Yowaana 18 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohudiirwa hwa Yesu

¹ Yesu niyamala ohulomaloma emboosi chino, yasiingira yaawaao neende abeeki bae, nibachia engereha w'ehooho lilaangwa liti Kidironi. Endalo yali abuundu ao, mani Yesu neende abeeki bae nibayiingiramo.

² Nae Yuda, oyo owali achia ohumuhoba, yali amanyire abuundu ao; olwohuba Yesu yachichaangao amahabi maangi neende abeeki bae.

³ Yuda yanyoola omukaanda kw'abasikaari neende abahalaabani ohutula ew'abalaamisi bahuluundu neende Abafarisaayo. Bali neende amataara neende etoochi neende ebilwaaniso.

⁴ Yesu yali amanyire ebyo byoosi ebyali bicha ohumukwaaho, mani omweene niyeecha yi bali naabateeba ati, “Mukoonyaanga wiina?”

⁵ Mani nibamukobolamo bati, “Yesu wa Nasareeti.” Yesu yababoolera ati, “Niise oyo.” Nae Yuda wamuhoba, yali niyeemere nabo.

⁶ Yesu niyababoolera ati, “Niise oyo,” beseenda enyuma mani beesiinduha baakwa aasi.

⁷ Yesu haandi yaabateeba ehabi lyohubiri ati, “Mukoonyaanga wiina?” Mani nibamukobolamo bati, “Yesu wa Nasareeti.”

⁸ Yesu yakobolamo ati, “Mbabooleere endi Niise oyo; mani nimuli ohuungoonya, mulehe bano baweeo.”

⁹ Yesu yaboola atyo, hu mboosi yi yalomaloma yoolerere abweene yiti, “Hu abo ba wamberesa, haba sindakosaho kata mulala daawe.”

¹⁰ Simooni Petero yali neende olugaanga, mani n'alusobolayo, n'atema omuwaambe w'Omulaamisi muhuluundu, n'amumalaho ohutwi hw'omuhono muluungi. Eliita ly'omuwaambe oyo lyali mbwe Malukusi.

¹¹ Yesu yaboolera Petero ati, “Kobosa olugaanga lwao mu silaalo syalwo. Obaasa oti siindang'wa esikoombe syohusaanda si Laata yambereese daawe?”

Yesu naali mu moni wa Anasi

¹² Omukaanda kw'abasikaari neende abeemirisi baabwe alala neende abahoongo b'Abayudaaya beemao baadiira Yesu, mani baamuboya.

¹³ Bataangira ohumuyira eyiri Anasi; olwohuba Anasi oyo yali muhweeng'ene Kayaafa, owali Omulaamisi muhuluundu mu mwaaka okwo.

¹⁴ Kayaafa oyo niye owali hale niyakerakiraho Abayudaaya ati, silai omuundu mulala ohufwiira abaandu boosi.

Petero yekaana Yesu

¹⁵ Simooni Petero neende omweeki wuundi bamala baaloonda hu Yesu. Omweeki wuundi oyo owali naamanyihaane eyiri Omulaamisi muhuluundu, yeengira mu lwaanyi lw'Omulaamisi muhuluundu oyo alala neende Yesu.

¹⁶ Petero nae yadoong'era erwaanyi hu siruwa. Omweeki wuundi oyo, owali naamanyihaane eyiri Omulaamisi muhuluundu, yatula erwaanyi yaalomaloma neende omuhalaabani muhaana owali naaliindire esiruwa, mani niyeengisa Petero yesi mukati.

¹⁷ Omuhalaabani muhaana owali n'aliindire esiruwa yateeba Petero ati, “Ewe wesi haba sooli mulala hu beeki b'omusaacha wuno?” Petero yakobolamo ati, “Haba daawe.”

¹⁸ Bulaanu abahalaabani alala neende abahoongo bali nibabwaanire omuliro kw'amaanda, olwohuba emboo nyiingi yaliho, bali nibeemere ao niboota omuliro.

Omulaamisi muhuluundu ateeba Yesu ebiteebo

¹⁹ Omulaamisi muhuluundu yeemao yaateeba Yesu ebidiira hu beeki bae neende hu njekesa yae.

²⁰ Yesu yamukobolamo ati, “Ndalomalomaanga neende abaandu alafu, buli siha ndeekesaanga mu Sinagoogi neende mu Nyuumba ya Nasaae, yi Bayudaaya boosi bebuusiraanga alala; sibulao esiindu syoosi si ndalomalomaanga mu bweekisi.

