1 Abatuki 4 - EBBAIBBO EMBOOSI YA NASAAE

Abahoongo bomu bwaami bwa Solomooni

¹ Solomooni yali omutuki wa Yisiraeli yoosi,

² mani bano nibo abali abahoongo b'akulu bomu bwaami bwae. Omulaamisi: Asaria omwaana wa Sadoki.

³ Abaandiiki bomu siina: Elihorefu neende Ahija, abaana ba Siisa. Abaliindi b'ebyandiiko: Yehosafati omwaana wa Ahiluudi.

⁴ Omuhoongo w'eye: Bbenaya omwaana wa Yehoyada. Abalaamisi: Sadoki neende Abbiataari.

⁵ Omuhoongo wa bagafana b'edisiturikiti, Asaria omwaana wa Natani. Abakeraki bomu dooho: omulaamisi Sabbudi omwaana wa Natani.

⁶ Omuhoongo wa bahalaabani bomu dooho: Ahisaari. Omuhoongo w'emirimo ky'obuyiike: Adoniramu omwaana wa Abbuda.

⁷ Solomooni haandi yeecha yadoola abasaacha ehumi neende babiri abaholaanga koti abaami ba disiturikiti mu Yisiraeli. Bano bali bahoyere ohusolosaanga ebyohulya ohutula mu disiturikiti chaabwe ohuleetera omutuki neende ab'edaala lyae boosi, buli musaacha mulala naahuliraanga abaasye omwoosi mulala mu buli mwaaka.

⁸ Akaloondaho kano niko ameeta k'abahoongo bano ehumi-na-babiri alala neende disiturikiti chibahuliraanga. Bbenihuuri, esyaalo sy'ebigulu sy'Efuraimu.

⁹ Bbendekeeri, biko bya Makasi, Salibbiimu, Bbeti Semeesi, Eloni, neende Bbeti Hanani.

¹⁰ Bbenihesedi, ebiko bya Arubboti neende Soko alala neende ebituundu byoosi eby'ebyaalo bya Hefeeri.

¹¹ Bbenabbinadabbu, owali yadeehya Tafati omuhaana wa Solomooni, esituundu syoosi esy'esyaalo sya Doori.

¹² Bbaana omwaana wa Ahiluudi, ebiko bya Tanaki, Megido, neende esituundu syoosi esy'esyaalo siri aambi neende Bbeti Saani, aambi neende esiko sya Saretaani, emwaalo w'esiko sya Yesireeli, ohwoolera elalira hu siko sya Abbeli-Mehola neende esiko sya Yokimeamu.

¹³ Bbengebbeeri, esiko sya Ramoti mu Gileadi, haandi neende engoongo chomu Gileadi ech'enono ya Yairi, omwiichuhulu wa Manaase, haandi neende esituundu sy'esyaalo sya Arigobu esiri mu Bbasaani, ebiko bitabaafu muno amahumi kasaasaba byoosi ohuyirira alala, ebyasitwa neende ebida haandi neende emitaliimbo ky'omugasa hu biruwa.

¹⁴ Ahidadabbu omwaana wa, Yido disiturikiti ya Mahanaimu!

¹⁵ Ahimaasi, owali niyadeehya Bbasemaati, owali omuhaana wuundi wa Solomooni, esituundu sy'esyaalo sya Nafutaali.

¹⁶ Bbaana omwaana wa Husaai, esituundu sy'esyaalo sya Aseri haandi neende esiko sya Bbealooti.

¹⁷ Yehosafati omwaana wa Parua, esituundu sy'esyaalo sya Yisakari.

¹⁸ Simei omwaana wa Ela, esituundu sy'esyaalo sya Bbenjamini.

¹⁹ Gebberi omwaana wa Wuri, esituundu sy'esyaalo sya Gileadi, esyali syatukwaho neende Omutuki Sihooni ow'Abaamoori haandi neende Omutuki Ogu owa Bbasani. Haandi n'omalireho ehumi-na-babiri bano, haandi yaliyo gafana owuundi oyira esyaalo esyo syoosi.

