Yowaana 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yesu neende Nikodemu

¹ Bulaanu yaluwo mulala hu Bafarisaayo, eliita lyae Nikodemu, owali omweemeresi w'Abayudaaya.

² Omusaacha wuno yeechia eyiri Yesu mu siro, mani n'amuboolera ati, “Rabbi, humanyire huti oli omweekesa otula eyiri Nasaae; olwohuba abulao onyala ohuhola obulolero bw'ewe ohola, ohutusaho Nasaae naali nae.”

³ Yesu yamukobolamo ati, “Mubwadyeeri bweene, huboolera endi, oyo yeesi oteebulwa buyaaha, haba saanyala hubona Obwaami bwa Nasaae.”

⁴ Nikodemu yamuteeba ati, “Omuundu ohulire anyala atye ohwiibulwa haandi? Anyala ohwiingira mu nda ya ng'ina haandi yeebulwa ehabi lyohubiri?”

⁵ Yesu yakobolamo ati, “Huboolera obwadyeeri bweene endi, omuundu yeesi n'ateebulwa mu maachi neende Mwooyo Mwoolerefu, haba s'anyala ohwiingira mu Bwaami bwa Nasaae.

⁶ Esiibulwa neende omubiri siba omubiri, nae esyo esiibulwa neende Mwooyo siba mwooyo.

⁷ Otesiinduha muno oti huboolere endi, ‘Ohoyere ohwiibulwa buyaaha.’

⁸ Omuyaka kuwucha nikuchiira yi kudaha, haandi owulira ohuwuuma hwaakwo, nae haba s'omanyire yi kutulira, oba yi kuchiira; mani nilwo lu biri neende oyo owiibulwa neende Mwooyo.”

⁹ Nikodemu yateeba Yesu ati, “Sino si nyala sitye ohubaao?”

¹⁰ Yesu yamukobolamo ati, “Ewe oli omweekesa wa Yisiraeli, nae haba s'omanyire sino?

¹¹ Huboolera obwadyeeri endi, efwe hulomaloma bi humanyire, haandi si hwabona nisyo si hweekesa; nae eng'we haba simufukiirira bi hweekesa.

¹² Mani nikali mbwe ese huboolere ebiindu by'ohusyaalo huno, nae haba s'ofukiirira, onanyala otye ohufukiirira nihuboolera ebiindu byomu kulu?

¹³ Abulao oyo owaniinaho Muukulu, ohutusaho oyo oweeha naatula Muukulu, Omwaana w'Omuundu.

¹⁴ Koti lu Musa yaaniha endemo y'esikomo hu musaala mu siparara, olwo nilwo lu Omwaana w'Omuundu ahoyere ohwaanihwa,

¹⁵ mani buli muundu yeesi omufukiiriramo anyoole obulamu butaakama.”

¹⁶ Olwohuba Nasaae yaheera esyaalo muno, sakira yatusa Omwaana wae mudeerwa, mbwe buli yeesi omufukiiriramo ahaye ohusihiriswa, nae anyoole obulamu butaakama.

¹⁷ Olwohuba Nasaae haba siyatuma Omwaana wae hu syaalo ohusiheengera omusaango, nae yamutuma mbwe esyaalo sinyale ohuwonisibwa ohubitira mu Mwaana wae.

¹⁸ Oyo yeesi omufukiiriramo haba saheengerwa omusaango ohumuhira; nae oyo otamufukiirira yamala ohuheengerwa omusaango ohumuhira hale, olwohuba oyo haba siyafukiirira mu Omwaana mudeerwa wa Nasaae.

¹⁹ Kuno nikwo omusaango. Obulafu bweecha mu syaalo, nae abaandu nibaheera esiirima ohuhira obulafu, olwohuba ebiholwa byaabwe bibi.

²⁰ Olwohuba buli muundu ohola bubi, asyuula obulafu, haandi haba siyeecha eyiri obulafu, ebiholwa byae bihaye huboneha daawe.

²¹ Nae buli muundu oholera hu bwadyeeri, yeecha eyiri obulafu, obulafu bwekese buti ebiholwa byae bibonehe koti ebiholebwa mu Nasaae.

Yesu neende Yowaana Omubatiisi

²² Luunyuma Yesu neende abeeki bae bachia mu syaalo sya Yudea; naaba eyo nabo, naabatiisa.

²³ Yowaana yesi yali n'abatiisira Ayinooni aambi neende Salimu, olwohuba amaachi kaliyo amaangi muno. Abaandu mani nibachiayo babatiisibwe.

²⁴ Yowaana yali asisiiri ohuyirwa mu jeela.

²⁵ Nae bulaanu, ohuyingana hwabaao akati w'abeeki ba Yowaana neende Omuyudaaya wuundi ohudiira hu musiro kw'ohwelabya.

²⁶ Bachia eyiri Yowaana baamuboolera bati, “Rabbi, oyo owali naawe nooli engereha w'omwaalo kwa Yorodaani, yi walomalomaho, bulaanu buti ali ohubatiisa, haandi abaandu boosi bali ohuchia yi ali.”

²⁷ Yowaana yakobolamo ati, “Abulao omuundu yeesi onyala ohunyoola esiindu syoosi ohutusaho n'asibereeswe ohutula Muukulu.

²⁸ Eng'we beene mwesi munyala mwaandusira obuloli muti, ndaboola endi, ‘Ese si ndi Kristo, nae ndatumwa ohumutaangirira ohwiicha.’

²⁹ Oyo oli neende omweeya y'adehiisye, aba aambi mani amuwulira, haandi asangaala muno n'awulira ekono ly'oyo odehiisye omweeya. Mani elyo nilyo esangaalo li mbulira mu mwooyo.

³⁰ Mani oyo ahoyeere ohuniinisibwa nae ese ohwiiha.”

Oyo owiicha n'atula Muukulu

³¹ Oyo owiicha n'atula aakulu ahira boosi. Oyo otula hu syaalo, aba owohu syaalo, haandi alomaloma ebyohu syaalo. Oyo otula Muukulu niye ohira boosi.

³² Alomaloma hu bi yabona neende hu bi yawulira, nae abulao omuundu ofukiirira emboosi echo.

³³ Nae oyo ofukiirira emboosi chae yomiisa ati, Nasaae wadyeeri.

³⁴ Olwohuba oyo yi Nasaae yatuma alomaloma emboosi cha Nasaae, olwohuba Nasaae amuberesa Mwooyo wae mu bwiichufu.

³⁵ Laatang'ene Mwaana yaheera muno Omwaana wae, haandi yata ebiindu byoosi mu bunyala bwae.

³⁶ Mani ofukiirira Omwaana, ali neende obulamu butaakama. Nae oyo otafukiirira Omwaana abula obulamu butaakama, haandi Nasaae adoong'a n'amudiiriire egiili.