Yosua 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwaambwa hwa Yeriko

¹ Ebiruwa bya Yeriko byadoong'aanga sa nibyeikaale, haandi nibiliindirwe ohukayira Abaisiraeli ohwiingira mukati. Abulao oyo yeesi owali n'anyalaanga ohwiingira kata sa neende ohutulaanga mu siko omwo.

² Omwaami yaboolera Yosua ati, “Bulaanu buti ndi ohuhudiisa Yeriko mu mahono kao, alala neende abatuki basyo boosi haandi neende ab'amaye basyo balulu.

³ Mani ewe alala neende ab'amaye bao muhoyere ohuchichaanga nimuhuumba nimwebodoohania esiko esyo ehabi lala buli ludaalo hu ndaalo chisaasaba.

⁴ Nae abalaamisi bataanu-na-babiri, buli otula nga akiingire eturumbete ndala, bahoyere ohukeenderaanga mu moni w'Esanduuku ly'Endagaano. Mani hu ludaalo lwa hataanu-na-habiri, ewe neende ab'amaye bao, muhoyere ohuchia mani mwahuumba nimwebodoohania esiko esyo, amahabi kataanu-na-kabiri, abalaamisi nibobbaanga sa eturumbete.

⁵ Mani boobba ekono lala eleeyi muno. Nimuliwuliraho sa muti, ni abaandu boosi batulaniramo ohuubba olwuungu lulala, mani ebida by'esiko esyo bichia ohukwa-bukwa. Ao bulaanu, eye lyao lyoosi liba lichia ohwiingira sikolola-muhira mu siko.”

⁶ Yosua yalaanga abalaamisi mani yaababoolera ati, “Bukule Esanduuku ly'Endagaano, mani abaandu bataanu-na-babiri hweeng'we bachie emberi walyo, nimukiingire eturumbete.”

⁷ Mani bulaanu, yalagira abaandu ohuchaaka ohuhumbaanga nibebodoohania esiko esyo, neende ow'amaye muliindi mulala naali mu moni w'Esanduuku ly'Endagaano y'Omwaami.

⁸ Mani koti lu Yosua yali n'alagiire abaandu ohuhola, abalaamisi bataanu-na-babiri bala nibakiingire eturumbete chitaanu-na-chibiri ech'enjika ch'amakoondi mamiiku emberi w'Omwaami bakeenda nibachia mu moni, niboobba eturumbete echio, neende Esanduuku ly'Endagaano y'Omwaami nilibaloondaho.

⁹ Haandi abasaacha bali nibeediisire eby'ohulwaanisa baloonda hu balaamisi abali niboobba eturumbete, nae ow'amaye muliindi w'enyuma n'aloonda hu Sanduuku ly'Endagaano, eturumbete nachio nichilumiriire sa ohuubba obutayeera.

¹⁰ Nae Yosua yalagira abaandu ati, “Mutahuumaho, kata sa mwaakera amakono keeng'we kaawuliirihanaho daawe, haandi kata sa mutakanyaho emboosi yoosi yaatula mu minwa kyeeng'we yaawuliirihanaho daawe, ohwoolera elalira hu ludaalo lu njia omweene ohubalagira ohwaayuha; ao niwo yimuchia ohwaayuhira.”

¹¹ Mani atyo, yaboolera abasaacha bae ohubukula bayire Esanduuku ly'Endagaano y'Omwaami, ohwebodoohania esiko esyo ehabi lala lyoong'ene. Mani nibamala batyo bakobola engo mu kaambi mani baabaayo esiro esyo syoosi.

¹² Yosua yawuuna ohusimuha echuli-chuli, mani abalaamisi baabukula Esanduuku ly'Endagaano y'Omwaami.

¹³ Alala neende abalaamisi bataanu-na-babiri nibakiingire eturumbete chitaanu-na-chibiri echaholwa mu njika ch'amakoondi mamiiku nichiimiriire Esanduuku ly'Endagaano niliwaao, nibalumiriire ohuubbaannga eturumbete obutayeera daawe; haandi abasaacha b'amaye nibeesyayire ebilwaaniso nibabeemiriire, haandi ow'amaye muliindi w'enyuma nae n'aloonda hu Sanduuku ly'Endagaano y'Omwaami, haandi eturumbete nichilumiriire ohuubbaanga obutayeera.

