2 Ebyomubiha 18 - EBBAIBBO EMBOOSI YA NASAAE

Omunabbi Mikaaya alabula Ahabbu

¹ Omutuki Yehosafati owa Yuda ni yayiindiyala mani yaamanyihana, yatekeha obweeya akatikaati wa mulala hu baandu b'edaala lyae neende edaala ly'Omutuki Ahabbu owa Yisiraeli.

² Emyaaka miingi nikyabitao luunyuma, Yehosafati yachia mu siko sya Samaria ohukeniya Ahabbu. Ohwiisa oluyaali mu Yehosafati neende abo abali nae, Ahabbu yeeta amakoondi mu buungi, haandi neende eng'oombe mu buungi hulw'emideeho. Yateemaho muno ohuserera Yehosafati amweyambaanieho mu huseeta esiko sya Ramooti mu Gileadi.

³ Yamuteeba ati, “Mani ewe onanyala ohuchia naange ohuseeta Ramooti, kose?” Yehosafati nae yakobolamo ati, “Ngaandi, ese ndi omweetekefu nikali mbwe ewe wesi n'oli omweetekefu, kata neende amaye kaange kosi. Huchia ohuhweyambaaniaho sa.”

⁴ Haandi yameedaho ati, “Nae mberi lehaho huchie hweteebeho hu Omwaami.”

⁵ Mani Ahabbu yalaanga abanabbi yeengira mu nyuumba, bali aambi emia chine enaamba, mani naabateeba ati, “Mani ese nyala ndaachia mani ndaseeta Ramooti, kose haba?” Nabo bamukobolamo bati, “Ngaandi ewe seeta sa, Nasaae achia ohuhuba obuyiingiri.”

⁶ Nae Yehosafati yateeba ati, “haba siyiriyo hooho omunabbi wuundi yi hunyala hwaabitiramo ohweteeba hu Omwaami daawe?”

⁷ Ahabbu nae yakobolamo ati, “Ngaandi yirihooyo mulala owuundi, Mikaaya omwaana wa Yimila. Nae ese ndamusyuula muno olwohuba haba siyaholeraangaho obunabbi bulai daawe; byamenya sa ohubeechaanga ebyonoono bihaya.” Yehosafati yakobolamo ati, “Ewe otaboolaho otyo daawe!”

⁸ Mani Omutuki Ahabbu yalaanga omuhoongo womu kooti wuundi mani naamala niyamuboolera ohuchia ohuleeta Mikaaya bwaangu.

⁹ Abatuki babiri, abefwaalire amaganjuula k'obwaami, nibehaale hu bisaala by'obutuki byaabwe abuundu yi bahubbakiraanga, erwaanyi w'esiruwa sya Samaria, alala neende abanabbi boosi nibali ohuholeraanga obunabbi mu moni waabwe.

¹⁰ Mulala hu beene abo, Sedekia omwaana wa Kenaana, owahola enjika ch'ebibya mani yaamala yaboolera Ahabbu ati, “Sino nisyo esiindu si Omwaami ali ohuboola, ‘Ati neende chino nichio choochia ohunyala ohulwaania Abasiria mani obayiingirire elalira.’ ”

¹¹ Abanabbi baandi boosi, bosi baboola sa esiindu nasilala esyo. Baboola bati, “Ewe huumba sa noseeta Ramooti mani ochia ohunyala ohubahira, Omwaami achia ohuhuberesa obuyiingiri.”

¹² Abweene ao, omuhoongo owali n'achiire ohweenda Mikaaya yamuboolera ati, “Abanabbi baandi boosi batusire obunabbi bweekesa ohuyiingira hw'omutuki, mani ewe wesi ohoyere ohutusa obuli nasilala butyo.”

¹³ Nae Mikaaya yakobolamo ati, “Omwaami mulamu, ese njia ohuboola bi Nasaae waange anaba niyamboleere ohuboola!”

¹⁴ Mani niyoola mu moni w'Omutuki Ahabbu, omutuki oyo yamuteeba ati, “Ewe Mikaaya, mani omutuki Yehosafati naange hwachia mani hwaseeta Ramooti, kose haba?” Mikaaya yakobolamo ati, “Ngaandi seete! Paka muchia ohuyiingira. Omwaami achia ohubaberesa obuyiingiri.”

¹⁵ Nae Ahabbu yakobolamo ati, “Nikali mbwe ochia ohulomaloma yiindi mu liita ly'Omwaami, mboolere sa obwadyeeri bweene! Amahabi kaanga kandaahwenaane nihubooleraanga endyo?”