Obwaami bwa Solomooni obweehulaahulana

²⁰ Abaandu ba Yuda neende Yisiraeli bali obuduhunyi koti sa emoni ch'omusenye kwohusikobero sy'enyaanja; balichaanga haandi bamala bang'wa mani basaangaala.

²¹ Obwaami bwa Solomooni bwali nibuyiriramo neende ebyaalo byoosi ebiri ohutulira hu Mwaalo Ewufuraate ohwoolera elalira hu Filisiti, haandi neende hu lwaaho lwa Misiri. Byamutuungaanga emisolo mani byali nibimweebaliraho mu bulamu bwae bwoosi.

²² Obuhoonyi bu Solomooni yadahaanga hu buli nyaanga bwalichiingi elita elifu chitaanu (5,000) ech'obusye bunyuhe muno, haandi neende elita elifu ehumi (10,000) ech'obusye bwa buli nyaanga;

²³ eng'oombe ehumi echiliisirwa mu bidwooli, eng'oombe amahumi kabiri echaaya makeenda, amakoondi emia ndala (100), n'otateereho neende emboongo, ehulo, ebijusu alala neende amayoni matuke koosi.

²⁴ Solomooni yatukaanga esyaalo syoosi esyali emuumbo w'Omwaalo kwa Ewufuraate, ohutulira elalira hu Tifusa hu Ewufuraate ohwoolera elalira emuumbo bweene hu siko sya Gasa. Abatuki boosi abalichiingi emuumbo wa Ewufuraate balichiingi aasi wae, haandi yalichiingi neende omuleembe neende ebyaalo byoosi ebyamusibiranaanga.

²⁵ Koti lu yabechaanga n'asisiiri omulamu, abaandu bali mu Yuda neende mu Yisiraeli bamenyaanga mu buliindi bulai, buli daala lyalichiingi neende emisaala emisabbiibbu haandi neende emisaala emituli.

²⁶ Solomooni yali neende ebidwooli elifu amahumi kane (40,000) amalaamba eby'efaraasi chihweesa ebigaari bilwaana amaye, neende efaraasi chiindi elifu ehumi neende chibiri (12,000).

²⁷ Abaami bae bala ehumi-na-babiri, buli otula mu mwoosi kwaaba n'adoleerwemo ohumuhoonya, yayiraanga ebyohulya bi Mutuki Solomooni mweene yehoonyeraanga alala neende abo boosi abalichaanga mu dooho omwo; abo boosi banyalaanga ohuleeta buli siindu syadahibwaanga.

²⁸ Buli mwaami oyo yaletaanga omukabo kwahabeere okwae okwa (amabere masuungu) neende ehaanja chahwo cheene, nibyalichiingi nibidahibwa; hulw'efaraasi ch'ebigaari haandi neende ebisolo by'esiminyu.

²⁹ Nasaae yaberesa Solomooni amakesi kataali aka buli ludaalo neende ohubaasa ebiicha mu moni, haandi neende obumanyirifu buhunuufu obubitiirifu.

³⁰ Solomooni yali omukesi ohira abaandu boosi ab'ebukwe kata abaandu bakesi boosi aba Misiri.

³¹ Yali omukesi ohira abaandu boosi, omukesi ohira Etani Omuesira, neende Hemani, Kalikoli, neende Darida, abaana ba Maholi, mani ohumanyihana hwae hwasalaana hwaamalaho ebyaalo byoosi ebyamusibirana.

³² Yandiika engaado elifu chidatu (3,000), alala neende enyembo chihira elifu ndala (1,000).

³³ Yalomalomaanga hu misaala neende ebimera, ohutulira elalira hu miseengese kya Lebbanooni, ohwoolera elalira hu booha limera hu bida; yalomalomaanga hu bisolo, amayoni, ebyomu maachi neende eng'eeni.

³⁴ Abatuki balichiingi mu syaalo syoosi banyala ohuwuliraho hu makesi kae mani baatumaanga abaandu ohuchia ohumutekeeresaanga.