²¹ Lwasiina ewe wundeeba otyo? Teeba abo abawuliraanga bi ndababooleraanga; abo bamanyire bi ndababooleraanga.”

²² Yesu niyamala ohuboola atyo, mulala hu bahoongo owali niyeemere aambi nae yamupaama oluyi mani yaamuteeba ati, “Eyo niyo engeri yi wahakoboleramo Omulaamisi muhuluundu?”

²³ Yesu yamukobolamo ati, “Nikali mbwe nomanoome bubi, yekesaho abaandu bali anao obubi obwo; nae nikali mbwe nomanoome bulai, lwasiina wumbaama?”

²⁴ Mani Anasi naatuma Yesu eyiri Kayaafa owali Omulaamisi muhuluundu.

Petero haandi yekaana Yesu

²⁵ Simooni Petero yali yeemere ao niyoota omuliro. Bamuteeba bati, “Wesi oli mulala hu beeki bae?” Nae yekaana n'aboola ati, “Haba daawe.”

²⁶ Mulala hu bahalaabani b'Omulaamisi muhuluundu, owali omunaluyia w'omusaacha yi Petero yatemaho ohutwi yateeba ati, “Ese haba siihubweeneho nae mu ndalo?”

²⁷ Petero haandi naasyekaana. Abweene-na-bweene ao, mani edaaywa niyiholyooha.

Yesu aleetwa mu moni wa Pilato

²⁸ Nibwahya oludaalo luloondaho mu mabwiibwi, batusa Yesu ewa Kayaafa ohumuyira, mani nibamuyira mu dooho lya gafana elilaangwa liti “Purayitorio”. Abayudaaya beene haba sibeengira mu Purayitorio, nibatadaha ohuhalaka omusiiro kwohweelabya, hu banyale ohulya esidyaalo sya Paasaka.

²⁹ Pilato yatula yaachia yi bali mani yaabateeba ati, “Musaango siina ku musitaaka omuundu wuno?”

³⁰ Bamukobolamo bati, “aba naataali neende omusaango, haba sihwahamuleetere yooli.”

³¹ Pilato yababoolera ati, “Eng'we mumuyire mani abeene mumuheengere omusaango nimuloondakana neende amalako keeng'we abeene.” Abayudaaya bamuboolera bati, “Efwe haba sihufukiirirwa ohwiita omuundu yeesi.”

³² Esyo syeelomaloma ohwooseresa emboosi yi Yesu yali naalomaloome, niyeekesa engeri yi yali achia ohufwiiramo.

³³ Pilato yeengira haandi mu Purayitorio mani yaalaanga Yesu, yaamuteeba ati, “Niiwe omutuki w'Abayudaaya?”

³⁴ Yesu yakobolamo n'ateeba ati, “Esyo osilomaloome hulwao omweene, kose abaandi nibo abahuboleere ebindiiraho?”

³⁵ Pilato yakobolamo ati, “Ese ndi Omuyudaaya? Abaandu b'esyaalo syao beene alala neende abalaamisi bahuluundu nibo abahundeeteere ano. Oholere siina syeene?”

³⁶ Yesu yakobolamo ati, “Obutuki bwaange haba si bwohu syaalo huno daawe; obutuki bwaange buba nibuli obwohu syaalo huno, abahalaabani baange bahaanwaaniire, ndaahaya ohudiirwa neende Abayudaaya; nae obutuki bwaange haba si bwohu syaalo huno daawe.”

³⁷ Pilato yamuteeba ati, “Syeekesa oli omutuki?” Yesu yakobolamo ati, “Oboola oti ndi omutuki. Olwohuba sino nisyo esyakera ndeebulwa, haandi nisyo eyakera ndeecha hu syaalo, ohweekesa obwadyeeri. Buli muundu odaha obwadyeeri, awulira ekono lyaange.”

³⁸ Pilato yamuteeba ati, “Obwadyeeri nisyo siina?” Pilato niyamala ohulomaloma atyo, yatula haandi yaachia erwaanyi eyiri Abayudaaya, mani yaababoolera ati, “Ese haba siimubonahooho omusaango kwoosi.

Yesu aheengerwa omusaango kw'ohufwa

³⁹ Nae eng'we mwanala muti hoyeere ohubalehuuliraanga omuboye mulala hu buli sidyaalo sya Paasaka; bulaanu mudaha mbalehuulire omutuki w'Abayudaaya?”

⁴⁰ Nabo bayokerera aakulu nibaboola bati, “Wuno haba, nae Bbarabba!” Bbarabba oyo yali omunyaka.