1 Ebyomubiha 5 - EBBAIBBO EMBOOSI YA NASAAE

Abeechuhulu ba Rubbeeni

¹ Bano nibo abeechuhulu ba Rubbeeni, omwaana waamberi wa Yakobbo. (Kata Rubbeeni niye owali omwaana waamberi, nae olwohuba yakona neende omuhasi mudya wa laatang'ene, yafwiirwa ehabi yae koti omwaana waamberi, mani ehabi eyo niyibereswa Yosefu.

² Mani yali enono ya Yuda, eyeehola ey'amaani muno, mani niye eyatulamo omutuki w'enono choosi.)

³ Rubbeeni, omwaana waamberi wa Yakobbo, yali neende abaana basyaani bane: Hanooki, Palu, Hesirooni, neende Karimi.

⁴ Bano nibo abeechuhulu ba Yoeli ab'endaalo choosi: Semaya yeebula Googi, Googi niyeebula Simei, Simei niyeebula Miika,

⁵ Miika niye owibula Reya, Reyaaya niyeebula Bbaali, Bbaali

⁶ niyeebula Bbeera. Bbeera niye yi Tigilaati-piliseeri omutuki wa Asiria yawaamba mani yaachia mu buwaambe. Bbeera wuno niye owali omwiimirisi w'enono yitula hu Rubbeeni.

⁷ Olukalala lw'enono ya Rubbeeni lweekesa abeemirisi baabwe bano: Yeyeli, Sakaria,

⁸ neende Bbela, omwaana wa Asasi, Asasi omwaana wa Seema, Seema w'enono ya Yoeli. Abaandu b'enono yino bamenyaanga mu Aroeri neende mu situundu sy'emukulu ohwoola Nebbo neende Bbaali Meyoni.

⁹ Abaandu bano bali neende ebyaayo biingi muno mu syaalo sya Gileadi, mani bali mu situundu sy'ebukwe yi siparara sichaakira ohwoolera elalira hu Mwaalo kwa Ewufuraate.

¹⁰ Mu biha by'Omutuki Saulo, enono ya Rubbeeni yaseeta Abahaguri, babeetera mu biita, mani nibamenya mu loba lyaabwe eliri mu situundu sy'ebukwe wa Gileadi.

Abeechuhulu ba Gaadi

¹¹ Ab'enono ya Gaadi bamenyaanga emukulu wa Rubbeeni mu syaalo sya Bbasani ohwoola Saleka ebukwe.

¹² Yoeli niye omwiimirisi w'enono, amuloondereraho yali Safamu. Yanai neende Safati nibo abachaakisa enono chiindi mu Bbasani.

¹³ Abaandu baandi ab'enono yino bali ab'enyuumba chitaanu-na-chibiri chino: Mikaeli, Mesulamu, Seebba, Yorai, Yakaani, Sia, neende Ebberi.

¹⁴ Bano bali abeechuhulu ba Abbihaili omwaana wa Huuri, Huuri omwaana wa Yaroa, Yaroa omwaana wa Gileadi, Gileadi omwaana wa Mikaeli, Mikaeli omwaana wa Yesisai, Yesisai omwaana wa Yahudo, Yahudo omwaana wa Bbusi.

¹⁵ Ahi, omwaana wa Abbudieli haandi omwiichuhulu wa Guni, niye owali omuhuluundu w'enono chino.

¹⁶ Bali nibamenya mu situundu sya Bbasani neende Gileadi, mu biko byeeyo, haandi neende mu njairo choosi echali nichebodoohania esyaalo sya Saroni.

¹⁷ (Ebyandiiko bino byabuuswa alala mu ndaalo cha Yotaamu omutuki wa Yuda neende Yerobboamu wa habiri omutuki wa Yisiraeli.)

Amaye k'enono ch'ebukwe

¹⁸ Mu nono cha Rubbeeni, Gaadi, neende Manaase ech'ebukwe, choosi alala chali neende abalwaani b'amaye elifu amahumi kane neende chine neende emia chitaanu-na-chibiri neende amahumi kasaasaba (44,760), abamanyirifu muno mu hwehoonyera engabo, embaanga neende obuyiingo.

¹⁹ Baachia ohulwaania enono cha Hagari, Yetuuri, Nafisi, neende Nodabbu.

²⁰ Beesika Nasaae mani nibamusaba abahoonye, mani Nasaae naawulira ohusaba hwaabwe mani nibayiingira Abahagari neende abo boosi ababakwiiraanga sidubaanie.

²¹ Mani nibayaaya hu basuku baabwe abo, engamia elifu amahumi kataanu (50,000), amakoondi elifu emia chibiri neende amahumi kataanu (250,000), esuhiri elifu chibiri (2,000), haandi nibayira abawaambe elifu emia ndala (100,000).

²² Beeta abasuku baangi muno, olwohuba Nasaae niye owalwaanaanga ebiita. Mani bemeeda ohumenya mu situundu esyo ohwoola lu bayirwa mu buwaambe.

Enono cha Manaase ch'ebukwe

²³ Abaandu ba Manaase ab'ebukwe bali nibamenya mu situundu sya Bbasaani ohwoola emukulu hu Bbaali Hamoni, Senili, neende hu Lugulu lwa Hamoni, mani obuungi bwaabwe nihwemeeda muno.

²⁴ Bano nibo bali abeemirisi b'enono chino: Eferi, Yisi, Elieli, Asirieli, Yeremia, Hodafia, neende Yahudieli. Abo boosi bali ab'amaye balwaani b'esinani muno, abeemirisi bamanyihaane muno mu nono chaabwe.

Enono ch'ebukwe chiyirwa mu buwaambe

²⁵ Nae abaandu abo nibahaya ohweesika Nasaae wa bakuuka yaabwe, nibamutulaho mani nibachaaka ohwiinamiraanga banasaae ba yatusa mu syaalo esyo.

²⁶ Mani Nasaae naahola Puli omutuki wa Asiria, eliita ly'eliindi nilyo Tigilati-Pileseeri, ohuseeta esyaalo syaabwe. Yayira mu buwaambe enono cha Rubbeeni, Gaadi, neende Manaase ch'ebukwe mani nibamenya endaalo choosi mu Hala, Habbori, neende Hara, haandi neende hu lwaasi lw'Omwaalo kwa Gosani.