Yosua 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yosua atuma abahemeresi mu Yeriko

¹ Bulaanu Yosua yatuma abahemeresi babiri ohutula mu kaambi eyali mu Akasia neende elako ohuchia balambuule bweekisi esyaalo sya Kanani, ohuhirira elalira esiko sya Yeriko. Mani niboola hu siko, bachia ohweyalisa mu nyuumba y'omuhasi mucheke olaangwa mbwe Rahabbu.

² Nae omutuki wa Yeriko yawulira ati aliwo Abaisiraeli baandi abeechere esiro esyo ohuhemeresa esyaalo esyo,

³ mani yesi yaatuma emboosi eyiri Rahabbu ati: “Abasaacha bali mu nyuumba yao eyo, beechere ohuhemeresa esyaalo sino syoosi! Batuse erwaanyi!”

⁴ Nae hane omuhasi oyo yali n'amalire ohubukula abasaacha abo boombi n'abakisire; mani yaaboola ati, “Dyeeri, aliwo abasaacha beechere yiindi, nae ese haba simanyireho abuundu yi babeere nibatula daawe;

⁵ mani esiruwa nisyaabeere nisiri aambi ohwiikalwa, aheerima nihadiira, abasaacha abo beechere baatula erwaanyi; mani abuundu yi bachiiriire, ese haba siimanyireho daawe; mani mubaloondeho sa bwaangu, muchia ohubadiira.”

⁶ Nae hane omuhasi oyo yali n'amalire ohubabukula neende ohubaniinia aakulu hu sirama hale, mani naabakisire mu bihaanja by'engaano bi yali niyatekeha bulai hu sirama ohwo.

⁷ Abasaacha b'omutuki oyo batula mu siko omwo embiro mani esiruwa syeekalwao bulai muno. Abasaacha bano beeruhaanga nibakoonya Abaisiraeli bahemeresi bala, ohwoolera elalira abuundu yi bbarabbara yihalakanisira mu Yorodaani.

⁸ Hane, abahemeresi bala nibali nibasisiiri ohukona esiro esyomu nyuumba omwo, Rahabbu yali naniinire aakulu hu sirama ohwo

⁹ n'amalire ohubabooleraho ati, “Ese manyire sa bulai bweene endi Omwaami amalire ohubaberesa esyaalo sino. Sibonehana bulai bweene siti, buli muundu oli mu syaalo muno abatiire lukali muno.

¹⁰ Efwe hwamala hale ohuwulira bulai bweene koti lu Omwaami yahamia Enyaanja Njahanyu mu moni weeng'we koti lu mwali nimutula Misiri. Haandi oluundi hwamala ohuwulira koti lu mweeta Sihooni, neende Ogu, abatuki b'Abaamoori bano babiri ebukwe wa Yorodaani.

¹¹ Efwe fweesi hwatya sa esiha syeene sihwabawuliriraho; eng'we mwamala ohutumalamo omwooyo fweesi pe. Omwaami Nasaae weeng'we hane niye Nasaae oli Muukulu aakulu, haandi neende ano hu syaalo huno.

¹² Mani eng'we bulaanu ndaha muundechubire neende Nasaae mweene oyo muti mwesi muchia ohubonera edaala lyaange lyoosi esisa koti lu ese omweene syesi mbayirire, mani mwaambaaho ahalolero hanyala ohukera ndaabeesika.

¹³ Musuubiseho muti muchia ohuumonisiryaho laata neende maama, bamboocho, neende bamwaanaama, alala neende amadaala kaabwe koosi! Mutaleha sa efwe fweesi hweetwa sa!”

¹⁴ Abasaacha bano bamuboolera bati, “Nasaae ahoya yaabukulirao obulamu bweefwe, nihuhaya ohuhola koti lu huli ohuboola! N'otachia ohubooleraho omuundu yeesi ebiindu bi huholere, huhusuubisa huti Omwaami naatudiisa esyaalo sino, huchia ohuhuyira bulai bweene.”

¹⁵ Rahabbu wuno yali niyamenya mu nyuumba yali niyoombahirwa mu sida sy'esiko, mani yeesera aasi abasaacha bano mu dirisa neende omukoye.

¹⁶ Yababaliirira ati, “Bulaanu muchiire mu syaalo sy'ebigulu-gulu esyo, ataali ao, abasaacha b'omutuki baba bachia ohubabukaana. Nimwoola eyo mweekisaanga mberi hooho endaalo chidatu chiwa, ohwoola lu bakobolera muno. Echo nichiweere, hu bulaanu mwechiire olukeendo lweeng'we.”

¹⁷ Abasaacha bano boombi bamuboolera bati, “Huchia ohwooseresa esisuubise sy'okerere hwasuubisa esyo.

¹⁸ Mani sino nisyo syohoyere ohuhola. Nihuchia ohuba nihuseetere esyaalo syeeng'we sino, ewe oba onacha oboye omukoye kwa ranjaai kuno hu dirisa li watwiisiramo aasi. Mani obukule lataao, maakoo, ba mboochoo, alala neende edaala lya lataao lyoosi alala mu nyuumba yao.

¹⁹ Omuundu yeesi naatulaho mu nyuumba yao, omusaango kw'ohufwa hwae kuba kumuhira omweene, mani efwe haba sihuba huchia ohubaaho omusaango; nae omuundu yeesi oli mu nyuumba alala naawe nawumiswaho, mani ao efwe huba huchia ohubaaho.

²⁰ Kata katyo, nae niwiichuhana ewe waachia wabooleraho omuundu yeesi ebiindu bi hubeere nihuhola, mani sihuba nihuchia fwesi ohwooseresa esisuubise syeefwe sy'okerere hwaahuba.”

²¹ Omuhasi oyo yafukiirira mani yaabaseebula baawaao. Mani nibaba nibamalire ohuwaao, yaboya omukoye kwa ranjaai hu dirisa lyae elyo.

²² Abahemeresi bano batula ao, mani baachia mu bigulu eyo beekisayo. Abasaacha b'omutuki babakoonyera mu nyaande chiindi chomu syaalo ohumala endaalo chidatu enaamba, nae byaabahaya ohubanyoola, mani baamala baakobola engo mu Yeriko.

²³ Bulaanu abahemeresi bala boombi batulayo mu bigulu omwo, mani beehirira aasi baambuha omwaalo okwo, mani baakobola engo eyiri Yosua. Bamuboolera byoosi koti lu byeehola,

²⁴ mani baboola bati, “Efwe huli aboomiifu huti hane Omwaami yamala ohutuberesa esyaalo esyo syoosi. Abaandu boosi baliyo bamala hale ohututya.”