Yosua 16 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esituundu sy'esyaalo esyakabwa Efuraimu neende Manaase emuumbo

¹ Olwaaho lw'emwaalo lw'eloba lyakabwa abeechuhulu ba Yosefu lwali niluchaakira ohutulira hu Yorodaani aambi neende Yeriko, hu busoonjo bw'ebukwe w'amadiba ka Yeriko, mani nilumala niluchiiririra nilwiingira mu siparara. Lwatulira mu Yeriko mani niluchaanakana niluniinakana mu syaalo sy'engulu ohwoolera elalira hu Bbeteli.

² Ohutulira Bbeteli, lwachaanakana lwoola hu Lusi, nilubita-bubita ohwoola Atarooti Adaari, yi Abariiki bali nibamenya.

³ Haandi mani lwachiira emuumbo ohwoolera elalira mu syaalo sy'Abafuleeti, ohwoolera elalira hu syaalo sya Bbeeti Horooni Sy'aasi. Haandi lwemeeda sa ohuchiiririra ohutula ao ohuchia ohwoola hu Geseri mani lwaakamira hu Nyaanja Hoongo ya Mediterania.

⁴ Mani abeechuhulu ba Yosefu, enono ya Efuraimu neende Manaase Muumbo, banyoola eloba lino liti ohuba elyaabwe hu bwaabwe.

Efuraimu

⁵ Mani sino nisyo esituundu sy'esyaalo sy'amadaala k'Abaefuraimu: olwaaho lwaabwe lweeruha nilutulira hu Atarooti Adaari niluchoomere ebukwe ohwoolera elalira hu Bbeeti Horooni Sy'akulu,

⁶ haandi ohutulira abweene ao, ohwoolera elalira hu Nyaanja Hoongo y Mediterania. Mikimetati syali nisiri emukulu waabwe. Ebukwe w'ebweene eyo, niyo yi lwaaho luno lweekodera niluchooma hu tanaati Silo, mani nilumala niluchia nilusibitiraho hu muhono kw'ebukwe niluchia Janoa.

⁷ Mani haandi lweehirira nilutula hu Janoa, niluchiira hu Atarooti neende Naara, ohwoolera elalira hu Yeriko haandi ohwaakamira hu Yorodaani bweene.

⁸ Olwaaho luno haandi lwachiira emuumbo ohutulira Tapua ohuchiira ena haalo hadiidi ha Kaana, mani nilumala nilwaakamira hu Nyaanja Hoongo ya Mediterania. Mani lino nilyo eloba lyabereswa amadaala k'enono ya Efuraimu ohuba elyaabwe hu bwaabwe,

⁹ haandi n'omeedaho neende ebiko bidiidi-diidi, haandi neende engoongo chiindi echali nichiri muukatikaati w'enjaho chino chiti echia Manaase, nae ebyabereswa Abaefuraimu.

¹⁰ Nae haba sibanyala ohwiirusa Abakanani boosi ohutula mu Geseri, mani Abakanani bachaaka sa ohumenyaanga mu Baefuraimu, ohwoolera elalira buti, nae bayiikwa ohubahalaabanaangamo koti abaandu bawaambe sa.