Yowaana 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yesu abahwa amafuta naali Bbetani

¹ Chali chidoong'ereyo endaalo chisaasaba esidyaalo sya Paasaka ohwoola. Mani Yesu niyeecha Bbetani, eyiri Lasaaro yi yasyuuhisa mu bafu yali niyamenya.

² Bamudeeherayo esy'engoloobe; mani Marita yaabakabula ebyohulya. Lasaaro yali mulala hu bali nibehaale neende Yesu ohulya.

³ Maria yabukula echupa yirimo amafuta k'ebbeyi hoongo muno, akawunya bulai muno, yaakabaha hu makulu ka Yesu, mani n'akapaangusa neende efwiiri lyae. Enyuumba yoosi yeechulamo esing'aari sy'amafuta ako.

⁴ Nae Yuda Yisikarioti, mulala hu beeki ba Yesu, (oyo owali achia ohumuhoba), yaboola ati,

⁵ “Lwasiina amafuta kano haba sikakusirwemo edinaari emia chidatu (300), mani chaakabwa abamanani?”

⁶ Yaboola sino, ataali mbwe yali achuunirwa muno abamanani, nae olwohuba yali omwiibi. Niye owali omubiihi w'esanduku ly'eseende, haandi yali yanaliirira ohwiibaanga eseende chi babihaangamo.

⁷ Yesu yaboola ati, “Mulehe omuhasi wuno abe, leha abiihe amafuta ako hulw'oludaalo lw'ohusiihwa hwaange.

⁸ Abamanani muli nabo endaalo choosi, nae haba simuchia ohubechaanga naange endaalo choosi daawe.”

Ohukiiya ohwiita Lasaaro

⁹ Esidiiyiha sihoongo sy'Abayudaaya nisyamanya siti Yesu yali Bbetania, bachaayo ataali hulwa Yesu yeeng'ene, nae neende hulwa Lasaaro, yi Yesu yali niyasyuuhisa ohutula mu bafu.

¹⁰ Abalaamisi bahuluundu mani nibakiiya amakesi k'ohwiita Lasaaro yesi,

¹¹ olwohuba hulwa Lasaaro, Abayudaaya baangi bali nibabatulireho, nibafukiriire mu Yesu.

Yesu yeengira mu Yerusalemu neende oluyaali

¹² Nae hu ludaalo luloondaho, abaandu baangi muno abali beechere hu sidyaalo esyo nibawulira bati Yesu yali achia ohwiicha Yerusalemu,

¹³ babukula amasaga k'emisaala ky'amahiindu, baachia ohumubukaanira, neende esangaalo nibaboola bati, “Hosaana! W'ehabi oyo owiicha mu liita ly'Omwaami, haandi Omutuki wa Yisiraeli!”

¹⁴ Yesu yanyoola esuhiri njere mani yaayihalaho; koti lu syandiikwa siti,

¹⁵ “Omuhaana wa Siyooni, otatya daawe; bona, omutuki wao nguyo yeecha, niyehaale hu suhiri njere!”

¹⁶ Abeeki bae nabo haba sibamanyirao amahuluundu k'ebyo; nae Yesu niyabereswa oluyaali, niwo yi beechulisira bati ebyo byali byamwandiikwaho, haandi byamuholerwaho.

¹⁷ Esidiiyiha syali nae ludaalo lu yalaangiraho Lasaaro ohutula mu ng'ani mani yamusyuuhisa ohutula mu bafu, bali nibakaniaayire bi yali n'aholere.

¹⁸ Esyo nisyo esyakera esidiiyiha sy'abaandu beeyiha ohwiicha ohumubukaanira, olwohuba bali nibawuliire koti lu yahola ahalolero aho.

¹⁹ Abafarisaayo nabo babbwoyooha sa mani baaboolanira abeene-na-beene bati, “Mubone koti lu huhayirwe! Esyaalo syoosi siwereere yi ali.”

Abagiriki baandi bakoonya ohubona Yesu

²⁰ Mu baandu bali bachiire ohwiinamira Nasaae hu sidyaalo esyo, mwalimo Abagiriki baandi.

²¹ Mani nibachia eyiri Filipo, owali atula Bbetisaida mu Galilaaya, mani nibamuboolera bati, “Omuhuluundu, hudahaho ohubona Yesu.”

²² Filipo yachia yaboobera Anderea; mani Anderea neende Filipo nibaboolera Yesu.

²³ Yesu yabakobolamo ati, “Esiha syahoola, Omwaana w'Omuundu anyoole oluyaali.

²⁴ Mbaboolera obwadyeeri endi, olumwo lw'engaano nilutaakwa mu loba mani lwaafwa, ludoong'a ao lwoong'ene; nae nilufwa, lwaamaho ebyaamo biingi.

²⁵ Buli oheera obulamu bwae, yahabufwiirwe. Nae osyuula obulamu bwae mu syaalo, yahabwebiihire mu bulamu butaakama daawe.

