Yowaana 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emboosi y'obulamu

¹ Muhuchaaka Emboosi yaluwo, haandi Emboosi yali neende Nasaae, haandi Emboosi yali Nasaae.

² Ohutulira elalira muhuchaaka Emboosi yali alala neende Nasaae.

³ Nasaae yabitira mu Mboosi ohuloonga ebiindu byoosi, sibulao esiindu syoosi esyaloongwa ataali Emboosi.

⁴ Obulamu bwali mu mweene oyo,

⁵ Obulafu obwo bwaaduhira mu siirima, mani esiirima nisitanyala ohuyiingira obulafu daawe.

⁶ Aliwo omuundu owatumwa ohutula eyiri Nasaae, olaangwa Yowaana.

⁷ Yeecha ohweekesa abaandu ebidiira hu bulafu. Yeecha ohubeekesa, boosi banyale ohuwulira haandi bafukiirire.

⁸ Yowaana wuno haba siyali obulafu obwo daawe, nae yeechia ohweekesa abaandu ebidiira hu bulafu obwo.

⁹ Obulafu bwadyeeri bweene obuhosera buli muundu nibwo obwali bwiicha mu syaalo.

¹⁰ Emboosi yali mu syaalo. Nasaae yaloonga esyaalo ohubitira mu Emboosi. Nae Emboosi niyali mu syaalo, esyaalo haba sisyamumanya daawe.

¹¹ Yeecha mu syaalo syae syeene, nae abaandu bae beene haba sibamwaakaanira daawe.

¹² Nae abo boosi abamwaakaanira, abo abafukiiririra mu liita lyae, yababeresa obunyala bw'ohweehola abaana ba Nasaae.

¹³ Beehola abaana ba Nasaae mu ngeri eyitaali eya buli ludaalo, abo abateebulwa neende amabaanga, kata neende mu bunyala bw'omubiri, oba ohudaha hw'omuundu, nae hulw'obunyala bwa Nasaae.

¹⁴ Emboosi yeehola omuundu, mani n'amenya alala naafwe, niyeechula embabaasi alala neende obwadyeeri; efwe hwabona oluyaali lwae luhoongo muno, koti oluyaali lw'Omwaana mudeerwa wa Nasaae.

¹⁵ (Yowaana yatusa obuloli bu mudiiraho, mani yehuuma n'aboola ati, “Wuno niye oyo yi ndalomalomaho nimboola endi, ‘Oyo ochia ohwiicha enyuma waange, yaahira oluyaali muno, olwohuba oyo yaluwo ese nitaabaao.’”)

¹⁶ Haandi ohutula mu bwiichufu bwae obwo nibwo fwesi bu hwabeeresebwa embabaasi mbitiirifu.

¹⁷ Olwohuba Nasaae yaleeta amalako ohubitira mu Musa; nae embabaasi neende obwadyeeri byeecha ohubitira mu Yesu Kristo.

¹⁸ Abulao omuundu yeesi owabonaho Nasaae; ohutusaho Omwaana mudeerwa wa

Ohuyaala hwa Yowaana Omubatiisi

¹⁹ Mani buno nibwo obuloli bu Yowaana yatusa, Abayudaaya nibamutumira abalaamisi neende Abaleefi ohutula Yerusalemu ohumuteeba bati, “Ewe niiwe naanu?”

²⁰ Haba siyekaana ohukobolamo daawe, nae yeyama n'aboola ati, “Ese haba siniise Kristo.”

²¹ Mani nibamuteeba bati, “Niiwe naanu? Niiwe Elija?” Nae yaboola ati, “Haba daawe.” “Niiwe omunabbi?” Nae yakobolamo ati, “Haba daawe.”

²² Mani nibamuteeba bati, “Niiwe naanu? Tuboolere sihuchia ohukobola mu baandu batutumire. Ni siina syeene si welomalomaho?”

²³ Yowaana yaboola ati, “Ese ndi ekono ely'oyo oli ohuhuumira mu siparara ati, ‘Kololose engira y'Omwaami,’ koti lu omunabbi Yisaaya yaboola.”

²⁴ Bulaanu, abaandu abali nibabatumire bali Abafarisaayo.

²⁵ Ao mani nibamuteeba bati, “Lwasiina obatiisa, n'otaali Kristo, oba Elija, oba omunabbi?”

²⁶ Yowaana yabakobolamo ati, “Ese mbatiisa neende amaachi; nae yiluwo oweemere akatikaati weeng'we yi mutaamanyire,

²⁷ oyo owunoondaho enyuma, yi tahoyera kata ohuboolola esia ch'ebiraato byae.”

²⁸ Ebyo byaliwo Bbetani, engereha wa Yorodaani, yi Yowaana yabatiisiraanga.

