Yosua 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Enomanoma ya Yosua eyiseebula

¹ Luunyuma hale muno, Omwaami yaberesa Yisiraeli obuliindi ohutulana hu basuku baabwe abali nibabebodoohania. Nae esiha esyo Yosua yali n'akofuule muno,

² mani yalaanga Yisiraeli yoosi, abahuluundu, abeemirisi, abakayi, alala neende abahoongo b'abaandu, mani yaababoolera ati, “Ese bulaanu mbano ndi omukofu muno.

³ Nae eng'we mweesi mbao mwanyala ohubona buli siindu syoosi si Omwaami Nasaae weeng'we yaholaanga ebyaalo biindi bino byoosi, hulweeng'we. Omwaami Nasaae weeng'we wuno abereenge n'abalwaanirira muno.

⁴ Nae ese mbao ndamala ohukaba buli omukabo kwa buli enono yeeng'we, eloba lyali ely'ebyaalo biindi bino ebisiiriwo, haandi kata neende ely'ebyaalo biindi byoosi bi ndali nindamala ohuyiingira, ohutulira elalira hu Omwaalo Yorodaani ebukwe bweene, ohwoolera elalira hu Nyaanja Hoongo ya Mediterania emuumbo bweene.

⁵ Omwaami Nasaae weeng'we wuno, haandi niye ochia ohuhola abaandu bano beseende enyuma babatuleho, haandi niye ochia ohubeerusaanga nibachiiririra eng'we nimubayinduula. Mani munanyala ohweebukulira eloba lyaabwe elyo, koti sa Omwaami Nasaae weeng'we yali niyabasuubisa.

⁶ Mani sakira eng'we muhoyere ohwehaliirisa mwaabona muti mwiisa oluyaali, haandi nga muhola buli siindu esyandiikwa mu ‘esitabo sy'Amalako sya Musa’. Mutalekeeresaangaho esituundu syoosi syasyo daawe,

⁷ mani ao niwo yimuchia ohunyalira ohuholeganaanga neende abaandu bano ababadoong'amo, oba sa ohutuumbulaangaho ameeta ka banasaae baabwe mu minwa kyeeng'we, oba ohwehoonyeraangaho ameeta ako muhweechuba, oba kata ohwiinamiraangaho banasaae abo oba kata ohwisaanga oluyaali banasaae abo.

⁸ Mubweyaango bweebyo, eng'we muhoyere ohubeechaanga abeesikwa eyiri Omwaami, koti sa lu mubereenge ohwoola enyaanga yino.

⁹ Olwohuba Omwaami wuno yamala ohwiirusaanga ebyaalo bihunuufu muno, haandi eby'amaani muno naabitusayo, nae eng'we nimubiyinduula nimusuda, mani sakira abulao oyo yeesi owanyalaho ohubeema mu moni kata nabudiidi.

¹⁰ Siri mbwe, omuundu mulala yeesi mweeng'we ananyalaanga ohwiirusa abasaacha elifu ndala enaamba, olwohuba Omwaami Nasaae weeng'we niye oli ohubalwaaniraanga, koti sa lu mweene yasuubisa.

¹¹ Mani, eng'we muhoyere ohwehaliirisaanga, mubona muti muheeraanga Omwaami Nasaae weeng'we oyo.

¹² Olwohuba nikali mbwe muchia ohuba ba nandaawulira, mani mweemao mweyambaania hu byaalo biindi ebisiibadoong'eremo ebyo, mani mwoola ohudeehisaniaanga nabo,

¹³ muhoyere musimanye muti, Omwaami Nasaae weeng'we wuno, aba haba saacha haandi ohwiirusaanga ebyaalo bino naabitusayo, nae eng'we nimuyinduula nimwiingiramo daawe. Ataali ao, abo baba bachia bulaanu ohubeechaanga ab'amasira yi eng'we muli, haandi koti omuteego, oba koti obuko, haandi ohubeechaanga abachuunia koti olubbariki lw'ohumukoongo, oba koti amawa mu moni cheeng'we. Haandi bino biba bichia ohuba sa bityo ohwoola lu alibulao odoong'ere hweeng'we omulamu mu loba lai lino li Omwaami Nasaae weeng'we yamala ohubaberesa.

¹⁴ “Nae bulaanu ese esiha mbano syahanjola esy'ohufwiiramo. Buli mulala hweeng'we amanyire sa mu mwooyo kwae, haandi neende mu bulamu bwae ati, Omwaami Nasaae weeng'we yamala ohubaberesa ebiindu bilai byoosi bi yali niyabasuubisa. Buli sisuubise si yahola, yasyooseresa bulai bweene; abulao kata silala hu byo esyahaya ohwoolerera daawe.

¹⁵ Nae kata katyo, koti lu mweene yooseresa buli sisuubise siyabaholeraanga, haandi nilwo sa lu yesi haandi achia ohubaleetaho buli matiichasi kae.

¹⁶ Nimutooseresaanga endagaano yi Omwaami Nasaae weeng'we yabalagira ohwooseresaanga, haandi nimuhalaabaniraanga haandi mwenamiraanga banasaae baandi, mani mu tima lyae liingi, aba achia yeesi ohubaboneresaanga, mani bwaangu bweene, aba abulao kata mulala hweeng'we oba anadoong'angao omulamu mu loba lai lino li yamala ohubaberesa.”