Yosua 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yosua alomalomera mu Sekemu eyiri abaandu

¹ Yosua haandi yabuusira mu Sekemu enono choosi echa Yisiraeli. Yalaanga abahuluundu, abeemirisi, abakayi, haandi neende abahoongo ba Yisiraeli, mani beecha eyiri Nasaae.

² Yosua yaboolera abaandu boosi ati, “Sino nisyo esiindu si Omwaami, Nasaae wa Yisiraeli, adaha ohuboola: ‘Hale, bakuuka yeeng'we bali nibamenya hu lwaande luundi lula olw'Omwaalo kwa Ewufuraate, mani nibeenamiraanga banasaae baandi sa. Mulala hu bakuuka yeeng'we abo yali olaangwa mbwe, Tera, laatang'ene Abburahamu neende Nahori.

³ Mani ese ndabukula Abburahamu, kuuka yeeng'we, mani ndaamutusa mu loba engereha wa Ewufuraate, mani niimala niimuyira niimulambuusa mu loba lyoosi elya Kanani. Haandi ndaamuberesa abeechuhulu abaangi muno. Ndamuberesa Yisaka,

⁴ mani haandi eyiri Yisaka ndaamuberesa Yakobbo neende Esau. Haandi ndaaberesa Esau esyaalo sy'ebigulu-gulu esya Edomu ohuba esyae hu bwae, nae Yakobbo kuuka yeeng'we wuundi, alala neende abaana bae boosi beeha baachia boola Misiri.

⁵ Luunyuma haandi ndatuma Musa neende Arooni, mani ndaakwiisa obudinyu buungi muno hu Misiri. Nae omweene ndabeemirira, ndaabatusamo;

⁶ ndaatusa bakuuka yeeng'we mu Misiri, mani Abamisiri baabakoniaho embiro neende ebigaari by'efaraasi, neende ebilwaaniso biindi. Nae bakuuka yeeng'we niboola hu Nyaanja Enjahanyu

⁷ banjubbira wuuwi bati mbahoonye, mani ndaata esiirima syaaba akatikaati waabwe neende Abamisiri. Haandi ndahola enyaanja yaahulukusa niyifuuniha Abamisiri mani nibafwiiramo. Mumanyire bulai bweene si ndahola hu Misiri. “ ‘Eng'we mwoola mwaamenya mu siparara esiha esireeyi muno.

⁸ Nae luunyuma ndabatusayo, ndaabaleeta ndaaboosa mu loba ly'Abaamoori, abali nibamenya hu lwaande lw'ebukwe wa Yorodaani. Babalwaania, nae ese mweene ndaaberesa eng'we ohuyiingira mwaabayiingira. Mwanyala ohuyira eloba lyaabwe, mani naange ndaabasihirisa sa koti lumwalichiingi nimubayiinduula nimwiingiramo.

⁹ Bulaanu omutuki wa Moabbu, Bbalaki omwaana wa Sipoori, yesi yabalwaania. Yayira emboosi eyiri Bbalamu omwaana wa Bbeyori mani yamusaba abateeho esibwaabo.

¹⁰ Nae ese ndahaya ohumutekeeresa, mani nae yaababeresaanga sa ehabi, mani mu ngira yino ndabawonia ndaabakaya hu Bbalaki.

¹¹ Eng'we bulaanu mwanyala ohwaambuha Yorodaani, mani mwoola Yeriko. Abasaacha ba Yeriko bosi bateemaho ohubalwaania, koti lu Abaamoori bosi bahola, kata neende Abaperisi, Abakanani, Abahiiti, Abagirigaasi, Abahiifi, kata neende Abayebbusi. Nae kata katyo, ese ndaberesa eng'we obuyiingiri mwayiingira abo boosi pe.

¹² Koti lu mwali nimuyinduula nimwiingira, ese ndabataamo oluteengo, hu nyemeo nyale ohwiirusa neende ohutusamo abatuki Abaamoori. Engaanga cheeng'we neende obuyiingo bweeng'we haba sibyaliho neende omulimo kwoosi okw'ohuhola kutyo poo.

¹³ Ese ndababeresa eloba li mwali nimutaholeraho omulimo kwoosi daawe, neende ebiko bi mutoombahaho daawe. Esiha sino mbao mumenyere omwo, haandi muli ohulya enduli alala neende emisabbiibbu bi mutataakaho daawe, neende ochyooga yi mutataakaho daawe.’

¹⁴ “Mani bulaanu” Yosua yemeeda ohulomaloma ati, “yiseenge oluyaali mu Omwaami, haandi mumuhalaabanireenge elalira neende obweesikwa. Mweemalemo banasaae ba bakuuka yeeng'we beenamiraanga nibali mu Mesopotamia neende mu Misiri, mani muhalaabanireenge Omwaami yeeng'ene.

¹⁵ Nae nikali mbwe eng'we haba simudaha ohumuhalaabaniraanga, mani heengeo enyaanga yino oyo yi muba nimucha ohuhalaabaniraanga, oba banasaae ba bakuuka yeeng'we beenamiraanga mu Mesopotamia, oba banasaae b'Abaamoori, abeene eloba li mumenyeremo bulaanu buti. Nae ese hulwaange, neende hulw'edaala lyaange, huchia ohuhalaabaniraanga Omwaami oyo.”

¹⁶ Abaandu nabo bakobolamo bati, “Efwe haba sihulilehana neende Omwaami daawe, hwahalaabaniraanga banasaae baandi sa!