¹⁴ Hu ludaalo lwa habiri luno, haandi bahuumba nibebodoohania esiko esyo, mani baakobolayo mu kaambi. Baholaanga batyo hu mbaka y'endaalo chisaasaba enaamba.

¹⁵ Hu ludaalo lwa hataanu-na-habiri, bawuuna ohusiingira echuli-chuli, mani nibahuumba nibabodoohana esiko esyo amahabi kataanu-na-kabiri, mu ngira nasilala eyo; nae luno nilwo olwali oludaalo lwoong'ene lu bahuumba nibabodoohana esiko esyo amahabi kataanu-na-kabiri amalaamba.

¹⁶ Mani hu habi lya hataanu-na-habiri ly'ohubodoohana, abalaamisi nibali aambi ohuubba eturumbete, Yosua yalagira abaandu ohwehuuma, mani nae n'aboola ati, “Ngaandi Omwaami amalire ohubaberesa esiko sino!

¹⁷ Esiko syoosi, alala neende buli siindu sirimo syoosi bihoyere ohusihirisirwa elalira koti esiyaanwa eyiri Omwaami. Ohutusaho Rahabbu omuhasi mucheke wula neende edaala lyaabwe lyoosi nibyo ebichia ohulehwa, olwohuba oyo yakisa abahemeresi beefwe.

¹⁸ Nae haba simuhoyeere ohupeeyaho esiindu syoosi esihoyere ohusihirisibwa; nae nimuhola mutyo, muba muchia ohuleeta ebidinyu neende ohusihirira hu kaambi yoosi ey'Abaisiraeli.

¹⁹ Esiindu syoosi esyaholwa mu feesa, esaabbu, omugasa, oba esibya sichia ohukabulwa endulo hulw'Omwaami. Siba sichia ohuteebwa mu syaaki sy'efuni sy'Omwaami.”

²⁰ Ao, abalaamisi boobba eturumbete. Abaandu nibawulira batyo, bosi boobba oluwuungu, mani ebida byaakwa sa ebyeene. Eye lyoosi lyaachia tiiri lyaaniina hu sigulu siri mukati w'esiko, baanyala ohusidiira.

²¹ Nibehoonyera engaanga chaabwe, beeta buli muundu wali mu siko omwo, abasaacha neende abahasi, abayere neende abakofu. Haandi beeta neende eng'oombe choosi, amakoondi koosi, haandi neende esuhiri choosi.

²² Yosua bulaanu yaboolera abasaacha babiri bala abali nibaholere koti abahemeresi ati, “Eng'we muchie mwiingire mu nyuumba y'omuhasi mucheke wula, mani mumutuse erwaanyi alala neende edaala lyaabwe lyoosi, mumuholere koti lu mwali nimumusubiise.”

²³ Mani batyo bachia baatusa Rahabbu alala neende laatang'ene neende ng'ina, bamboochoong'ene, alala neende ab'edaala lyaabwe baandi bali nibadoong'ereyo. Bababukula boosi alala, edaala lyoosi neende abawaambe beene, baabayira eyiri omuleembe aambi neende ekaambi y'Abaisiraeli.

²⁴ Baambya omuliro hu siko esyo syoosi baasisaamba syaweera aasi, alala neende ebiindu byali nibisirimo byoosi, ohutusaho ebiindu byali nibyaholwa mu saabbu, efeesa, omugasa, neende esibya, bi babukula baayira baabita mu syaaki sy'efuni sy'Omwaami.

²⁵ Nae Yosua yawonia obulamu bwa Rahabbu omucheke neende abeeho bae boosi, olwohuba yali niyakisa abahemeresi bala babiri ba yali niyatuma mu Yeriko ohuchia ohuhemeresa. (Abeechuhulu bae bamenya mu Yisiraeli ohwoola olwaalero.)

²⁶ Esiha syeene esyo, Yosua yatusa ohulabula hw'amaani ati: Oyo yeesi oteemaho ohwoombaha esiko sya Yeriko buyaaha, aba achia ohuba aasi w'esibwaabo sy'Omwaami. “Oyo yeesi olima omusiingi aba achia ohufwiirwa omwaana wae waamberi; Oyo yeesi owoombaha ebiruwa byasyo, aba achia ohufwiirwa omwaana wae omaliirihayo.”

²⁷ Omwaami yabeechaanga neende Yosua mani efuma yae yaalaandaala esyaalo esyo syoosi.