2 Samueli 4 - EBBAIBBO EMBOOSI YA NASAAE

Yisibboseti yeetwa

¹ Yisibboseti omwaana wa Saulo niyawulira ati hane Abbuneeri yali niyeteerwe mu Hebburoni, yatya muno, mani abaandu boosi ba Yisiraeli besiinduha muno.

² Yisibboseti yali naali neende abahoongo babiri abali nibali abeemirisi b'emikaanda mipeeyi, mbwe Bbaana neende Rekabbu, abaana ba Rimoni, ohutula Bberooti mu nono ya Bbenjamini. (Bberooti sibalwaanga koti esituundu siindi sya Bbenjamini.

³ Abaandu bali nibataangira ohusimenyamo bali nibeeruha nibamala ohuchia mu Gitaimu, yi bamenya ohutula hale muno ohwoola bulaanu buti.)

⁴ Omwiichuhulu wuundi wa Saulo yali omwaana wa Yonatani olaangwa mbwe Mefibboseti, owali naali emyaaka kitaanu Saulo neende Yonatani nibeetwa. Amakeni kadiira hu hufwa hwaabwe nikatula mu siko sihuluundu sya Yesireeli, omulesi wae yamubukula mani yeeruha nae yaakotakotana; nae kata katyo yali n'abbibbiirihana muno yamukwiisa aasi, mani yaalema.

⁵ Rekabbu neende Bbaana batula ohuchia ohukoonya enyuumba ya Yisibboseti, mani bayinyoola aambi esideete ng'alang'ala, omweene naali mu huwuluuha hw'akati-kaati w'esideete.

⁶ Omuhasi wali amwiingira yesi yali nawuluhaanga naali ohuserechaanga engaano, yali yesi n'ayiiritaanga, mani Rekabbu neende Bbaana banyala ohweeyiba beengira mu nyuumba bweene.

⁷ Nibali mukati, bachia mu siseenge sya Yisibboseti, yi yali n'afuruuta endoolo, mani baamwiita. Bamuheengaho omutwe, mani nibamala nibawaao nakwo, mani nibakeenda esiro syoosi ohuhalakania mu hooho Yorodaani.

⁸ Bayira omutwe okwo eyiri Omutuki Daudi mu Hebburoni mani nibamala nibamuboolera bati, “Omutwe kwa Yisibboseti, nguno kuli ano, omwaana wa Saulo omusuku wao, owateemaho ohuhwiita. Enyaanga yino yeene, Omwaami mbano ahunyaliire, Ow'Obunyala, ohwetuungira hu Saulo alala neende abeechuhulu bae.”

⁹ Nae Daudi yabakobola mu Rekabbu ati, “Ese ndeechubira Omwaami mulamu, owaamonia ohutula hu masira koosi akaakiire!

¹⁰ Wamwaanda waanjichaho ni ndi mu Sikilaagi mani yamboolera akadiira hu hufwa hwa Saulo yali naabaasa ati ali ohundeeteraanga emboosi ndai. Ese naange ndamukwaaho, mani ndaabona endi yeesi yeetwa. Okwo nikwo okwali omukabo kundamukaba hu lw'amakeni malai kae ako!

¹¹ Mani syahaaka yeena obubi eyiri abasaacha babi bakiire ano bati, abachia beeta omuundu otaaliho omusaango kwoosi oli mu ndoolo chae mu nyuumba wae bweene! Ese omweene bulaanu njia ohubeetuunga hulw'ohumwiita, haandi njia ohubasaangulira elalira ohubatusa hu syaalo huno!”

¹² Daudi yatusa omunwa, mani abasaacha balwaani bae nibachia nibeeta Rekaabbu alala neende Bbaana, mani nibamala nibabaheengaho amahono kaabwe koosi alala neende amakulu kaabwe koosi, mani nibakaaniha aakulu aambi neende ediba liri mu Hebburoni. Babukula omutwe kwa Yisibboseti, nibamala nibakusiiha muu ng'ani y'Abbuneeri ebweene eyo mu Hebburoni.