¹⁷ Omwaami Nasaae weefwe wuno, niye owatusa bakuuka yeefwe, haandi kata neende efwe fwesi ohutula mu buwaambe mu Misiri, haandi efwe abeene hweeboneraho neende emoni cheefwe cheene, eby'amayia bi yaholaanga. Omweene wuno yatuliinda neende omuleembe buli yoosi yi hwachiraanga mu byaalo byoosi bihwahalakaniangamo.

¹⁸ Mani koti lu hwali nihuli ohwiingira mu loba lino, Omwaami waachana wuno niye owerusaanga naamala muno Abaamoori boosi abali nibamenyaanga ano bweene. Mani sakira efwe haandi fweesi huchia ohuhalaabaniraanga sa Omwaami wuno; olwohuba wuno niye Nasaae weefwe yeeng'ene.”

¹⁹ Yosua haandi yaboolera abaandu bano ati, “Nae eng'we sa, binyala byaabahaya ohunyala ohuhalaabaniraanga Omwaami wuno. Olwohuba wuno ni Nasaae mwoolerefu, mani haba sanakanya ohuleheramo ebyonoono byeeng'we ebyo. Haandi Nasaae wuno haba siyesimiirisiraanga embaliha ohuba neende abamuyiingania baandi daawe,

²⁰ mani haandi nimwiicha mwaamutulaho, mani mwaachia mwaahalaabanira banasaae bakeni sa, aba achia yesi ohubakaluuhanaho mani abasaandye. Aba achia ohubasihirisa sa, kata yahaba niyabeechaanga omulai yi muli hale.”

²¹ Haandi abaandu baboolera Yosua bati, “Haba! Efwe huchia sa ohuhalaabaniraanga Omwaami wuno yeeng'ene.”

²² Yosua yesi haandi yababoolera ati, “Eng'we mbao niing'we abaloli beeng'we abeene, hu mboosi yino mbwe, abeene niing'we abaheengereo ohuhalaabaniraanga Omwaami wuno yeeng'ene.” “Eee,” abeene bano bakobolamo batyo, haandi bameedaho bati, “efwe niifwe abaloli beefwe abeene.”

²³ Yesi yemeeda ohubahada ati, “Mani nikali katyo, mweemalemo banasaae bakeni abo boosi ba muli nabo,” haandi yameedaho ati, “hu mani mumale mweeyamire obutiiririrwa bweeng'we eyiri Omwaami wuno, oli niye Nasaae wa Yisiraeli yeeng'ene.”

²⁴ Mani abaandu bulaanu baboolera Yosua bati, “Efwe huchia ohuhalaabaniraanga Omwaami Nasaae weefwe wuno yeeng'ene. Efwe huchia ohwisaanga oluyaali mu malako kae koosi.”

²⁵ Mani ao, Yosua yaholera abaandu endagaano hu ludaalo olwo, haandi nibali mu Sekemu bweene omwo, niyo yi yababeresera amalako neende ebilagiro eby'ohuloondakiriraanga.

²⁶ Yosua yandiika amalako kano mu sitabo sy'Amalako ka Nasaae. Mani haandi yaabukula okukina kuhoongo muno, yaakuta mu sisina sy'omutuumba mu alutaari y'Omwaami bweene.

²⁷ Haandi yaboolera abaandu boosi ati, “Ekina lino bulaanu nilyo elichia ohuba omuloli weefwe fweesi. Mbano liwuliire emboosi choosi chi Omwaami atuboleereenge. Sakira nilyo elichia ohuba omuloli wae hweeng'we, ohubakaira ohujeemera Nasaae weeng'we wuno.”

²⁸ Bulaanu Yosua yaseebula abaandu boosi baawaao, mani buli muundu yeesi yekoboleraanga mu situundu sy'eloba syalichiingi esyaabwe.

Yosua neende Eliasaari boombi bafwa

²⁹ Ebyo nibyawa, Yosua omuhalaabani w'Omwaami, haandi omwaana wa Nuuni, yafwa niyoosere emyaaka ky'obuhuluundu emia ndala neende ehumi (110).

³⁰ Bamusiiha mu loba lyae lyeene mu Timunaati Seera mu syaalo sy'ebigulu-gulu esya Efuraimu esyali emukulu woolugulu lwa Gaasi.

³¹ Yosua niyalichiingi nasisiiriwo omulamu, abaandu ba Yisiraeli boosi bahalaabaniraanga sa Omwaami mulala oyo, haandi, luunyuma lwae ohufwa, bemeeda sa ohuholaanga batyo, abeemirisi baandi bosi abalichiingi nibeeboneraho abeene neende emoni chaabwe buli siindu si Omwaami yaholeraanga Yisiraeli nibalichiingi nibasisiiriwo abalamu.

³² Nae, omubiri kwa Yosefu, ku baandu ba Yisiraeli bali nibakiinga beecha nakwo ohutula mu Misiri, kwali kwasiihwa mu Sekemu, mu situundu sy'eloba li Yakobbo yali niyakula ebituundu by'efeesa emia ndala ohutula hu basyaani ba Hamori, laatang'ene Sekemu. Mani eloba elyo lyali nilyasihirwaanga neende abeechuhulu balichiingi aba Yosefu.

³³ Eliasaari, omwaana wa Arooni, yesi yafwa mani yaasiihwa mu Gibbeya, esiko sidiidi syali nisiri mu syaalo sy'ebigulu-gulu esya Efuraimu, haandi esyali nisyakabwa omwaana wae olaangwa mbwe Finehaasi.