2 Ebyomubiha 15 - EBBAIBBO EMBOOSI YA NASAAE

Engaluuhania ndai cha Asa

¹ Mwooyo wa Nasaae yeeha hu Asaria omwaana wa Odedi,

² mani yaachia ohubukaanana neende Omutuki Asa. Yahuumula n'alaanga ati, “Ewe tekeeresa, ewe Omutuki Asa, alala neende abaandu boosi aba Yuda neende Bbenjamini! Omwaami ali naang'we mwesi nimusisiiri nae. Nikali mbwe muchia ohumukoonyaanga, aba achia ohubakanyaanga mumunyoole, nae nimucha ohumweekabulaho, aba achia yesi ohubajwang'aanga.

³ Olwohuba hulw'embaka endeeyi muno, Yisiraeli yali niyamenya niyitaali neende Nasaae wadyeeri, niyitaali neende abalaamisi ohubeekesaanga, haandi niyitaali neende amalako.

⁴ Nae ebidinyu nibyeecha, bakaluuhana baachia eyiri Omwaami, Nasaae wa Yisiraeli. Bamukoonya mani baanyala ohumunyoola.

⁵ Mu ndaalo echio, yabulaangayo oyo yeesi owanyalaanga ohwiicha haandi amala awaao mu muleembe daawe, olwohuba yaliwo ebidinyu neende ohutabuha buli abuundu mu syaalo syoosi.

⁶ Buli syaalo syeehalaanga hu siindi, haandi esiko siindi syoosi syehalaanga hu syaasye, olwohuba Nasaae niye owalichiingi n'aletaanga ebidinyu neende okusinye hu baandu abo.

⁷ Nae ewe ohoyere ohuba omujiing'u haandi otafwa omwooyo. Olwohuba omulimo kuno ku ewe oli ohuholaanga kuchia ohulweeywa.”

⁸ Mani Asa niyawulira obunabbi bu Asaria omusyani wa Odedi yali n'alomaloome, yalemesebwa omwooyo. Yamalirao elalira ebiloongaloongwe byoosi ebyali mu syaalo sya Yuda neende esya Bbenjamini mwoosi, haandi neende ebiloongaloongwe byali mu biko bi yali niyaamba ebyali mu syaalo sy'ebigulu esya Efuraimu. Haandi yachia yatereesa alutaari y'Omwaami eyali yoombahwa mu lwaanyi lw'Enyuumba ya Nasaae.

⁹ Abaandu abaangi bali nibeechere hu lwaande lwa Asa ohutula mu Efuraimu, Manaase, neende mu Simeoni, mani nibamenyaanga mu bwaami bwae, olwohuba bali nibabona bati hane Omwaami yali naali nae. Asa yalaaliha abo boosi, haandi neende abaandu ba Yuda neende aba Bbenjamini.

¹⁰ Bahung'aanira mu Yerusalemu mu mwoosi kwa hadatu kw'omwaaka kw'ehumi-na-hataanu okwa Asa naali omutuki.

¹¹ Hu ludaalo olwo lweene banyala ohuyaanayo ebiyaanwa eyiri Omwaami ohutula hu bipeeye bi bali nibakoboole nabyo bino: eng'oombe emia chitaanu-na-chibiri (700), haandi neende amakoondi elifu chitaanu-na-chibiri (7,000).

¹² Bahola endagaano mu bafukiirisanisira ohwiinamiraanga Omwaami, Nasaae wa bakuuka yaabwe, neende omwooyo kwaabwe kwoosi haandi neende obulamu bwaabwe bwoosi.

¹³ Oyo yeesi, omuyere kata omuhuluundu, ow'esisaacha oba ow'esihasi, otamwiinamiraanga yeetwaanga sa.

¹⁴ Mu ekono ly'aakulu, beechubira mu liita ly'Omwaami bati bachia ohwooseresaanga endagaano eyo, mani baamala beehuuma niboobba eturumbete.

¹⁵ Abaandu boosi aba Yuda beehoya olwohuba bali nibamalire ohuhola endagaano yino neende omwooyo kwaabwe kwoosi. Basaangaaliraanga mu hwiinamiraanga Omwaami, mani yesi yafukiiriraanga mani amala ababeresaanga omuleembe hu buli lubeka.

¹⁶ Omutuki Asa yatusa Maaka nguuhwang'ene mu bweyaango bwae koti omutuki muhasi, olwohuba yali niyaloonga esiloongaloongwe sy'obutye esya Asera nasaae muhasi w'olwiibulo. Asa yachia mani yaasitema syaweera aasi, yasyasyaakamo ebituundu, mani yaamala yasaambira ebituundu-tuundu ebyomu Hoondo lya Kidironi.

¹⁷ Kata neende Asa niyahaywa ohusihirisa ebituundu bikafiiri by'ohwiinamiraangamo mu syaalo omwo mwoosi, omweene yadoong'a sa naali omweesikwa eyiri Omwaami obulamu bwae bwoosi.

¹⁸ Yata mu Nyuumba ya Nasaae ebyehoonyerwa byoosi bi Abbija laatang'ene yali niyata mu muhono kwa Nasaae, kata sa neende ebiindu by'esaabbu, neende eby'efeesa bi mweene yesi niyayaana eyiri Nasaae.

¹⁹ Eyo haba siyaliyo ebiita biindi byoosi daawe, ohwoola hu mwaaka kw'amahumi kadatu neende kitaanu eky'obwaami bwae.