Yosua 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yosua yoola ohuyiingira Yabbini neende abahoonyi bae

¹ Amayaaha ka Yisiraeli ohuyiingiraanga nikoolera Omutuki Yabbini wa Hasoori, yatuma emboosi eyiri Omutuki Yobbabbu wa Madooni, neende abatuki ba Simirooni neende Akisafu,

² haandi neende eyiri abatuki bali mu syaalo sy'ebigulu esiri emukulu, mu Hoondo Yorodaani emwaalo w'Enyaanja Galilaaya mu nandaalira ch'ebigulu, haandi neende hu lwaasi lw'enyaanja aambi neende Doori.

³ Haandi yatuma emboosi yachiira Abakanani abali hu nyaande choombi echa Yorodaani, eyiri Abaamoori, Abahiiti, Abaperisi, haandi neende Abayebbusi abali mu syaalo sy'ebigulu, haandi kata neende eyiri Abahiifi abali nibamenya mu nandaalira y'Olugulu lwa Hamoni oluli mu syaalo sya Misipa.

⁴ Abo boosi beecha alala neende ab'amaye baabwe boosi, eye lyalimo obuungi bw'abasaacha obwaaka neende emoni ch'omusenye echiri hu lwaasi lw'enyaanja. Haandi bali neende efaraasi enyiingi muno neende ebigaari byaachio byoosi ebiingi muno.

⁵ Mani abatuki bano boosi bata alala amaye kaabwe, mani bebuusa alala baahola ekaambi mu esa ya Meromu ohulwaania Yisiraeli.

⁶ Nae Omwaami yaboolera Yosua ati, “Ewe otabatya daawe. Mu biha nga bino muchuli, ndaba ese omweene malire ohubeeta boosi nimbateere mu mahono ka Yisiraeli. Eng'we bulaanu munaholaanga sa okw'ohudataasa efaraasi chaabwe neende ohusambaanga ebigaari byaabwe.”

⁷ Mani Yosua alala neende abasaacha bae boosi babaseetera nibabasiindusa mu esa ya Meromu.

⁸ Omwaami haandi yaberesa Abaisiraeli ohubayiingira; Abaisiraeli baseeta mani baabeerusa ohuboosa emukulu mu Misirefooti Maimu neende Sidoni, haandi neende ohwoolera elalira ebukwe mu hooho lya Misifa. Ohulwaana hwachiiririra sa mu moni ohwoola lu yabulirao omusuku kata mulala owadoong'ao omulamu.

⁹ Yosua haandi yabahola koti lu Omwaami yali n'alagiire: yanyala ohudataasa efaraasi chaabwe, neende ohusaamba ebigaari byaabwe byoosi.

¹⁰ Bulaanu Yosua yakaluuhana yaakobola enyuma, yadiira Hasoori mani yeeta neende omutuki wasyo. (Esiha syeene esyo, Hasoori syali nisyo esyaalo sihiramo amaani mu byaalo ebyo byoosi.)

¹¹ Beeta buli muundu yeesi wali naali omwo; abulao omuundu yeesi owadoong'a naali omulamu, mani haandi esiko esyo syaasaambwa neende omuliro.

¹² Yosua yadiira ebiko bino byoosi alala neende abatuki babyo, haandi yetaanga buli muundu yeesi, koti sa lu Musa, omuhalaabani w'Omwaami, yali niyalagira.

¹³ Kata katyo, Abaisiraeli haba sibasaambaho esiko syoosi esyoombahwa hu biswa, ohutusaho Hasoori, si Yosua mweene yasaamba.

¹⁴ Abaandu ba Yisiraeli bapeyaanga buli siindu sy'ebbei syoosi alala neende ebisolo ohutula mu biko bino, mani nibamala nibabyebukulira abeene. Nae betaanga buli muundu yeesi; abulao oyo yeesi owalehwaangao omulamu.

¹⁵ Omwaami yali yamala hale ohuberesa Musa omuhalaabani wae amalako kae, nibyo bi Musa yesi yali niyaberesa Yosua, mani haandi Yosua yesi yali niyabiisamo oluyaali. Yaholaanga buli siindu si Omwaami yali niyalagira Musa.

Esyaalo syoola ohuwaambwa neende Yosua

¹⁶ Mubwadyeeri bweene, Yosua yadiira esyaalo syoosi, esyaalo sy'ebigulu syoosi neende enandaalira ch'ebigulu choosi, emukulu yoosi neende emwaalo yoosi, esyaalo sya Goseni syoosi, neende esyaalo syali nisyooma muno esiri emwaalo wasyo, haandi kata neende Ehooho lya Yorodaani lyeene.

¹⁷ Esyaalo esyo syali nisitulira hu Lugulu lwa Halaki, oluli emwaalo aambi neende Edomu, ohwoolera elalira kata neende Bbaaligaadi esiri emukulu, mu hooho lya Lebbanooni eliri emwaalo wa Lugulu lwa Hamoni.

¹⁸ Yosua yalwaania abatuki babyo boosi hulw'embaka ndeeyi muno, nae kata katyo yaamala yaanyala ohubabadiira mani yaabasiinja yaabeeta boosi.

¹⁹ Esiko syaholaho endagaano y'endaalo choosi neende abaandu ba Yisiraeli syali Gibbeoni, yi Bahiifi baandi bali nibamenya. Abadoong'ereyo boosi bayiingirwaanga sa nibalwaanire ebiita.

²⁰ Omwaami yabahola baheengao ohulwaania Abaisiraeli, hu banyale ohuheengerwa omusaango kw'ohusihirisirwa elalira, mani boosi beetwe ataali ohukwiirwa esisa syoosi. Sino nisyo esiindu si Omwaami yali niyalagira Musa ohuhola.

²¹ Mu esiha syeene esyo Yosua yachia yaasihirisa olwiibulo lwa kirahula kilaangwa mbwe Anaaki ekyali nikyamenya mu syaalo sy'ebigulu mu Hebburoni, Debbiri, Anaabbu, haandi neende mu syaalo sy'ebigulu syoosi esya Yuda neende Yisiraeli. Yosua yabasihirisira elalira alala neende ebiko byaabwe byoosi.

²² Abulao kata Anaaki kata kulala okwalehwao nikuli okulamu mu syaalo sya Yisiraeli syoosi; ohutusaho kidiidi sa kiti, nikyo ekyadoong'ao, haandi kata katyo kyadoong'a mu Gasa, Gaati, neende mu Asidoodi.

²³ Yosua yanyalirwa ohudiira-budiira esyaalo syoosi, koti sa lu Omwaami yali niyalagira Musa. Yosua yamala atyo, yaasidiisa Abaisiraeli koti esyaabwe syeene, yaasikabaniamo mu bituundu biingi, buli situundu nga asiba enono ndala. Mani ao abaandu bawuluuhaho ohulwaanaanga ebiita.