1 Samueli 10 - EBBAIBBO EMBOOSI YA NASAAE

¹ Ao mani Samueli n'abukula enjaagi y'amafuta k'omuseituuni, naakachuha hu mutwe kwa Saulo, naamukwa mu sirifu, mani n'aboola ati, “Omwaami ahuchuhaho amafuta ohuba omutuki w'abaandu bae Abaisiraeli. Ochia ohutuka abaandu bae, haandi obakairire ohubawonia abasuku baabwe boosi. Sino nisyo esilolero y'oli esyomiisa siti Omwaami niye ohudoolere ohuba omutuki w'abaandu bae.

² Nyaanga yino, n'onaba n'otula yi ndi, ochia ohubukaanana abasaacha babiri nibali aambi neende eng'ani ya Rakeeli abuundu mbwe Selisa mu situundu sya Bbenjamini. Bachia ohuhuboolera bati, esuhiri ch'oli ohukoonya chinyoolehana, mani lataao ahaye ohwemeeda ohwelalihira hu bichidiiraho, nae yelalihire ebihudiiraho, mani yemeede ohuteebaanga ati, ‘Ndaahole endye ebidiira hu mwaana waange?’

³ Ochia ohutulao mani wemeedeyo mu moni ohwoola lu onoole hu musaala mwoolerefu, okuli Tabori, yi ochia ohubukaanana neende abasaacha badatu abali hu lukeendo lwaabwe ohuchia ohuyaana esiyaanwa eyiri Nasaae abuundu mbwe Bbeteli. Mulala hu abo achia ohuba naayira embusi njere chidatu, owuundi naayira emigaati kidatu, nae owuundi naayira esikiingiro sy'eseero esichuule efiini.

⁴ Bachia ohuhuheesa mani bahuyaanire emigaati kibiri, ky'ohoyere ohufukiirira ohukibukula.

⁵ Bachia ohuchia hu Sigulu sya Nasaae esiri mu Gibbeya, yi kaambi y'Abafilisiti yiri. Hu siruwa sy'esiko esyo, ochia ohubukaanana omukaanda kw'abanabbi nikwiihirira nikutula hu alutaari hu sigulu, nikuubba obuhana, eng'oma, amalere, neende endoongo. Bachia ohuba nibahina haandi nibayokera.

⁶ Abweene ao, mwooyo w'Omwaami achia ohuhwiihaho, mani ochia ohubeyaambaniaho mu huhina hwaabwe hw'ediini neende mu huyokera, mani wehole omuundu okabuhaane.

⁷ Ebiindu bino nibiholehana, hola buli siindu si Nasaae ahwiimirira ohuhola.

⁸ Ochia ohundaangiriramo ohuchia Gilgaali yi njia ohuhubukaana huyaaneyo ebiyaanwa bisaambwa neende ohuyaana ebiyaanwa by'ohusaasania. Ochia ohuliindirayo embaka y'endaalo chitaanu-na-chibiri, hu njiche hweekese esy'ohuhola.”

⁹ Ao Saulo niyakaluuhana ohuseebula Samueli, Nasaae naakaluuhania omwooyo kwa Saulo. Mani buli siindu si Samueli yamuboolere nisyoolerera hu ludaalo olwo.

¹⁰ Saulo neende omuhalaabani wae niboola Gibbeya, omukaanda kw'abanabbi kwabukaanana nae. Abweene ao, Mwooyo wa Nasaae naamwiichaho neende amaani, mani yeyambaania mu huhina hw'ediini hwaabwe neende ohuyokera.

¹¹ Abaandu bali nibamumanya hale nibamubona naali ohuhola esiindu sino beteebanaho bati, “Siina syeene sino esikwiire hu mwaana wa Kisi? Bulaanu Saulo yesi yeholere mulala hu banabbi kose?”