Ahakoondi hayere ha Nasaae

²⁹ Hu ludaalo luloondaho, Yowaana yabona Yesu niyeecha n'achoomere yali, mani n'aboola ati, “Bone, ahakoondi hayere wa Nasaae, oyo omalao ebyonoono by'esyaalo!

³⁰ Wuno niye oyo yi ndalomalomaho endi, ‘Enyuma waange yiluwo omuundu oli ohwiicha owuuhira oluyaali, olwohuba oyo yaluwo ese nitaabaao.’

³¹ Ese mweene sindali nimumanyire; nae esyo nisyo esyandeeta ohubatiisa neende amaachi, hu anyale ohumanyiswa eyiri abaandu ba Yisiraeli.”

³² Yowaana yatusa obuloli n'aboola ati, “Ese ndabona Mwooyo niyeeha koti eguugu ohutula Muukulu, mani n'amudoong'aho.

³³ Ese syesi haba sindali nimumanyire; nae oyo owaanduma ohubatiisa neende amaachi yamboolera ati, ‘Oyo yo'onabona Mwooyo n'amwiihaho mani yamudoong'aho, oyo niye obatiisa neende Mwooyo Mwoolerefu.’

³⁴ Mani ese ndabona, haandi mbeekesa endi oyo niye Omwaana wa Nasaae.”

Abeeki ba Yesu bataangira

³⁵ Hu ludaalo luloondaho, haandi Yowaana yali niyeemere alala neende abeeki bae babiri;

³⁶ yabona Yesu naali ohukeenda, mani n'aboola ati, “Bone ahakoondi hayere wa Nasaae!”

³⁷ Abeeki bae abo bawulira n'aboola atyo mani nibaloonda Yesu.

³⁸ Yesu yakaluuhana, yaababona nibamuloonda, mani n'abateeba ati, “Siina syeene si muli ohukoonya?” Nabo bamukobolamo bati, “Rabbi (amahuluundu mbwe, Omweekesa) wamenya yeena bweene?”

³⁹ Yesu yababoolera ati, “Mwiiche mubone.” Mani nibachia nibabona yi yali niyamenya; nibaba nae oludaalo olwo lwoosi, olwohuba chali nichiri esaa ehumi ch'engoloobe.

⁴⁰ Mulala hu babiri abawulira Yowaana, mani n'amuloonda yali Anderea, mwaanang'ina Simooni Petero.

⁴¹ Yataangira ohubona Simooni mwaanang'ina, mani n'amuboolera ati, “Hunyoolere Mesaaya” (amahuluundu mbwe Kristo).

⁴² Mani n'amuleeta eyiri Yesu. Yesu yamulingaala yaaboola ati, “Niiwe Simooni omwaana wa Yowaana? Ochia ohulaangwaanga Keefa” (amahuluundu mbwe Petero).

Yesu alaanga Filipo neende Natanaeli

⁴³ Nibwahya echuli, Yesu yaheengao ohuchia Galilaaya. Yanyoola Filipo mani n'amuboolera ati, “Noonde.”

⁴⁴ Nae bulaanu, Filipo yali owa Bbetasaida, esiko sihuluundu sya Anderea neende Petero.

⁴⁵ Filipo yanyoola Natanaeli, mani n'amuboolera ati, “Hwaakaanire oyo yi Musa yandiikaho mu Malako neende yi banabbi baandiikaho, Yesu Omunasareeti, omwaana wa Yosefu.”

⁴⁶ Natanaeli yamuboolera ati, “Mani siliwo esiindu silai syoosi esinyala ohutula Nasareeti?” Nae Filipo yamuboolera ati, “Ewe yiicha obone.”

⁴⁷ Yesu niyabona Natanaeli niyeecha, yamuboolera ati, “Bone, Omuisiraeli mweene, otaliho ohweebachirisa hwoosi daawe!”

⁴⁸ Natanaeli yateeba Yesu ati, “Wuumanyire otye?” Yesu yamukobolamo ati, “Filipo n'asisiiri oohwiicha ohuhulaanga, hubweene nooli aasi w'omusaala mutuli.”

⁴⁹ Natanaeli yamukobolamo ati, “Omweekesa, niiwe Omwaana wa Nasaae! Niiwe Omutuki wa Yisiraeli!”

⁵⁰ Nae Yesu yamukobolamo ati, “Ofukiirira olwohuba huboolere endi, hubweene nooli aasi w'omusaala mutuli? Ochia ohubona ebiindu bihira bino.”

⁵¹ Yesu haandi n'ameeda ohumuboolera ati, “Huboolera obwadyeeri bweene endi, mwahabone Ekulu niliikuulwe, haandi bamalaika ba Nasaae nibaniina haandi nibeeha hu Omwaana w'Omuundu.”