1 Samueli 6 - EBBAIBBO EMBOOSI YA NASAAE

Ohukoboswa hw'Esanduuku ly'Endagaano

¹ Esanduuku ly'Endagaano y'Omwaami lyamala embaka y'emyoosi kitaanu-na-kibiri (7) niliri mu syaalo sya Abafilisiti.

² Ao mani Abafilisiti nibalaanga abalaamisi alala neende abalakusi mani nibabateeba bati, “Huhole hutye Esanduuku ly'Endagaano y'Omwaami lino? Nihulikobosayo mu bwiihalo bwaalyo bweene, hunalikoboseyo neende siina?”

³ Bakobolamo bati, “Nimunaba nimukobosayo Esanduuku ly'Endagaano ya Nasaae w'Abaisiraeli, haba simuchia hulikobosayo bihaya. Muchia ohulikobosayo neende esiyaanwa. Mu ngira yino, ao niwo yi muchia ohuwonisirwamo, haandi ao niwo yi muchia ohufuumbulira esifune sikera niyemeeda ohubasaandya.”

⁴ Abaandu mani nibateeba bati, “Hunayirire Nasaae siyaanwa siina?” Bakobolamo bati, “Ebiloongaloongwe by'esaabbu by'amabubuuto bitaanu, neende eby'esaabbu ebiri koti embeba bitaanu, buli siloongaloonge situla eyiri buli mutuki w'Abafilisiti. Olwohuba buli ndwaae yatumwa hu buli muundu neende hu batuki bataanu abo.

⁵ Muhoyere ohuhola ebiloongaloongwe bifwaanana neende amabubuuto neende embeba olwohuba nibyo ebyanyaasa esyaalo syeeng'we. Haandi mwiseenge oluyaali mu Nasaae wa Yisiraeli. Awuundi achia ohwaakamira ao ohubasaandya, ohusaandya banasaae beeng'we, neende ohusaandya esyaalo syeeng'we.

⁶ Siina syeene esikera nimwoomya emyooyo koti lu Abamisiri neende abatuki baabwe boomya emyooyo kyaabwe? Mutebirira koti lu Nasaae yabasiruwasa ohwoola lu baleha Abaisiraeli baatula mu syaalo sy'e Misiri.

⁷ Mani sakira mutekehe esigaari siyaaha neende eng'oombe edwaasi chibiri echitaaboywahooho ekoombo. Muchiboyeho esigaari, nae emoosi chaachio muchituseho mani muchikoboseyo engo.

⁸ Mubukule Esanduuku ly'Endagaano y'Omwaami, mulite mu sigaari esyo, mute mu sanduuku liri endulo waalyo ebiloongaloongwe by'esaabbu bi muli ohuyirira koti esiyaanwa sy'ohutuunga ebyonoono byeeng'we. Musiindihe esigaari esyo mani musilehe esyeene siweeo.

⁹ Musyewuunje mubone koti lu siwaao. Nisichiira ena siko sya Bbeeti Semeesi, sino syeekesa siti Nasaae w'Abaisiraeli niye owatutumira amasira mabi kano. Nae nisitaba sityo, huchia ohumanya huti ebinyaaso byatwoolaho, byatukwaaho bukwaaho.”

¹⁰ Mani abasaacha abo nibahola koti lu bababoolera. Babukula eng'oombe chibiri, nibachiboya hu sigaari esyo, mani nibeekalira emoosi chaachio mu hoonge.

¹¹ Mani nibata Esanduuku ly'Endagaano mu sigaari esyo, alala neende esaanduku lyali nilirimo ebiloongaloongwe by'esaabbu bifwaana koti embeba neende amabubuuto.

¹² Eng'oombe echo mani nichachaaka olukeendo luchia Bbeeti Semeesi, nichitakotaho engira daawe. Chachia nichaana. Abatuki Abafilisiti bataanu bachiloondaho ohwoola hulwaaho lwa Bbeeti Semesi.

¹³ Abaandu ba Bbeeti Semesi bali mu hooho nibakesa engaano yaabwe. Nibewuunja aakulu, nae bona, babona Esanduuku ly'Endagaano elyo. Basangaala muno ohulibona.

¹⁴ Esigaari esyo syeecha mu mukuunda kw'omusaacha olaangwa Yosua, owali niyamenya mu Bbeeti Semesi, mani nisyeema abweene ao aambi neende olwaanda luhoongo muno. Abaandu nibasyaaka esigaari sy'embaao esyo, haandi nibeeta eng'oombe chibiri echo, mani nibachiyaanayo eyiri Omwaami koti esiyaanwa sisaambwa.

¹⁵ Abaleefi mani nibakiinga Esanduuku ly'Endagaano y'Omwaami alala neende esaanduku lyalimo ebiloongaloongwe by'esaabbu ebyo, nibabitusa hu sigaari, mani nibabita hu lwaanda luhoongo olwo. Ao abaandu ba Bbeeti Semesi nibayaanira Omwaami ebiyaanwa bisaambwa neende ebiyaanwa biindi.

¹⁶ Abatuki Abafilisiti bataanu abo bababona nibahola sino, mani nibakobolayo Ekironi ludaalo lweene olwo.

¹⁷ Abafilisiti bayira ebiloongaloongwe bitaanu by'esaabbu bifwaana koti amabubuuto eyiri Omwaami koti esiyaanwa sy'ohutuunga ebyonoono byaabwe, buli situla hulw'ebiko bya Asidoodi, Gasa, Asikeloni, Gaati, neende Ekironi.

¹⁸ Haandi bayira ebiloongaloongwe by'esaabbu bifwaana koti embeba, buli situla hulw'ebiko byali nibitukwa neende abatuki Abafilisiti bataanu, ebiko by'engoba neende engoongo chitasitwa neende ebida. Olwaanda luhoongo lwali mu mukuunda kwa Yosua wa Bbeeti Semesi, hu bata Esanduuku ly'Endagaano y'Omwaami, lusisiiriyo ohwoola buti ohwomiisa ebiindu byaholehana.

¹⁹ Ao Omwaami mani niyeeta abasaacha ba Bbeeti Semesi amahumi kataanu-na-kabiri (70) olwohuba batingaala mukati w'Esanduuku ly'Endagaano elyo. Abaandu balira muno olwohuba Omwaami yabeetamo abaandu baangi muno.

Esanduuku ly'Endagaano niliri Kiriati Yearimu

²⁰ Ao abasaacha ba Bbeeti Semesi nibaboola bati, “Wiina onyala ohweema mu moni w'Omwaami, Nasaae wuno omwoolerefu? Haandi anaache owa wiina naatutulireho?”

²¹ Mani niyatuma bawamwaanda ohuchia eyiri abaandu ba Kiriati Yearimu bababoolere bati, “Abafilisiti ohukobosa Esanduuku ly'Endagaano y'Omwaami. Mwiiche muchie mulibukule.”