¹² Omusaacha wuundi owamenya mu situundu esyo naateeba ati, “Nae abanabbi baandi bano, obaasa oti laata yaabwe nibo ba wiina?” Yino niyo engeri yi nomanoma yino yichaakira yiti, “Saulo yesi yeholere omunabbi?”

¹³ Saulo niyamala amahina k'ediini kae neende ohuyokera, yachia eyiri alutaari hu sigulu.

¹⁴ Mwanaang'ina laatang'ene Saulo niyamubona, alala neende omuhalaabani wae, yabateeba ati, “Mubeere muchiire yeena?” Saulo yakobolamo ati, “Hubeere nihuchiire ohukoonya esuhiri. Mani nihuhayiswe ohuchinyoola, huchiire ohubona Samueli.”

¹⁵ Mwanaang'ina laatang'ene Saulo yateeba ati, “Nae yababoolera siina?”

¹⁶ Saulo yakobolamo ati, “Atuboleere ati ebisolo ebyo binyoolehaane.” Nae ebidiira hu hweehola omutuki, Saulo haba siyaboolera mwanaang'ina laatang'ene oyo bi Samueli yali n'aboolere ebimudiiraho ohuba omutuki.

Saulo yeekomerwa ohuba omutuki

¹⁷ Samueli yalaanga abaandu. Yababuusa alala hu muholo kw'esinadiini Misipa.

¹⁸ Yababoolera ati, “Omwaami, Nasaae wa Yisiraeli aboola ati, ‘Ndabatusa mu Misiri haandi ndaabanunula ohubatusa hu Abamisiri haandi neende hu baandu baandi boosi abali nibabafwiinyirira.

¹⁹ Niise Nasaae weeng'we, oyo owabanunula ohutula mu husaanda hweeng'we neende mu bidinyu byeeng'we byoosi. Nae enyaanga yino muundebwaabire haandi muusabire mbaberese omutuki. Mani bulaanu mwebuuse alala, mu moni w'Omwaami, nimuli mu njia cheeng'we, neende mu nono cheeng'we.’ ”

²⁰ Ao mani Samueli naalaanga buli nono ohwiicha mu moni, mani Omwaami n'adoolamo enono ya Bbenjamini.

²¹ Samueli n'asuudya aambi nae enono ya Bbenjamini, mani enyuumba ya Matiri niyidoolwamo. Ao Samueli n'asuudya aambi nae ab'edaala lya Matiri. Saulo omwaana wa Kisi naadoolwamo. Bamukoonya, nae nibahaya ohumunyoola.

²² Bateeba Omwaami bati, “Aluwo omuundu wuundi osisiiri ohwoola ano?” Omwaami yakobolamo ati, “Saulo ngula ali era, yekisire mu biindu.”

²³ Mani nibeeruha nibachia ohumutusayo. Saulo niyeema mu baandu, buli muundu yabona ati abahira boosi obuleeyi.

²⁴ Samueli yaboolera abaandu abo ati, “Wuno niye ali yi Omwaami adoolere! Abulao omuundu wuundi yeesi mweefwe owaakana nae.” Abaandu boosi behuuma bati “Omutuki ayiindire!”

²⁵ Samueli bulaanu naachaaka ohunyonyola abaandu ebidiira hu butuki koti lu biri mani naabyandiika mu sitabo, naasita Abuundu Woolerefu. Samueli mani naaseebula buli muundu ewaabwe.

²⁶ Saulo yesi yakobolayo engo wae abuundu mbwe Gibbeya. Abasaacha baandi ab'obunyala buungi muno, ba Nasaae yali niyadiira hu myooyo kyaabwe, bosi bachia nae.

²⁷ Nae abaandu baandi, ababula obuhoonyi bwoosi bachaaka ohuteeba bati, “Omusaacha wuno mani anyala ohutuholera esiindu silai syoosi?” Mani nibamulekeeresa haandi nibahaya ohumuleeteraho esiyaanwa syoosi.