Abaibburania 11 - EBBAIBBO EMBOOSI YA NASAAE

Efukiirira

¹ Bulaanu, ohuba neende efukiirira nihwo ohwekesera elalira huti, huchia ohunyoola ebiindu bi husuubira, ohwomiisira elalira huti huchia ohunyoola ebiindu bi hutabona.

² Ohufukiirira hw'abaandu ba hale nihwo okwakera Nasaae yabasiima.

³ Efukiirira niyo eyikera hwamanya huti Nasaae niye owaloonga ekulu neende esyaalo niyehoonyera emboosi yae, sakira ebiindu biboneha byaloongwa ohutula mu biindu bitaboneha.

⁴ Efukiirira niyo eyakera Abbeli yayaanira Nasaae esiyaanwa silai muno ohuhira esya Kaini. Efukiirira ya Abbeli niyo eyakera Nasaae yamusiima koti omuundu muluungifu, olwohuba Nasaae mweene yasiima ebiyaanwa byae. Haandi efukiirira niyo eyikera Abbeli yaaba n'asilomaloma, kata neende ayahaba niyamala ohufwa.

⁵ Efukiirira niyo eyakera Enoka yaahaya ohufwa. Ohutusaho yayiribwa Muukulu eyiri Nasaae, haandi abulao omuundu yeesi owanyala ohumunyoola olwohuba Nasaae yali amalire ohumuyira. Ebyandiiko byoolerefu biboola biti, Enoka n'asisiiri ohuyirwa Muukulu, yali amalire ohusangaasa Nasaae.

⁶ Abulao omuundu yeesi onyala ohusangaasa Nasaae ataali efukiirira. Olwohuba omuundu wiicha eyiri Nasaae ahoyere ohuba n'afukiirira ati Nasaae aliwo, haandi achia ohuberesa buli muundu omukoonya omutuungo.

⁷ Efukiirira niyo eyakera Nowa yaawulira ohulabula hwa Nasaae ohudiira hu biindu byali nibichia ohukwaao. Efukiirira yakera Nowa yaawulira Nasaae mani yoombaha elyaato li yawoneramo alala neende abaandu bomu daala lyae. Esyatulamo, esyaalo syaheengerwa omusaango, nae Nowa yanyoola obuluungifu ohutula eyiri Nasaae obutula mu fukiirira.

⁸ Efukiirira niyo eyakera Abburahamu yaawulira Nasaae niyali n'amulaanga ohutula mu syaalo syae, ohuchia mu syaalo si yali nasubiise ohumuberesa. Abburahamu yaleha esyaalo syae syeene n'atamanyireho yi yali n'achia.

⁹ Efukiirira yae niyo eyakera yaamenya koti omuteende mu syaalo si Nasaae yali yamusuubisa. Yamenyaanga mu yeema koti Yisaka neende Yakobbo baholaanga, bosi abanyoola esisuubise nasilala ohutula eyiri Nasaae.

¹⁰ Olwohuba Abburahamu yali n'aliindiriire esiko si Nasaae yatekeha, haandi yoombaha; esiko syoombahwa hu misiingi chiyiindira.

¹¹ Efukiirira niyo eyakera Abburahamu yehola laatang'ene baandu kata neende niyali nabitiriire mu myaka, haandi Saara yesi yali n'abitire emyaaka ch'ohwiibula.

¹² Kata neende Abburahamu yali naali koti omuundu wamala ohufwa, nae ohutula mu muundu mulala wuno, abaana abaangi beebulwa abali koti eng'ining'ini cho Muukulu, oba koti omusenye kwohu nyaanja.

¹³ Abaandu bano boosi bafwiira mu fukiirira. Haba sibanyoola ebiindu bi Nasaae yali yasuubisa, nae bali nibabibonera eyale muno mani babyakaanira, mani bomiisira elalira bati, bali Abateende sa haandi abeyikami sa hu syaalo.

¹⁴ Abaandu balomaloma ebiindu by'engeri yino, beekesera elalira koti bali ohukoonya esyaalo syeene.

¹⁵ Haba sibabasaanga hu syaalo sibali nibaleha; baba nibahola batyo, bahanyoolere obweyaango bw'ohukobolayo.

¹⁶ Ohutusaho, bali nibekoomba esyaalo silai sihirao; esyo nisyo esyaalo syo Muukulu.

¹⁷ Efukiirira niyo eyakera Abburahamu, Nasaae niyali namuteema, yawaayo Yisaka omwaana wae, koti esiyaanwa. Abburahamu niye yi Nasaae yahola nae esisuubise, nae yafukiirira kata ohuwaayo omwaana wae koti esiyaanwa.

¹⁸ Nasaae yali kata n'amuboolere ati, “Ochia ohunyoola abeechuhulu ba ndahulaka ohubitira mu Yisaka.”

¹⁹ Abburahamu yamanya ati, Nasaae anyala ohusyuuhisa abaandu ohutula mu hufwa, sakira ohulomaloma hw'engeri yino huli koti, Abburahamu yaakaanira Yisaka ohutula mu bafu.

