omuluungifu, yeecha yaaba otulaho obuwonia butaakama eyiri abo boosi abamufukiiriramo.

¹⁰ Haandi Nasaae yamulaangirira ohuba niye omulaamisi muhuluundu, mu ngeri y'obulaamisi bwa Melikisedeki.

Ohulabula hudiira hu huleha efukiirira

¹¹ Huli neende ebiindu biingi bi huhoyere ohulomaloma ebidiira hu siindu sino, nae bidinyu muno ohubibanyonyola koti lu muli abakata mu humanyirisa.

¹² Ebiha bibeereo ebimala ohukera mwaaba nimwamala hale ohweehola abeekesa nae kata katyo, eng'we musiidaha abeeo omuundu wuundu obeekesa amasomo kataangira keene ak'emboosi ya Nasaae. Ataali ohuba nimulya ebyohulya byoomeranu, eng'we musisiiri sa nimuhoyera ohung'wa amabeere.

Ohusuubisa hwadyeeri

¹³ Buli muundu yeesi oba nasiihoyera ohung'wa sa amabeere koong'ene aba asisiiri omudoto, otaaliho neende obumanyirifu bwoosi mu siindu sidiira hu humanya esiindu sihoyera, oba esiindu sitahoyera.

¹⁴ Eby'ohulya byoomeranu, hu lwaande luundi, bihoyera abaandu bahuluundu, ohubitira mu hweholeraanga abeene, boola baanyala ohumanya ohukabuhania akatikaati w'esiindu silai, neende esiindu sibi.