1 Ebyomubiha 24 - EBBAIBBO EMBOOSI YA NASAAE

Omulimo kwabereswa abalaamisi

¹ Kino nikyo emikaanda ky'abeechuhulu ba Arooni: Arooni yali neende abaana basyaani bane: Nadabbu, Abbihu, Eliasaari, neende Yitamaari.

² Nadabbu neende Abbihu ni abataangirira laata yaabwe ohufwa; bafwa nibaliho neende abaana daawe. Mani Eliasaari neende Yitamaari nibaba abalaamisi.

³ Mani Omutuki Daudi alala neende Sadoki, omwiichuhulu wa Eliasaari, neende Ahimeleki, owali wa Yitamaari, nibakabulamo abalaamisi mu mikaanda ki banahalaabanireengemo mu mirimo kyaabwe.

⁴ Abeechuhulu ba Eliasaari batekehwa mu mikaanda ehumi neende kisaasaba, nae abeechuhulu ba Yitamaari batekehwa mu mikaanda kitaanu-na-kidatu; syaholwa sityo olwohuba waluwo abeemirisi basaacha baangi ohutula mu beechuhulu ba Eliasaari.

⁵ Koti lu baluwo abahulira Enyuumba ya Nasaae, neende abahulira eby'ohwiinamira ohutula hu nyaande choombi: Abeechuhulu ba Eliasaari neende aba Yitamaari, emirimo kyoosi chakabwaanga mu huhubbaanga eha.

⁶ Abeechuhulu ba Eliasaari neende abeechuhulu ba Yitamaari badoolaanga ab'enyuumba yaabwe nibahubba eha. Omwandiiki Semaya omwaana wa Netaneeli, mulala hu Baleefi, naabandiikira mu moni w'omutuki, neende ow'abachweenufu, neende ow'omulaamisi Sadoki neende owa Ahimeleki omwaana wa Abbiataari, alala neende amadaala k'abalaamisi neende aka Abaleefi. Edaala lya laata mulala ohutula hu Eliasaari, nae eliindi nilidoolwa ohutula mu lya Yitamaari.

⁷ Eha yataangira yaakwa hu Yehoyiaribbu, nae eyohubiri yakwa hu Yedaya,

⁸ eyohudatu yakwa hu Harimu, eyohune yakwa hu Seyorimu,

⁹ eyohutaanu yakwa hu Milikiya, eyohusaasaba yakwa hu Mijamini,

¹⁰ eya chitaanu-na-chibiri yakwa hu Hakoosi, eya chitaanu-na-chidatu yakwa hu Abbija,

¹¹ eya chitaanu-na-chine yakwa hu Yesua, ey'ehumi yakwa hu Sekania,

¹² ey'ehumi neende ndala yakwa Eliasibbu, ey'ehumi-na-chibiri nayo yakwiira Yakiimu,

¹³ ey'ehumi-na-hadatu nayo yakwa hu Hupa, ey'ehumi neende chine yakwa hu Yesebbeyabbu,

¹⁴ ey'ehumi neende chitaanu yakwa hu Bbiliga, ey'ehumi neende chisaasaba yakwa hu Yimeeri.

¹⁵ Ey'ehumi neende chitaanu-na-chibiri yakwa Hesiiri, ey'ehumi neende chitaanu-na-chidatu yakwa hu Hapiseesi,

¹⁶ ey'ehumi neende chitaanu-na-chine yakwa hu Petahia, ey'amahumi kabiri yakwa hu Yehesikeeli,

¹⁷ ey'amahumi kabiri neende ndala yakwa hu Yahiini, ey'amahumi kabiri neende chibiri yakwa hu Gamuli,

¹⁸ ey'amahumi kabiri nahadatu yakwiira Delaya, nae ey'amahumi kabiri neende chine yakwa hu Maasia.

¹⁹ Eyo niyo engeri yi batekeherwamo ohwiichaangamo mu Nyuumba ya Nasaae ohuholaanga emirimo kyateebwao neende kuuka yaabwe Arooni, koti lu Omwaami Nasaae wa Yisiraeli yalagira.

Olunyiriri lw'Abaleefi

²⁰ Bano nibo abali abeemirisi b'amadaala kaandi akatula hu Leefi: Yehideyi, omwiichuhulu wa Amuraamu ohutula mu Sebbueli;

²¹ Yisia, omwichuhulu wa Rehabbiya;

²² Yahati, omwichuhulu wa Yisihaari ohutula mu Selomoti;

²³ Yeria, Amaria, Yehasieli, neende Yekameyami, bano bali abaana ba Hebburoni, ohuloondakana koti lu beebulana.

²⁴ Samiri, omwiichuhulu wa Wusiyeeli ohutula mu Miika;

²⁵ Sakaria, omwiichuhulu wa Wusiyeeli ohutula mu Yisihi, mwanaang'ina Miika.

²⁶ Mahili, Musi, neende Yasia, bali abeechuhulu ba Merari.

²⁷ Yasia yali neende abaana basyaani bano: Sohamu, Sakuuri, neende Yibbiri.

²⁸ Mahili yali neende abaana basyaani babiri: Eliasaari neende Kisi. Eliasaari haba siyaliho neende omwaana musyaani kata mulala.

²⁹ Kisi yali neende omwaana musyaani mulala, Yerahimeeli.

³⁰ Abaana basyaani ba Muusi nibo: Mahili, Ederi, neende Yerimooti. Bano nibo ab'enono ya Leefi koti lu bali mu madaala ka bakuuka yaabwe.

³¹ Haandi bano bosi mani nibahola abasyaabwe batula mu nono ya Arooni baholaanga. Buli muhuluundu mu nyuumba ya bakuukaang'ene neende omuyere wae, bobbaanga eha koti abasyaabwe b'enono ya Arooni mu moni w'Omutuki Daudi, Sadoki, Ahimeleki neende abeemirisi b'enyuumba ch'abalaamisi neende ech'Abaleefi.