Yowaana 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olukaado lw'omwaayi

¹ Yesu yaboola ati, “Mbaboolera obwadyeeri endi, oyo otabita mu siruwa niyeengira mu hoonge, nae yaniinira abuundu waandi, oyo aba omwiibi haandi omunyaka.

² Nae oyo obitira mu siruwa, niye oba omwaayi w'amakoondi.

³ Oyo niye yi muliindi w'esiruwa yekulirao; haandi amakoondi kawulira ekono lyae. Amakoondi akalaanga ameeta, mani yakeemirira n'akatusa erwaanyi.

⁴ N'amala ohukatusa erwaanyi, akataangirira mu moni, mani amakoondi kaamuloondaho, olwohuba kamanyire ekono lyae.

⁵ Haba sikanyala ohuloonda omuteende yeesi, nae kachia ohumwiiruha, olwohuba haba sikamanyire ekono ly'abateende.”

⁶ Yesu yabakaadira olukaado luno, nae nabo haba sibamanya si yali n'ababoolera daawe.

Yesu omwaayi mulai

⁷ Yesu mani n'ababoolera ati, “Mbaboolera obwadyeeri endi, Ese ndi omulyaango kw'esidwooli sy'amakoondi.

⁸ Abaandi boosi abataangirira ohwiichia, beebi haandi banyaka nibo; nae amakoondi haba sikabatekeeresa.

⁹ Ese ndi omulyaango. Buli owiingira n'ambitiramo, yahawonisibwa. Yaheengire haandi yaatula mani anyoole olwaayiro.

¹⁰ Omwiibi yeechia sa ohwiiba, ohwiita neende ohusihirisa. Ese ndeecha hu kanyale ohuba neende obulamu, haandi kabe nabwo mu bwiichufu.

¹¹ Niise omwaayi mulai. Omwaayi mulai, ayaanayo obulamu bwae hulw'amakoondi kae.

¹² Oyo oholera omusaara, haandi otaali omwaayi, otaali omweene makoondi, n'abonaho esinamiindi nisiicha, aleha ao amakoondi mani yeyiruhira; esinamiindi sikaseeta mani syakasalaania.

¹³ Yeyiruhira olwohuba yaayira omusaara. Amakoondi haba s'akadeebaho daawe.

¹⁴ Niise omwaayi mulai. Manyire amakoondi kaange, haandi amakoondi kaange kosi kaamanyire.

¹⁵ Koti lu Laata yaamanyire, haandi syesi ndaamanya Laata; haandi mbwaayo obulamu bwaange hulw'amakoondi kaange.

¹⁶ Ndiyo neende amakoondi kaandi, akataali ak'ehoonge yino. Mani hoyeere ohukaleeta kosi. Kosi kawulire ekono lyaange. Ao mani libeeo eyiicho lala neende omwaayi mulala.

¹⁷ Mani hulw'esifune sino, sakira Laata yandaha, olwohuba ese nyaanayo obulamu bwaange, hu nyale ohubweekobosera haandi.

¹⁸ Abulao omuundu yeesi onyala ohubuundusaho, nae ese omweene ndi neende obunyala bw'ohubweetusaho, haandi ndi neende obunyala bw'ohubwekobosera haandi. Esyo nisyo si Laata yandigira ohuhola.”

¹⁹ Ohukabuhanamo haandi hweecha hwakwaao mu Bayudaaya hulw'emboosi chino.

²⁰ Abaangi hu abo baboola bati, “Aliho omusaambwa, haandi mulalu niye; lwasiina humutekeeresa?”

²¹ Nae abaandi nibaboola bati, “Emboosi chino haba si ch'omuundu oliho omusaambwa. Omusaambwa kunyala kwalimbusa emoni ch'omuwofu?”

Abaandu bekaana Yesu

²² Esidyaalo sy'Ohulabisya Enyuumba ya Nasaae syali Yerusalemu;

²³ byali ehabi by'emboowo; Yesu yali nakeenda-keenda mu siseenge sya Solomooni esiri mu Nyuumba ya Nasaae.

²⁴ Abayudaaya bamwebodoohania hu nyaande choosi mani nibamuteeba bati, “Wahatulehe nihuhwekanakanaho ohwoola liina? Tuboolera alafu oba niiwe Kristo.”

²⁵ Yesu yabakobolamo ati, “Mbaboolera hale, nae haba simufukiirira. Ebiholwa bi hola mu liita lya Laata, nibyo ebindusira obuloli;

²⁶ nae eng'we haba simufukiirira daawe, olwohuba eng'we haba simuli hu makoondi kaange.

²⁷ Amakoondi kaange kawulira ekono lyaange. Syesi kamanyire, mani kanoondaho.

²⁸ Kaberesa obulamu butaakama, haandi sikahasihiriswe endaalo choosi pe. Abulao omuundu yeesi onyala ohukaandusaho daawe.

²⁹ Laata owakaamberesa, ahira byoosi obunyala, haandi abulao omuundu yeesi onyala ohukaandusaho.

³⁰ Ese neende Laata huli silala.”

³¹ Abayudaaya haandi nibabukula amakina nibadaha ohumuhubbira.

³² Yesu yabakobolamo ati, “Ndabeekesa ebiholwa bilai biingi ohutula ewa Laata; bulaanu siholwa siina syeene si mweemaho ohuhubba amakina?”

³³ Nae Abayudaaya bamukobolamo bati, “Sihudaha ohuhubba amakina olwohuba ebiholwa bilai daawe, nae olw'ohufwoola Nasaae; olwohuba ewe oli omuundu, nae oli ohweehola ohuba Nasaae.”

³⁴ Yesu yabakobolamo ati, “Haba sisyandiikwa mu malako keeng'we siti, ‘Nasaae yaboola ati, eng'we muli banasaae’?

³⁵ Bulaanu, Nasaae yabalaanga abaandu abo ati banasaae, abo ba mboosi ya Nasaae yeechera (haandi ebyandiiko byoolerefu haba sibinyala ohuhalakwa).

³⁶ Nae ese yi Laata yanjawula mani yaatuma mu syaalo. Bulaanu lwasiina muboola muti fwoola Nasaae, nimboola endi, ‘Ndi Omwaana wa Nasaae’?

³⁷ Nitahola ebyo bi Laata by'adaha hole, mutafukiiriramo daawe.

³⁸ Nae ni ndi ohubihola, kata ayahaba mbwe ese haba simufukiiriramo, mani mufukiirire ebyo bi hola, hu munyale mumanye haandi mwomiise muti, Laata ali mweese, haandi syesi ndi mu Laata.”

³⁹ Haandi bateemaho ohumudiira, nae n'abeyibaho.

⁴⁰ Yesu haandi yaambuha Yorodaani yaachia engereha w'omwaalo Yorodaani, abuundu yi Yowaana yali n'achaaka ohubatisa, mani n'aba eyo.

⁴¹ Abaandu baangi beecha yi ali, mani nibaboola bati, “Yowaana haba siyahola esilolero syoosi daawe, nae buli siindu si Yowaana yalomaloma hu wuno syali esyadyeeri.”

⁴² Mani abaandu baangi abali eyo bamufukiirira.