Yowaana 14 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yesu niye engira yicha eyiri Laata

¹ “Muteelalihiraanga mu myooyo kyeeng'we. Fukiirire mu Nasaae, haandi mufukiirire mweese syesi.

² Mu nyuumba ya Laata mulimo ebiseenge ebiingi. Siba nisitaali sityo, haba sindahababoleere endi njia ohubatekehera obwiihalo.

³ Nindahabe malire ohuchia, nimbatekeheere obwiihalo, ndahakobole mani mbayire yi ndi, mani mwesi mube eyo yi ese ndi.

⁴ Mumanyire engira yichia yi njia.”

⁵ Tomasi nae yamuteeba ati, “Omwaami, y'ochia haba sihumanyireo, hunyala hutye ohumanya engira yichaayo?”

⁶ Yesu yamuboolera ati, “Ese ndi engira yaachana, obwadyeeri, neende obulamu. Abulao onyala ohwoola eyiri Nasaae, naatabitiire hweese.

⁷ Muba nimuumanyire, Laata yesi muba mwahamumanyire. Haandi ohwoola buti mumumanyire kata mumalire neende ohumubona.”

⁸ Filipo yamuboolera ati, “Omwaami, tweekeseho Laata, esyo nisyo si hudaha sa.”

⁹ Yesu yamukobolamo ati, “Filipo, ndahaba naang'we esiha sino syoosi, nae musisiiri ohuumanya? Oyo owuumbona, aba abweene Laata. Obeere otye ohuboola oti, ‘Tweekeseho Laata’?

¹⁰ Haba simufukiirira muti ndi mu Laata haandi muti Laata yesi ali mweese? Emboosi chino chi nomanoma haba sichilomaloma hulwaange omweene. Laata oli mweese omwene niye ohola emirimo.

¹¹ Mufukiirire nimbaboolera endi ndi mu Laata, haandi endi Laata yesi ali mweese. Ataali ao, muufukiirire hulw'ebiholwa byeene ebyo bi hola.

¹² “Mbaboolera obwadyeeri bweene endi, oyo yeesi owuufukiirira, ebiholwa bi hola yesi achia ohubihola, haandi yahahole ebihiraho ao; olwohuba ese njia eyiri Laata.

¹³ Haandi buli siindu syoosi si munaasabeenge Laata mu liita lyaange, njia ohusiholaanga, hu bulaanu Laata yeeswemo oluyaali ohubitira mu Mwaana.

¹⁴ Nimunaasabeenge esiindu syoosi mu liita lyaange, njia ohusiholaanga.

Yesu asuubisa Mwooyo Mwoolerefu

¹⁵ “Nimuuheera, muchia ohudiiraanga amalako kaange.

¹⁶ Syesi njia ohusaba Laata, mani ababerese Omukeraki wuundi, oyo ochia ohubechaanga naang'we endaalo choosi.

¹⁷ Oyo niye Mwooyo owadyeeri yi syaalo sitanyala ohunyoola, olwohuba esyaalo haba sisimubona haandi sisimumanyire daawe. Nae eng'we mumumanyire, olwohuba ali mweeng'we, haandi anabechaanga mweeng'we.

¹⁸ “Haba siinjia ohubaleha koti abaana bafwiirwe daawe; nae njia ohwiicha yi muli.

¹⁹ Mu biha bidiidi ohutula buti, esyaalo haba sisichia ohuumbona daawe, nae eng'we muchia ohuumbona. Olwohuba ndi omulamu, mwesi mwahabe abalamu.

²⁰ Hu ludaalo olwo, mwahamanye koti lu ndi mu Laata, haandi koti lu eng'we muli mweese, haandi koti lu syesi ndi mweeng'we.

²¹ Oyo owuwulira amalako kaange mani yaakadiira, niye oba niyaheera. Laata achia ohuheeraanga oyo owuheera, syesi njia ohumuheeraanga, haandi njia ohweyekesaanga yaali.”

²² Yuda (otaali Yisikarioti) yamuteeba ati, “Omwaami, ochia ohweyekesa otye yi huli, nae waahaya ohweyekesa eyiri esyaalo?”

²³ Yesu yakobolamo ati, “Buli muundu owuheera, achia ohudiiraanga emboosi chaange, haandi Laata achia ohumuheeraanga. Ese neende Laata huba hwaheeche yaali mani humenye nae.

²⁴ Oyo owutaaheera, haba saadiira emboosi chaange daawe. Haandi emboosi chi muwulira haba sichaange, nae cha Laata waanduma.

²⁵ “Mbaboleere ebyo nisisiiri naang'we.

²⁶ Nae Omukeraki, Omwooyo Mwoolerefu oyo, yi Laata achia ohutuma mu liita lyaange, yahabeekese ebiindu byoosi, haandi yahabeechulise ebyo byoosi bi ndababoolera.

²⁷ Mbalehera omuleembe; mbaberesa omuleembe kwaange. Haba simbaberesa omuleembe koti lu syaalo siberesa daawe. Mutaleha emyooyo kyeeng'we kyeelalihira, haandi kyaatya daawe.

²⁸ Muwuliire koti lu mbabooleere endi mbwaao haandi njia ohukobola yi muli. Muba nimwaaheera, mwahasangaalire, olwohuba njia eyiri Laata; olwohuba Laata muhunuufu ohuuhira.

²⁹ Mbabooleere esyo bulaanu nisisisiiri ohukwaao, hu bulaanu nisyahakweeo, munyale ohufukiirira.

³⁰ Ese haba siinjia ohulomaloma naang'we ebiindu biingi daawe, olwohuba omutuki w'esyaalo yeechia, nae haba saali neende obunyala bwoosi hweese.

³¹ Nae ese hola koti lu Laata aba niyandagiire, hu syaalo sinyale ohumanya siti, ese ndaheera Laata. Musiingire, lehe hutule ano.