1 Ebyomubiha 20 - EBBAIBBO EMBOOSI YA NASAAE

Daudi awaamba esiko sya Rabba

¹ Mu toocho lyaloondaho, mu siha sy'omwaaka si batuki bahira ohuchiiramo mu biita, Yoabbu yemirisa eye lyae mani naaseeta esyaalo sya Abaamooni. Nae Omutuki Daudi yadoong'a Yerusalemu. Yoabbu yebodoohania esiko sihunuufu sya Rabba, yasiseeta, mani n'asisihirisa.

² Daudi yatusa ekofia y'obutuki hu mutwe kwa Moleki, esiloongaloongwe sy'Abaamooni. Ekofia y'obutuki eyo yali ey'esaabbu, obusito bwayo bwali bwoola ekiloguraamu amahumi kadatu neende chine. Mukati wayo mwalimo amakina k'engaanga y'aakulu muno. Daudi yakatusamo mani naakata mu kofia yae. Daudi haandi yayaaya ebiindu biingi muno ohutula mu siko sihunuufu esyo.

³ Yatusamo abaandu baandi, n'abehoonyera ohuhola emirimo nibehoonyera emisumeeno, esuruuru, neende eyaaywa. Mu ngeri nasilala eyo, niyo yi Daudi abaandu boosi mu biko by'Abaamooni. Ao mani Daudi neende abaandu bae boosi nibakobolayo Yerusalemu.

Ebiita neende kirahula Kifilisiti

⁴ Luunyuma ebyo nibiweere, ebiita byakwaao akati w'Abaisiraeli neende Abafilisiti Geseri. Sibeekai ohutula Huusa niyeeta Sipai, mulala hu beechuhulu ba kirahula Kifilisiti; Abafilisiti mani nibayiingirwa.

⁵ Haandi niyibaao ebiita biindi neende Abafilisiti. Mani Elihanani omwaana wa Yairi niyeeta Lahimi mwanaang'ina Goliati ohutula Gaati, yi fumo lyae lyali neende olubaango oluhomefu koti omusiruunga kw'esyuuma siluha engubo.

⁶ Haandi niyibaao ebiita biindi Gaati, nibirimo kuwarahula kuundi okwali neende enjala chisaasaba hu buli muhono, haandi neende enjala chisaasaba hu buli sipaapa sy'ohukulu. Alala kwali neende enjala amahumi kabiri neende chine. Wuno yali omwiichuhulu wa kirahula.

⁷ Waruhula wuno niyalekeeresa Abaisiraeli, Yonatani, omwaana wa Saama, mwanaang'ina Daudi yamwiita.

⁸ Badatu bano bali abeechuhulu ba kirahula kyali Gaati, mani Daudi neende abasaacha bae nibabeeta.