Yosua 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebyonoono by'Akani

¹ Elako ly'Omwaami eyiri Yisiraeli ely'obutabukulaho esiindu syoosi esyali nisiri esy'ohusihirisibwa ohutula mu Yeriko haba silyeesibwahoomo oluyaali daawe. Omusaacha olaangwa mbwe Akani yahaya ohwiisa oluyaali mu lako elyo, mani syaakera Omwaami yaanyoolerera Abaisiraeli. (Akani yali omwaana wa Karimi, haandi omwiichuhulu wa Sabudi, haandi yali naali ow'enono ya Seera, eyali esituundu situla hu nono ya Yuda.)

² Yosua yatuma abasaacha baandi ohutula mu Yeriko ohuchia mu Ai, esiko syali ebukwe wa Bbeteli, aambi neende Bbetafeeni, neende elako ly'ohuchia ohulambuula eloba elyo. Nibaba nibamalire ohuhola batyo,

³ baboola eyiri Yosua bati, “Abulao esidahisa buli muundu ohuchia yaseeta Ai. Tuma sa abasaacha boola aambi wa elifu chibiri (2,000) oba chidatu (3,000) boong'ene. Otayirayo eye lyoosi ebweene eyo ohulwaana daawe; sino haba si siko sibaambali muno daawe.”

⁴ Mani aambi Abaisiraeli elifu chidatu (3,000) boong'ene nibo abachia ohuseeta, nae byabahaya byabayiika ohweseenda enyuma.

⁵ Abasaacha ba Ai, babeeruhania baabatusa hu siruwa sy'esiko ohwoolera elalira mu Sebbariimu, haandi baabeetamo abasaacha amahumi kadatu neende basaasaba hu ngira yiihirira aasi woolugulu. Mani Abaisiraeli bawaamo omwooyo baatya muno.

⁶ Yosua alala neende abeemirisi baandi ba Yisiraeli betaandulaangaho engubo chaabwe mu sasaakisi, beehubbaanga sa aasi mu moni w'Esanduuku ly'Endagaano y'Omwaami, mani nibekalaangasaanga sa abweene ao ohwoola engoloobe, nibechuhireho olufu hu mitwe kyaabwe, ohweekesa obwelalihirifu bwaabwe.

⁷ Yosua yaboola ati, “Ewe Omwaami w'Obunyala bwoosi! Siina syeene esyakera ewe watuleeta engereha wa Yorodaani eno? Ohututuula sa mu mahono k'Abaamoori bano? Ohutusihirisa sa mani? Lwasiina sihwadoong'era sa elalira hu genya liindi lira elya Yorodaani?

⁸ Ese ndaaboole siina syeene, ewe Omwaami, bulaanu buti koti lu Abaisiraeli bamalire ohweseenda enyuma ohutula hu basuku baabwe?

⁹ Abakanani boosi alala neende buli muundu wuundi yeesi mu syaalo muno achia ohuwulira esiholwa sino. Bulaanu bachia ohutwebodoohania mani batwiite batumale! Mani naawe bulaanu oba ochia ohuhola siina syeene ohuliinda oluyaali lwao olwo?”

¹⁰ Omwaami nae yaboolera Yosua ati, “Ewe siingira weeme! Lwasiina oli ohwekalaangasaanga sa aasi oti?

¹¹ Yisiraeli yonoonere! Bahalaake endagaano naange yi ndabalagiire ohuliinda. Babukuuleho hu biindu biriho omusaango kw'ohusihiriswa. Babiibire, baabibachiraho, mani baabita alala neende ebiindu byaabwe byeene.

¹² Sino nisyo esikerere Abaisiraeli baahaya ohuyiingira abasuku baabwe. Babeseendere olwohuba abeene babeere bahirirwe omusaango kw'ohusihiriswa! Ese haba siinjia ohwemeeda ohuba alala naang'we ohwoola lu muchia ohusihirisa ebiindu byoosi bimwalagirwa obutabibukula!

¹³ Ewe siingira! Labya abaandu obatekehe ohwiicha yi ndi. Baboolere beetekehe muchuli, olwohuba ese, Omwaami, Nasaae wa Yisiraeli, ndi neende sino esy'ohuboola: ‘Ewe Yisiraeli, oli neende mu bunyala bwao, ebiindu biindi bi ndabalagira ohusihirisa! Eng'we haba simunyala ohulwaania abasuku beeng'we ohwoola lu muchia ohwemalaho ebiindu bino!’

