2 Ebyomubiha 9 - EBBAIBBO EMBOOSI YA NASAAE

Ohukeniya hw'omutuki muhasi wa Seebba

¹ Omutuki muhasi wa Seebba niyawulira hu bulai bw'Omutuki Solomooni, yasamula yaachia mu Yerusalemu ohumuhemaho n'amuteeba ebiteebo bidinyu. Yakiinga omukaanda muhoongo muno okw'abahalaabani bae, alala neende engamia echikiingire ebiluungiro, eby'ohwesyaaya, neende obuduhunyi bw'esaabbu. Mani niyabukaanana neende Solomooni, yateeba Solomooni ebiteebo byoosi bi yali naanyala ohwiichulisaho.

² Nae Solomooni yanyalirwa ohubikobolamo byoosi; yabulao esyo esyali esyoomeranu syamuhaya ohunyonyola.

³ Omutuki Muhasi wa Seebba wuno yawulira hu amakesi haandi yeeboneraho hu dooho li Solomooni yoombaha.

⁴ Yeboneraho hu eby'ohulya byakabulwaanga hu meesa yae, ebiseenge by'ohumenyamo eby'abahoongo bae, endekeha y'abahalaani bae bahola mu dooho, haandi neende ebyefwaalo bi befwaalaanga, ebyefwaalo by'abahalaabani bamuliindaanga mu siha sy'esidyaalo, haandi neende ebiyaanwa bi yiyaanaanga mu Nyuumba ya Nasaae. Byamuleha n'atiire haandi naweeremo omuya.

⁵ Yaboolera Omutuki Solomooni ati, “Ese ebiindu bi ndahuwuliraangaho ni ndi mu syaalo syaange neende amakesi kao hane ni ebyadyeeri byeene!

⁶ Ese haba sindali nindafukiirira ebyo bi bambooleraanga daawe, ohwoola omweene lu njichire mani ndaanyala ohweeboneraho. Ese hane haba sindali nindawuliraho kata ebyoola esituundu sy'amakesi kao daawe. Ewe oboneha oli omukesi muno ohuhiraho neende koti lu baandu babolaanga.

⁷ Abahuhalaabanira nga bali neende ehabi, abo abamenya mu moni wao, haandi bali neende ehabi y'ohuwuliraanga buli siha enomanoma chao ch'amakesi echio!

⁸ Omwaami afumisibwe, Nasaae wao oyo! Olwohuba amalire ohweekesa esangaalo lyae eyiri ewe koti lu yahuhola ohuba omutuki, ohutukaanga mu bweyaango bwae. Olwohuba yaheera Yisiraeli abaandu bae, haandi adaha ohubahalaabaniraanga endaalo choosi, yahuhola waaba omutuki waabwe hwoonyale ohunyala ohuliinda amalako neende obwadyeeri.”

⁹ Yamala yatuusa ebiyaanwa mu moni w'Omutuki Solomooni, bi yali n'akiingire koti: aambi etaani chitaanu ech'esaabbu neende obuduhunyi bw'ebiluungiro haandi neende ebyesyaaywa. Yitaaba hooyo ebiluungiro bilai bihiraho obunyirifu koti ebyo bi mutuki muhasi wa Seebba yaberesa Omutuki Solomooni.

¹⁰ (Abahalaabani b'Omutuki Hiramu neende ab'Omutuki Solomooni abaleeta esaabbu ohutula mu Ofiri haandi baleeta embaao cha yunipeeri neende ebbaangili byosi.

¹¹ Solomooni yehoonyera embaao echio ohwoombaha engaasi ch'Enyuumba ya Nasaae, neende edooho lyae, haandi neende ohuholeramo obuhana neende amaduungu eby'abeembi. Abulao esiindu siindi esifwaanaho koti ebyo ebyali nibyabonehanaho hale mu syaalo sya Yuda).

¹² Omutuki Solomooni nae yaberesa omutuki muhasi wa Seebba oyo buli siindu syoosi si yamusaba. Bino haandi byali nibiri ohwemeeda hu biindi bira bi yali n'amubereese ohukulaasaniamo neende ebiyaanwa bi yali namuleteere. Mani omutuki oyo alala neende abahalaabani bae bakobolayo engo waabwe mu syaalo sya Seebba.

Emyaandu ky'omutuki Solomooni

¹³ Buli mwaaka, Omutuki Solomooni yanyolaanga esaabbu yibita etaani amahumi kabiri-na-chidatu,

¹⁴ ohumeeda hu misolo kyatungwaanga neende abachurusi neende abeene bichuruswa. Abatuki b'Abaaraabbu, haandi neende bagafana ba disiturikiti cha Yisiraeli bosi bamuleeteraanga efeesa neende esaabbu.

