Yosua 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohudiirwa neende ohusihiriswa hwa Ai

¹ Omwaami yaboolera Yosua ati, “Bukula ab'amaye boosi booli nabo mani ochie oniine nabo woole Ai. Otatya daawe, oba wawaamo omwooyo. Ese mweene njia ohuhuberesa ohuyiingira omutuki wa Ai; abaandu bae, esiko syae, kata neende eloba lyae byoosi bichia ohuba ebyao.

² Muhoyere ohuchia ohuhola Ai neende omutuki wasyo esiindu koti simwahola Yeriko neende omutuki wasyo, nae ehabi lino, muli abalehuule ohwebukulira obuyiinda bwasyo, neende ebisolo byasyo. Mani muchie mweetekehere ohuseeta esiko esyo, nimusiindusa nimutulira emukoongo wasyo.”

³ Yosua yachia yeetekeha ohuchia Ai alala neende ab'amaye bae boosi. Yadoolamo abalwaani bae elifu amahumi kadatu (30,000), mani naabatuma nibatula nibachia esiro

⁴ neende elako lino liti: “Eng'we muchie mani mweekise hu lwaande luundi lula olw'esiko, nae eyitaali eyale muno neende esiko daawe; ni mwetekeheere ohuseeta.

⁵ Nae ese omweene alala neende abasaacha ba ndi nabo bano, niifwe abachia ohuchooma esiko tiiri. Mani abasaacha ba Ai, nibanaba mbwe hu batutuliraho, huchia ohukaluuhana mani hwiiruhe nihukobola engo, koti lu hwahola ehabi lyataangira.

⁶ Abo bachia ohutwoongaho ohwoola lu hunaba nihumalire ohubahweesa nihubayirire eyale neende esiko syaabwe esyo. Bachia ohubasaanga bati huli ohubeeruhaanga nihubatiire, koti lu hwahola hale.

⁷ Mani ao niwo yi eng'we muchia ohwekisulira yi munaba nimwekisireenge, mani mudiire esiko esyo. Omwaami Nasaae weeng'we achia ohusibaberesa sa.

⁸ Bulaanu nimunaba nimumalire ohudiira esiko esyo, musitubuleho omuliro, koti sa lu Omwaami alagiire. Mani kano niko amalako keeng'we.”

⁹ Mani katyo, Yosua yabatuma baatula baachia, mani baachia mu bituundu byaabwe by'ohweekisamo mani baaliindira ebweene eyo, emuumbo wa Ai, akatikaati wa Ai neende Bbeteli. Yosua nae yamala esiro esyomu kaambi sa.

¹⁰ Mani echuli-chuli nibwahya, Yosua yasiingira mani yaalaanga ab'amaye bae bebuusa alala. Mani ye omweene, alala neende abeemirisi ba Yisiraeli babeemirira baabayira mu Ai.

¹¹ Ab'amaye bae alala neende ye omweene, bachia nibachoomere tiiri omulyangiro muhuluundu okwiingira mu siko esyo, mani niboombaha ekaambi hu lwaande lw'emukulu, ehooho nilibali akatikaati neende Ai.

¹² Yabukula aambi abasaacha elifu chitaanu (5,000), mani naabakisa mu bituundu by'ohweekisamo ebiri emuumbo w'esiko esyo, akatikaati wa Ai neende Bbeteli.

¹³ Ab'amaye batekehwa bulai koti abachia ohulwaana eye neende ekaambi huluundu eyiri emukulu w'esiko nae abasaacha baandi badoong'ereo baayirwa emuumbo. Haandi Yosua yamala esiro esyo naali mu hooho.

¹⁴ Mani omutuki wa Ai niyoobbya emoni chae hu basaacha ba Yosua, yatulaniramo bwaangu. Omweene oyo alala neende abasaacha bae boosi batula bachooma mu Hoondo ya Yorodaani, ohuchia ohulwaanira neende Abaisiraeli abuundu bweene ala yi baliho hale, nibataamanyireho bati hane nae yali niyetekeehe ohuseeta naatulira enyuma daawe.

¹⁵ Bulaanu Yosua alala neende abasaacha bae bachaaka ohweehola koti abeseenda, mani beeruha nibachoomere esyaalo syooma parara.

¹⁶ Hane abasaacha bali mu siko omwo boosi bali nibalaangirwe nibabuusirwe alala ohubeeruhania, mani koti lu bali nibaloonda hu Yosua, hane balichiingi nibali ohwoolobereraanga ohutula eyiri esiko syaabwe.

¹⁷ Buli musaacha yeesi owali mu Ai yali hane naatulire naloondere hu Abaisiraeli, hane esiko nasyo nisileherwe nisyahaaha sa, naabula oyo yeesi onyala ohusilwanirira.

¹⁸ Bulaanu Omwaami yaboolera Yosua ati, “Ewe syoomesa efumo lyao eyiri Ai; mbao ndi ohusihuberesa.” Yosua yahola sa koti lu yali nabooleerwe,

¹⁹ mani esiha syeene si yali nasiingisiramo omuhono kwae, abasaacha bae balichiingi nibeekisire baluya basiingira bwaangu, mani beeruha baachia beengira mu siko esyo, mani baasidiira. Abweene ao batubula omuliro hu siko esyo.