¹⁴ Sakira ewe chia obaboolere oti echuli-chuli bachia ohuleetwa mu moni, enono hu nono. Enono yi njia ohudoolamo yiba haandi yichia ohwiichaanga mu moni, edaala hu daala. Haandi edaala li mba niinjia ohudoolamo, liba lichia ohwiichaanga mu moni enyuumba hu nyuumba. Haandi enyuumba yi mba niinjia ohudoolamo, yiba yichia ohwiichaanga mu moni, omuundu hu muundu.

¹⁵ Oyo yeesi oba anadoolwamo, yakaanwa neende ebiindu byakairwa, aba achia ohusaambwa bu saambwa omuliro, alala neende edaala lyae lyoosi, haandi neende buli siindu syae syoosi. Olwohuba aba aleetere esoni mbitiirifu hu Yisiraeli, haandi aba ahalaake endagaano yaange.”

¹⁶ Mani nibwahya sa buti echuli yiloondaho, Yosua yaleeta Yisiraeli mu moni, enono hu nono, mani enono ya Yuda niyidoolwamo.

¹⁷ Haandi yaleeta enono ya Yuda mu moni, edaala hu daala, mani edaala lya Seera nilidoolwamo. Haandi yaleeta edaala lya Seera mu moni, enyuumba hu nyuumba, mani enyuumba ya Sabudi niyidoolwamo.

¹⁸ Haandi yaleeta enyuumba ya Sabudi mu moni mulala hu mulala, mani Akani, omwaana wa Karimi haandi omwiichuhulu wa Sabudi, yaadoolwamo.

¹⁹ Bulaanu Yosua yamuboolera ati, “Musyaaning'ene, ewe boola obwadyeeri bweene ano mu moni w'Omwaami, Nasaae wa Yisiraeli, mani weyame. Ewe mboolereho bulaanu buti esiindu syooholere. Otateemaho kata nabudiidi ohusiingisa daawe.”

²⁰ Akani yakobolamo ati, “Esyo syadyeeri nisyo.” “Nyonoonere eyiri Omwaami, Nasaae wa Yisiraeli, mani sino nisyo esiindu siiholere.

²¹ Mu biindu byoosi bi hwapeeyere, ndeechere ndaabonamo ekaanju ly'Esibbabbilooni enyirifu muno, aambi ekiloguraamu ch'efeesa chibiri, haandi neende esimeku sy'esaabbu esikera aambi w'obusito bwoola esituundu sy'ekiloguraamu. Ebiindu bino ndaabyekoombere muno mani ndoola ohubibukula. Muchia ohubyakaana nibyesiihire mu yeema lyaange, efeesa niyisibira aasi bweene hu lwaalo.”

²² Mani katyo, Yosua yatuma abasaacha baandi, abeeruha baachia mu yeema elyo, mani baakaana bati ebiindu bino ebyali nibyakairwa, byali nibyasiihwa mu bweene omwo, efeesa niyisibiire aasi bweene hu lwaalo.

²³ Babitusa byoosi mu yeema, baabikiinga baabiyirira Yosua, neende Abaisiraeli boosi, mani nibabyaala mu moni w'Omwaami.

²⁴ Yosua alala neende abaandu ba Yisiraeli boosi, bakwa hu Akani, efeesa, ekaanju, neende esituundu sy'esaabbu, alala neende abasyaani neende abahaana b'Akani, eng'oombe chae, esuhiri, neende amakoondi, eyeema lyae, neende buli siindu siindi esyae syoosi; mani nibabiyira byoosi mu Hoondo Y'ebidinyu.

²⁵ Yosua yaboola ati, “Lwasiina ewe oheengereo ohutuleetaho ebidinyu byakiire ano biti? Omwaami mweene bulaanu niye ochia ohuleeta ebidinyu yooli!” Abaandu boosi bulaanu bahuya Akani amakina yaafwa; haandi baahuya amakina mani baasaamba edaala lyae lyoosi, neende obuyiinda bwae bwoosi.

²⁶ Bamubbiibaho esituuli sihoongo muno esy'amakina esisisiiriyo ohwoola olwaalero luno. Sino nisyo esikera abuundu ao nasiilaangaangwa mbwe “Ehooho ly'Ebidinyu.” Omwaami yalehera ao ohuba neende obwaalaba butyo.