1 Abakoriito 3 - EBBAIBBO EMBOOSI YA NASAAE

Abahalaabani ba Nasaae

¹ Nae ese, baana beefwe, haba sindahanyalire ohubalomalomera koti olomalomera abo abali neende mwooyo daawe, nae koti eyiri abaandu abali neende omubiri kwoong'ene, haandi koti abali abaana badoto mu Kristo.

² Ese ndabang'wesaanga sa amabeere, nae haba sindabaliisanga ebyohulya byoomeranu daawe; olwohuba eng'we mwali nimutaaba abanyala ohubilya; haandi kata katyo kata bulaanu buti mutaaba abanyala ohulya ebyo,

³ olwohuba eng'we musisiiri sa abaandu b'omubiri kwoong'ene. Olwohuba nikali mbwe eng'we musisiirimo ebihali-hali neende ohuyinduulana, haba simuba nimusisiiri abaandu bali neende omubiri kwoong'ene, haandi nimweebisa sa koti abaandu ba buli ludaalo?

⁴ Olwohuba nikali mbwe omuundu wuundi aboola sa ati, “Ese ndi owa Paulo,” nae owuundi ati, “Ese ndi owa Apolo,” ao haba simuba nimuli sa koti abaandu ba buli ludaalo?

⁵ Bulaanu, Apolo wuno niye siina syeene? Paulo nae ni siina syeene? Bano boosi bahalaabani sa bamwabitiramo mwanyala ohufukiirira koti lu Omwaami mweene yali n'abatekeheere buli mulala.

⁶ Ese ndataaka, Apolo nae yaachuhiirira, nae Nasaae mweene niye owahusa.

⁷ Mani sakira, kata oyo oba niyataaka oba oyo yeesi oba niyachuhiirisaho amaachi haba saaba naali esiindu syoosi esihuluundu, ohutusaho Nasaae oyo ohusaanga yeeng'ene.

⁸ Oyo oba n'ataakaanga, neende oyo oba n'achuhiiriraanga amaachi, boosi baakanirira, haandi buli otula achia ohunyoola omusaara kwae okuchiana neende obuhalaabani bwae koti lu bwaaka.

⁹ Olwohuba, efwe fweesi huli sa abahalaabani baholera alala neende Nasaae; eng'we naang'we muli endalo chae, haandi Ebyoombahe bya Nasaae.

¹⁰ Ohweema hu mbabaasi cha Nasaae chi ndaberesebwa, ni ndi koti omwoombahi muhuluundu mumanyirifu, ndanyala ohutaao omusiingi, nae omuundu wuundi ali ohwoombahaanga hu bweene ohwo. Mulehe buli muundu yeesi yehaliirise koti lwaaba naali ohwoombahaanga hu bweene ohwo.

¹¹ Olwohuba abulao omusiingi kuundi ku muundu wuundi anyala yataao, ohutusaho okwo okwamala ohuteebwao, okuli Yesu Kristo.

¹² Mani bulaanu, omuundu yeesi naaba naali ohwoombaha hu musiingi okwo neende efeesa, ebichuma, amakina malai muno, embaao, obunyaasi, amasaanyi

¹³ buli mulimo kw'omuundu yeesi, kuchia ohweyekesa okweene; olwohuba Oludaalo olwo luchia ohukubakala alafu, olwohuba kuchia ohweyekesera mu muliro, haandi omuliro okwo kuchia ohupiima engeri ya buli mulimo ku buli muundu aba niyahola koti lu kufwaana.

¹⁴ Nikali mbwe esyoombahe si muundu yeesi aba niyoombaha hu musiingi okwo si nyala ohuwonamo, aba achia ohunyoola esisiimo.

¹⁵ Nae esyoombahe sy'omuundu yeesi nisiya sa omuliro, omuundu chana oyo aba achia ohutulaho sa atyo. Omweene aba achia ohuwonisibwa, nae kata katyo koti oyo owabiinwe sa mu muliro.

¹⁶ Eng'we haba simumanyire muti muli Enyuumba ya Nasaae daawe, haandi muti Mwooyo wa Nasaae yesi yabamenyamo?

¹⁷ Omuundu yeesi n'anyaasa Enyuumba ya Nasaae, Nasaae mweene aba achia ohumusihirisa yesi. Olwohuba Enyuumba ya Nasaae yiba niyiri enjolerefu, nihaandi Enyuumba ya Nasaae eyo niyo ewe mweene.

¹⁸ Mulehe omuundu yeesi alehe ohweebacha omweene. Oyo yeesi mweeng'we obaasa ati ali omukesi muno mu luse luno, mulehe yeehole omusiru hu yeemeo anyale ohuba omukesi.

¹⁹ Olwohuba amakesi k'esyaalo sino n'obusiru bweene eyiri Nasaae. Olwohuba syandiikwa siti, “Nasaae adiiriraanga abakesikesi mu bukodyo bwaabwe abeene,”

²⁰ haandi siti, “Omwaami amanyire ati ebibaaso by'omuundu mukesikesi, bisiru bihaya.”

²¹ Sakira mulehe omuundu yeesi atachaakaho ohweniinia hulw'abaandu sa. Olwohuba ebiindu byoosi nebyeeng'we,

²² ayahaba naali Paulo oba Apolo oba Keefa oba esyaalo sino oba obulamu oba ohufwa oba esiha sino oba esiha siicha, byoosi nebyeeng'we sa;

²³ nae haandi eng'we mweesi muli abaandu ba Kristo; nae Kristo mweene wa Nasaae.