¹⁶ Mikaaya yakobolamo ati, “Ese ndi ohubona eye lya Yisiraeli nilisakuuhire niliri hu sigulu koti amakoondi kataali neende omwaayi. Mani Omwaami yaboola ati, ‘Ngaandi abasaacha bano mbano bafwaana koti abataali neende omwimirisi; leha beweereo neende omuleembe.’ ”

¹⁷ Ahabbu nae yaboolera Yehosafati ati, “Ese simbeere nihuboleereho hale endi oyo haba siyambooleraangaho obunabbi bwoosi obulai yi ndi; byalumirira sa ohubeechaanga ebyonoono bihaya!”

¹⁸ Mikaaya nae yemeeda sa ohuboola ati: “Bulaanu ewe tekeeresa owulire bi Omwaami aboola! Ese mbweene Omwaami niyehaale hu sisaala syae sy'obwaami muukulu, naali alala neende bamalaika bae boosi nibeemere mu ndulo wae.

¹⁹ Omwaami yateeba ati, ‘Naanu mweene ochia ohunyala ohubachirisa Ahabbu hu anyale ohuchia yeeterwe mu Ramooti?’ Bamalaika baandi babolaanga esiindu silala, nae abaandi babolaanga ebiindi,

²⁰ ohwoola lu mwooyo yatula mu moni, yasuda eyiri Omwaami, yaboola ati, ‘Ese niise ochia ohunyala ohumubachirisa.’ Omwaami nae yateeba ati, ‘Otye?’

²¹ Mwooyo oyo nae yakobolamo ati, ‘Ese njicha ohuchia hole abanabbi ba Ahabbu boosi balomalome eby'obubacha.’ Omwaami haandi yaboola ati, ‘Mani ewe chia mani omubache otyo. Hane mbao onanyala ohubitamo.’ ”

²² Mikaaya yamaliirisa n'aboola ati, “Sino nisyo esikwiireo. Omwaami niye oholere abanabbi bao bano baahubacha batyo. Nae omweene amalire ohuheengao ati ewe ochia ohukwa mu masira!”

²³ Bulaanu Omunabbi Sedekia yachia eyiri Mikaaya, yaamupaama mu bweeni, yamuteeba ati, “Ni liina lu Mwooyo w'Omwaami yatulaho hu ese mani yachaaka ohulomalomeraanga mu ewe?”

²⁴ Mikaaya nae yakobolamo ati, “Ewe mbao ochia ohumanya noonaba n'okobolayo mu siseenge sy'emukoongo ohweekisa.”

²⁵ Bulaanu Omutuki Ahabbu yalagira mulala hu bahoongo bae ati, “Ewe, diira Mikaaya oyo omuyire eyiri Abaamooni, gafana w'esiko sino, haandi eyiri Yoasi omwaana w'omutuki.

²⁶ Obaboolere ohumusukuna mu jeela mani bamubereseenge sa omugaati neende amaachi mahaya ohwoola lu ndahakobolere ni ndi omulamu abweene.”

²⁷ Mikaaya nae yemeeda ohutotola ati, “Nikali mbwe ochia ohunyala ohukobola nooli omulamu abweene, mani Omwaami aba nataali niye owumboleere daawe!” Haandi yameedaho ati, “Eng'we mutekeerese, buli muundu, Awuliire esiindu si mboolere esyo!”

Ohufwa hwa Ahabbu

²⁸ Bulaanu, Omutuki Ahabbu owa Yisiraeli neende Omutuki Yehosafati owa Yuda bachia ohuseeta esiko sya Ramooti mu Gileadi.

²⁹ Ahabbu yaboolera Yehosafati ati, “Koti lu huli ohuchia mu biita, ese njia ohwebachirisa, mani ewe naawe wefwaale amaganjuula kao k'obwaami.” Mani omutuki wa Yisiraeli yachia mu biita n'atefwaalire ebyefwaalo by'obutuki.

³⁰ Omutuki wa Siria yali n'amalire ohulagira omuhoongo w'ebigaari ohuseeta ataali owuundi ohutusaho omutuki wa Yisiraeli.

³¹ Nibabona Omutuki Yehosafati, boosi babaasa sa bati, oyo niye owali omutuki wa Yisiraeli, nibakaluuhana ohumuseeta. Nae Yehosafati yahubba oluwuungu, mani Omwaami Nasaae yamununula yakaluuhania ohuseeta ohwo yaahumutusaho.

³² Omuhoongo w'ebigaari oyo yabona ati hane haba omweene siyali naali omutuki wa Yisiraeli daawe, mani baakamira ao ohumwiiruhaniaanga.

³³ Olw'ehabi sa, kata katyo, omunamaye Omusiiria yalasa oluyiingo mani lwaachoma Omutuki Ahabbu akatikaati w'emaambala neende omuhono kwae. Yalirira omwiirusi w'esigaari wae ati, “Ese nyaaliihe. Kaluuhana otule mu biita!”

³⁴ Nae ebiita nibyali nibisiluliriire, Omutuki Ahabbu yadoong'a n'andire mu sigaari syae, n'atingaalire eyiri Abasiria. Mani elyuuba nilyakwa, yesi yafwiirao atyo.