²⁰ Efukiirira niyo eyakera Yisaka yasuubisa Yakobbo neende Esau ehabi mu bulamu bwaabwe bw'omuumoni.

²¹ Efukiirira niyo eyakera Yakobbo yaaberesa abaana ba Yosefu ehabi n'asisiiri ohufwa. Yaguunama hu mudiiro kwae mani yeenamira Nasaae.

²² Efukiirira niyo eyakera Yosefu naali aambi ohufwa yaalomaloma hu hutula hwa Abaisiraeli mu syaalo sy'e Misiri, mani yaaleha amakerako kadiira hu biindu bi bahoyere ohuhola hu mubiri kwae n'afwiire.

²³ Efukiirira niyo eyakera abeebusi ba Musa, baamukisa embaka y'emyoosi kidatu n'amalire ohwiibulwa, olwohuba abeebusi bae bali babweene bati omwaana wuno yali aboneha bulai, mani haba sibatya ohuhaya ohuwulira amalako k'omutuki.

²⁴ Efukiirira niyo eyakera Musa niyali naahulire, yakaana ohulaangwa omwaana w'omuhaana wa omutuki wa Misiri.

²⁵ Musa yasiima ohusaandira alala neende abaandu ba Nasaae, ohuhira ohwesangaasira mu syonoono hulw'embaka ndiidi.

²⁶ Musa yamanya ati, ohusaanda naanyekwa hulwa Kristo hwali huhirira elalira eyale obuyiinda bw'Emisiri, olwohuba yali n'amanyire omutuungo kwaachia ohunyoola mu moni.

²⁷ Efukiirira niyo eyakera yaatula mu Misiri, n'atatiireho etima lya omutuki wa Misiri. Yesimiirisa koti oli ohubona Nasaae otabonehana, mani yaahaya ohukobola enyuma.

²⁸ Efukiirira niyo eyakera Musa yataao esidyaalo sya Paasaka, haandi yaalagira ati, amabaanga kabahibwe hu njiki, hu malaika w'ohufwa ahaye ohwiita abaana ba Abaisiraeli baamberi.

²⁹ Efukiirira niyo eyakera Abaisiraeli baambuha Enyaanja Njahanyu koti abali ohukeenda hu loba lyoomu. Nae Abamisiri nibateemaho ohuhola batyo, basihama baafwa.

³⁰ Efukiirira niyo eyakera ebida bya Yeriko byaakwa aasi Abaisiraeli nibamala ohukeenda nibabyebodoohania ohumala endaalo chitaanu-na-chibiri.

³¹ Efukiirira niyo eyakera Rahabbu omucheke wekusa omweene, yaahaya ohwiitwa neende abo abali nibahaya ohuwulira Nasaae, olwohuba yakaanira bulai Abaisiraeli bahemeresi.

³² Bulaanu ndemeede haandi ohuboola siina? Obweyaango haba sibuunganya ohulomaloma hu Gidioni, Bbaraki, Samusoni, Yefuta, Daudi, Samueli neende hu banabbi.

³³ Olw'ohufukiirira bano balwaana bayiingira obutuki butaali nasilala. Bahola esiindu sihoyera mani banyoola si Nasaae yabasuubisa. Kata beekala eminwa ch'edalang'i.

³⁴ Basimia omuliro kwaaduha neende amaani, baona ohwiitwa neende engaanga. Bali abakata, nae beehola ab'amaani. Beehola ab'amaani mu biita mani bayiingira amaye k'Abateende.

³⁵ Efukiirira niyo eyakera abahasi baabeereswa abeeho baabwe nibasyuuhire ohutula mu hufwa. Abaandi basaandisibwa nae baahaya kata ohutula mu muleembe, nae baafwa obuchuuni, hu banyala ohusyuuha mu bulamu bulai buhirao.

³⁶ Abaandi baandi banyekwa, baahuwa, haandi abaandi baabowa neende eminyororo baasukunibwa mu jeela.

³⁷ Bahubbwa neende amakina, baatwamo akatikaati ebituundu bibiri neende emisumeeno, beetwa neende engaanga. Bakeendaanga nibefwaalire amaseero k'amakoondi neende embusi, nibataaliho neende esiindu syoosi, nibasaandisibwa, nibayirwa bubi.

³⁸ Esyaalo haba sisyali nisibahoyera elalira! Bayikaanaanga mu siparara neende mu ngulu, bamenyaanga mu ng'ungu neende mu meena kali mu loba.

³⁹ Bano boosi Nasaae yabasiima hulw'efukiirira yaabwe! Kata boosi bahaba nibatanyoola esiindu si Nasaae yabasuubisa,

⁴⁰ olwohuba Nasaae yali niyatutekehera esiindu silai esihirao. Esichiiririrwa syae syali mbwe bosi beeholere aboolerefu elalira alala naafwe.