Yosua 18 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohukabaniamo eloba lyali nilidoong'ereo lyoosi

¹ Mani, nibali nibamalire ohuwaamba eloba lyoosi, omukaanda kw'abaandu ba Yisiraeli kwoosi kwebuusa alala mu Silo mani kwaamala kwoombaha Eyeema ly'Ohubaao hw'Omwaami.

² Nae kata katyo, yali yiriyo enono chitaanu-na-chibiri enaamba echali nichisisiiri ohubereswa emikabo kyaabwe ky'eloba.

³ Mani sakira, Yosua yaboolera abaandu boosi aba Yisiraeli ati, “Eng'we mwahaliinde ohwoola liina nimutaachia mweengira mani mwayaaya eloba li Omwaami, Nasaae wa bakuuka yeeng'we, yamala ohubaberesa?

⁴ Lehe ndoole abasaacha badatu-badatu ohutula mu buli nono. Mani ese njia ohubatuma bachie baweere mu syaalo sino syoosi, mani bachie babalihe obuhoongo bw'eloba lyoosi libahadahire ohuyira libe elyaabwe hu bwaabwe. Mani nibamala batyo hu beemeo bakobole yiindi.

⁵ Eloba elyo lichia ohukabanisibwamo mu bituundu bitaanu-na-bibiri mu ngeri yino yiti; Yuda sichia ohudoong'a mu situundu sisirimo emwaalo, nae Yosefu mu situundu siri emukulu.

⁶ Mani muchie mwandiike buli siindu sidiira hu bituundu bino bitaanu-na-bibiri mani mubindeetere ano. Ao bulaanu niwo yi ese njia ohuchaakira ohuubba eha ohubeteebera hu Omwaami.

⁷ Nae Abaleefi, kata katyo, haba sibachia ohunyoola omukabo kwoosi hu loba lino koti eng'we mweesi abadoong'ereo, olwohuba omukabo kwaabwe nikwo ohuholaanga koti abalaamisi b'Omwaami. Nihaandi chana, ngaandi enono cha Gaadi, Rubbeeni, neende Manaase Bukwe, bamala hale ohunyoola eloba lyaabwe ebukwe wa Yorodaani, li Musa, omuhalaabani w'Omwaami yababeresa.”

⁸ Mani abasaacha abo betaaho olukeendo lwaabwe olwo, ohuchia ohubaliha eloba lyoosi koti lu Yosua yali naababereese amakerako kano kati ati: “Eng'we muchie mu syaalo esyo syoosi, mani mulibalihe lyoosi, muungoboleho ano. Mani nilwo lu njia ohweema ano bweene mu Silo, mani mbeteebere hu Omwaami niimbitira mu huubba eha.”

⁹ Mani katyo, abasaacha abo bachia basalaanira mu syaalo omwo, mani baandiika buli siindu syoosi engeri yibali nibachia ohusikabanisiramo mu bituundu bitaanu-na-bibiri, haandi nibahola olunyaali lw'ebiko bidiidi-diidi. Mani nibamala batyo bakobolayo eyiri Yosua mu kaambi yali Silo.

¹⁰ Bulaanu, Yosua yachaaka ohuubba eha ohubeteebera hu Omwaami, mani naanyala ohuberesa buli enono ya Yisiraeli eyali niyidoong'ere, esituundu sy'eloba elyo, silala-silala.

Esituundu sy'eloba syakabwa Bbenjamini

¹¹ Esituundu sy'eloba syali nisiri esy'amadaala k'enono ya Bbenjamini nisyo esyali esyaamberi ohukabwa. Mani eloba lyaabwe lyali niliri akatikaati w'enono cha Yuda neende echa Yosefu.

¹² Mani sakira emukulu, olwaaho lwaabwe lwachaakira hu Yorodaani, mani nilumala niluniinakana neende obwiihiriro bw'olugulu emukulu wa Yeriko, haandi neende niluchiira emuumbo niluhalakania mu syaalo sy'engulu, ohwoolera elalira hu siparara sya Bbetafeeni.

¹³ Olwaaho mani lweehirira emwaalo hu lwaande lwa Luusi (syosi esilaangwa siti Bbeteli), ohwoola sa Atarooti Adaari, hu lugulu emwaalo wa Bbeeti Horooni Sy'aasi.

¹⁴ Bulaanu olwaaho olwo lwachaaka ohuchiira olubeka luundi, nilukaluuhana niluchiira emwaalo n'otulira hu lwaande lw'emuumbo olw'olugulu luno, mani haandi niluchooma Kiriati Bbaali (oba Kiriati Yearimu), esyali nisiri esy'enono ya Yuda. Mani luno nilwo olwali olwaaho lw'emuumbo.

¹⁵ Nae olwaaho lw'emwaalo lwachaakira hu busoonjo bwa Kiriati Yearimu, niluchiira eyiri Ebidobolyo by'amaachi bya Nefitoa.

¹⁶ Bulaanu, haandi lweehwiihirira niluchiira mu nandaalira woolugulu lutingaalire emukulu w'ehooho lya Refaimu. Haandi ao lweeha emwaalo lwaahalakania Ehooho lya Hinoomu, emwaalo w'olwaanda lwa Yebbusi, niluchoomere Enirogeeli.

¹⁷ Ao bulaanu haandi lwakaluuhana lwatingaala emukulu eyiri Enisemeesi, mani haandi lwaamala lwachiira Gelilooti, eyitingaalaane neende Adumiimu Paasi. Olwaaho luno lweeha lwoola hu Ekina lya Bbohani (Bbohani yali omwaana wa Rubbeeni)

¹⁸ mani lwaamala lwaabita emukulu w'olwaanda lutingaalire Ehooho lya Yorodaani. Haandi bulaanu ao lweeha lweengirira elalira mu hooho bweene,

¹⁹ nilubitira emukulu w'olwaanda lwa Bbeeti Hogila, mani nilwaakamira abuundu yi mwaalo kukwiisira mu Enyaanja y'Omuunyu, yi Mwaalo Yorodaani kukukwiisiramo. Mani luno lutyo nilwo olwali olwaaho lw'emwaalo.

²⁰ Bulaanu Yorodaani nikwo okwali olwaaho lw'ebukwe. Mani chino chityo nichio echali enjaho ch'eloba li madaala k'enono ya Bbenjamini kanyoola ohuba elyako ly'elalira.

²¹ Nae ebiko byali nibiri eby'amadaala k'enono ya Bbenjamini byali nibyo bino mbwe, Yeriko, Bbeeti Hogila, Emeki-kesiisi,

²² Bbeeti Araabba, Semaraimu, Bbeteli,

²³ Afiimu, Paara, Ofira,

²⁴ Kefaramooni, Ofini, neende Gebba: bino byali ebiko ehumi neende bibiri ebilaamba, haandi n'omeedereho neende ebiko bidiidi-diidi ebyalichiingi nibibyebodoohaanie.

²⁵ Haandi ebiko biindi byali mbwe, Gibbeoni, Rama, Bberooti,

²⁶ Misipa, Kefira, Moosa,

²⁷ Rekemu Yiripeeli, Taraala,

²⁸ Sela, Haelefu, Yebbusi (oba Yerusalemu), Gibbeya, neende Kiraati Yearimu: bino byali ebiko ehumi neende bine ebilaamba, haandi n'omeedereho neende ebiko bidiidi-diidi ebyalichiingi nibibyehodoohaanie. Mani lino nilyo eloba li madaala k'enono ya Bbenjamini kanyoola koti elyaabwe hu bwaabwe.