²⁰ Mani abasaacha ba Ai niboobbaho amahemo enyuma, babona sa omwoosi nikuli ohuduuma nikuniina mu miyaka. Bulaanu yali yibulao engeri yoosi yibanyala ohweibiramo daawe, olwohuba Abaisiraeli abali niberuuhe nibachoomere esyaalo syooma parara bulaanu boosi bakaluuhana mani baachaaka ohubaseeta

²¹ Mani Yosua alala neende abasaacha bae nibabona bati hane abasyaabwe baandi bala hane bamalire ohudiira esiko, nihaandi bati syali simalire ohutubulwaho omuliro, bakaluuhana mani bachaaka ohwiita abasaacha ba Ai.

²² Bulaanu Abaisiraeli bali nibali mu siko baheengao bosi ohwiiha nibeengira mu biita. Mani bulaanu abasaacha ba Ai beechuhana sa nibamalire ohubodoohanisibwa neende Abaisiraeli, mani boosi beetwa baawa. Abulao kata mulala oweeruhaho daawe, haandi abulao oyo owanyalaho ohuluwonamo

²³ ohutusaho omutuki wa Ai yeeng'ene. Oyo niye owadiirwa sa mani yaayirwa eyiri Yosua.

²⁴ Abaisiraeli banyala ohwiitira buli muundu wali omusuku waabwe mu syaalo syooma parara yi bali nibabaloondereho. Mani haandi baachia beengira mu Ai, mani beeta buli oyo yeesi owali naalimo.

²⁵ Mani abaandu baafwa oludaalo olwo lwoong'ene, abasaacha neende abahasi, bali elifu ehumi neende chibiri (12,000), abaandu boosi abali nibali mu Ai.

²⁶ Olwohuba Yosua haba siyeesaho aasi omuhono kwae ku yafumitiraanga efumo lyae, nataamala ohusihirisa buli muundu yeesi owali niyamenya mu Ai.

²⁷ Bulaanu Abaisiraeli beebukulira ebisolo byoosi, neende efuni yoosi, eyali niyipeeyerwe ohutula mu siko esyo, koti sa lu Omwaami yali nabooleere Yosua.

²⁸ Yosua yasaamba Ai yasireha nisiri ekohe. Esiko esyo sisisiiri sityo ohwoola nyaanga yino.

²⁹ Yamikira omutuki wa Ai hu musaala mani yaleha omulaambo kwae nikudeembera ohwo, ohwoola engoloobe. Mani elyuuba nilyali hu likwa, Yosua yatusa elako ati omulaambo kwae okwo kwaanulwe, mani kwasukunwa aasi mu siruwa sy'esiko esyo. Bakubbiibaho esituuli sihoongo muno esy'amakina, esisisiiriwo ohwoola nyaanga yino.

Amalako kasomerwa hu Lugulu Ebbali

³⁰ Bulaanu, Yosua yoombaha hu Lugulu lwa Ebbali alutaari ey'Omwaami, Nasaae wa Yisiraeli.

³¹ Yayihola n'aloondakana neende amalako ka Musa, omuhalaabani w'Omwaami, yali niyaberesa Abaisiraeli, koti lu siboolwa mu Malako ka Musa siti: “alutaari yaholwa mu makina katabaachwaho neende esibaachiro sy'esichuma daawe.” Mani hu bweene ohwo bayaaniraho ebiyaanwa bisaambe ebichiira Omwaami, haandi boosi bayirayo ebiyaanwa by'obusaangirani.

³² Abweene ao, nibali neende abeemirisi baabwe nibatingaalire, Yosua yaholera hu makina ako obuwanule bw'Amalako ka Musa yali niyaandiika.

³³ Mani Abaisiraeli, nibali alala neende abeemirisi baabwe, abahoongo baabwe, haandi neende abakayi baabwe, haandi kata alala neende abateende bali nibabamenyamo, beema hu nyaande choombi ech'Esanduuku ly'Endagaano y'Omwaami, nibatingaalire abalaamisi b'Esileefi abali nibalikiingire. Esituundu sy'abaandu abo syeema ni syuubbire omukoongo kwasyo hu Lugulu lwa Gerisimu, nae esituundu siindi ni syuubbire omukoongo kwasyo eyiri Lugulu Ebbali. Musa Omuhalaabani w'Omwaami yali niyabalagira ohuholaanga batyo esiha nisyoolere esy'ohunyoola ehabi.

³⁴ Yosua bulaanu yachaaka ohusoma neende ekono ly'aakulu Amalako koosi, n'oteereho neende ehabi neende ebibwaamo, koti lu byali nibyandiikwa mu sitabo sy'Amalako esyo.

³⁵ Buli lako hu malako ka Musa, Yosua yalisomera abaandu boosi mu lwiichuule, omwali abahasi neende abaana, kata neende abateende bali nibabamenyamo.