²⁶ Oyo owuuhalaabanira, yanoonda. Ese yi ndi, omuhalaabani waange yesi niwo yi yahabecheenge. Omuundu yesi-yesi owuuhalaabanira Laata yahamusiime.

Yesu alomaloma hu hufwa hwae

²⁷ “Bulaanu omwooyo kwaange kweelalihiire muno. Ndaaboole endye? Laata, monie esiha sino? Haba daawe, nae haandi esyakera ninjicha nisyo ohwoola hu siha sino.

²⁸ Laata, yisa mu liita lyao oluyaali.” Mani ekono nilitula Muukulu liti, “Ndaliisamo hale oluyaali, haandi njia ohuliisamo oluyaali.”

²⁹ Esidiiyiha sy'abaandu syali syeemere ao nisyaliwulira, sy'aboola siti, ekulu lyali lyaaduluha. Abaandi nabo baboola bati, “Malaika alomaloome nae.”

³⁰ Yesu yabakobolamo ati, “Ekono lino siliichire hulwaange, nae hulweeng'we.

³¹ Bulaanu esyaalo sichia ohuheengerwa omusaango, bulaanu omutuki w'esyaalo sino achia ohusukunwa erwaanyi.

³² Syesi nindahamale ohuniinisibwa ohutula hu syaalo, njia ohubuusa boosi mbasudye yi ndi.”

³³ Yesu yaboola atyo, niyeekesa engeri yi yali achia ohufwiiramo.

³⁴ Esidiiyiha sy'abaandu syamukobolamo siti, “Efwe mu malako hwawulira huti, Kristo yahabeeo endaalo choosi pe. Naawe onyala otye ohuboola oti, Omwaana w'Omuundu ahoyere ohuniinisibwa aakulu? Omwaana w'Omuundu oyo niye wiina?”

³⁵ Mani Yesu n'ababoolera ati, “Obulafu busisiiriho naang'we esiha sidiidi. Mukeende nimusisiiri neende obulafu, esiirima sihaye ohubadiirira hu ngira, olwohuba oyo okeendera mu siirima haba saamanya yaachia daawe.

³⁶ Nimusisiiri neende obulafu, mufukiirire mu bulafu, hu munyale ohuba abaana b'obulafu.?” Yesu niyamala ohulomaloma atyo, yatula ao yaawaao mani yaabeekisaho.

Obutafukiirira bw'Abayudaaya

³⁷ Kata ayahaba mbwe yali n'aholere obulolero buungi mu moni waabwe, nae haba sibamufukiiriramo.

³⁸ Mani emboosi chi munabbi Yisaaya yalomaloma nichoolerera abweene, echiboola chiti, “Ewe Omwaami, wiina owafukiirira bibawulira ohutula yi huli? Haandi wiina mweene yi Omwaami yabwiihulira obunyala bwae?”

³⁹ Mani sakira bahaya ohufukiirira. Olwohuba Yisaaya haandi yaboola ati,

⁴⁰ “Nasaae yawofusa emoni chaabwe, haandi yoomya emyooyo kyaabwe, hu bahaye ohubona neende emoni chaabwe haandi ohuwulira neende emyooyo kyaabwe, mani bahaye ohukaluha yi ndi mbawonie.”

⁴¹ Yisaaya yaboola atyo, olwohuba yabona oluyaali lwa Yesu mani n'amulomalomaho.

⁴² Nae kata katyo, ab'obunyala baangi muno, bamufukiiriramo, nae hulw'ohutya Abafarisaayo, haba sibatuumbulaanga, hu bahaye ohwiiruswa mu Sinagoogi:

⁴³ olwohuba badahaanga muno ohusiimwa hw'abaandu ohuhira oluyaali lwa Nasaae.

Ohuheengerwa omusaango ohweema hu mboosi cha Yesu

⁴⁴ Yesu yalomalomera mu kono ly'aakulu n'aboola ati, “Oyo owuufukiiriramo, haba saaba afukiirira mweese syeeng'ene, nae aba afukiirira neende mu oyo owaanduma.

⁴⁵ Haandi oyo owuumbona, aba abweene oyo owaanduma.

⁴⁶ Ese ndeecha mu syaalo ohuba obulafu, hu buli muundu wufukiirira ahaye ohudoong'a mu siirima daawe.

⁴⁷ Owulira emboosi chaange mani yaahaya ohuchiloonda, ese haba simuheengera omusaango daawe; olwohuba haba sindeechia ohuheengera esyaalo omusaango daawe, nae ndeecha ohuwonia esyaalo.

⁴⁸ Oyo yeesi owuundekaana mani yaahaya ohufukiirira emboosi chaange ali neende owumuheengera omusaango. Emboosi chi ndalomaloma nicho echichia ohumuheengera omusaango hu ludaalo lw'enjakamo.

⁴⁹ Olwohuba ese haba sindalomalomaanga hulw'obunyala bwaange omweene; nae Laata owaanduma niye owandagira eby'ohulomaloma.

⁵⁰ Haandi manyire endi, esilagiro syae, nibwo obulamu butaakama. Mani esyo si nomanoma, nisyo si Laata yamboolera ohuboola.”