¹⁵ Solomooni yahola engabo emaambali muno echoola emia chibiri, buli yitula niyaomwaho neende ekiloguraamu chitaanu-na-chibiri ech'esaabbu,

¹⁶ haandi neende echiindi endiidi emia chidatu, buli yitula niyaomwaho neende ekiloguraamu chidatu ech'esaabbu enjubbe. Choosi yachita mu nyuumba embiihiro y'Esichaha sya Lebbanooni.

¹⁷ Omutuki wuno haandi yaala esisaala sy'obutuki esihoongo muno. Olwaande luundi lwali nilwawomwaho neende eroonge, nae oludoong'ereo nilwaomwaho neende esaabbu ehaya.

¹⁸ Engaasi chisaasaba nichio echali nichiniina hu sisaala ohwo, haandi yaliwo esiteeni nisyeyambaaniaho, syosi nisyaomwaho neende esaabbu. Buli lwaande lw'esisaala esyo lwaliho amahono, haandi neende esifwaanani sy'edalang'i nisyeemere hu buli lwaande.

¹⁹ Ebifwaanani ehumi neende bibiri eby'edalang'i byali hu ngaasi, buli silala nisiri enamutwe wa buli ngaasi. Abulao esisaala sy'obutuki siindi esyaliho nga sino mu butuki buundi bwoosi.

²⁰ Ebikoombe by'ohung'weeramo byoosi ebya Omutuki Solomooni byali eby'esaabbu, haandi neende ebiindu byehoonyerwa byoosi ebyali mu nyuumba mbiihiro y'Esichaha sya Lebbanooni byosi byali eby'esaabbu ehaya. Efeesa haba siyali niyiyirwa koti esiindu sirimo obuhoonyi daawe mu ndaalo cha Solomooni.

²¹ Yali neende esidiiyiha sy'emeeri chisyaabala mu nyaanja nichisyaabalira alala neende abahalaabani b'Omutuki Hiramu. Buli emyaaka kidatu, emeeri chae echo chakobolaanga, nichileeta esaabbu, efeesa, ameeno k'enjofu, embuumuli neende amahene.

²² Omutuki Solomooni yali omuyiinda haandi omukesi ohuhiraho omutuki wuundi yeesi mu syaalo syoosi.

²³ Abatuki boosi beechaanga yaali ohumweteebaho, ohuwuliraangaho hu bumanyirifu bu Nasaae yali niyamuberesa.

²⁴ Buli otula yaleeteraanga Solomooni ebiyaanwa koti eby'ohwesyaaya by'esaabbu neende eby'efeesa, ebiluungiro, efaraasi, neende esuhiri njere. Bino byachiiririra ohubeechaanga bityo buli mwaaka.

²⁵ Omutuki Solomooni haandi yali neende ebidwooli by'efaraasi elifu chine (4,000) ebibiiha ebigaari by'efaraasi neende efaraasi chiene, haandi neende efaraasi chilwaana elifu ehumi neende chibiri (12,000). Echiindi yali niyachitukiraanga mu Yerusalemu nae echidoong'ereyo choosi yali niyachimosaanga mu biko bikabuhaane.

²⁶ Yali ahiramo mu batuki boosi abali mu syaalo esyo, ohutulira elalira hu Mwaalo kwa Ewufuraate ohwoola mu Filisiti, haandi neende hu lwaaho lwa Misiri.

²⁷ Mu ndaalo ch'obwaami bwae, efeesa yali yasaaba mu Yerusalemu koti sa amakina kabuli ludaalo, nae emiseengese kyali kyeechula koti emigasia ekiri mu nandaalira w'ebigulu bya Yuda.

²⁸ Solomooni yakulaanga efaraasi naachitusa mu Misiri, haandi neende ohutula mu buli syaalo siindi syoosi.

Eby'obutuki bwa Solomooni mu bwiimbikiti

²⁹ Ebyaliwo bya Solomooni bidoong'ereo, ohutulira elalira muhuchaaka ohwoola Munjakamo, byandiikwa mu sitabo sya Ebyaliwo bya Natani Omunabbi, haandi mu Obunabbi bwa Ahija wa Silo, haandi neende mu sitabo sya Ebyaboneherwa neende Yido Omunabbi ebilomaloma hu butuki bw'Omutuki Yerobboamu wa Yisiraeli.

³⁰ Solomooni yatukiraanga mu Yerusalemu Yisiraeli yoosi, ohumala emyaaka amahumi kane (40).

³¹ Yafwa mani yasiihwa mu Siko sya Daudi, mani Rehobboamu omwaana wae yaamukobola mu makulu koti omutuki.