Yona 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yona ajeemera Omwaami

¹ Olwoola, emboosi yo Omwaami yeechera Yona omwaana wa Amitai, niyiboola yiti,

² “Siingira ochie Ninefe, esiko sihoongo esyo oboolobya; olwohuba obudoondobanu bwaabwe malire ohubumanya.”

³ Nae Yona yasiingira mani yeeruhira Tarisiisi, naadaha ohutula hu Omwaami. Yehirira yaachia Yopa, yanyoola emeeri yichia Tarisiisi, mani yatuunga eseende ch'olukeendo, niyeengira emeeri, achie nabo Tarisiisi, yeeruhe ohutula mu moni w'Omwaami.

⁴ Nae Omwaami yasiindiha omuyaka kw'amaani hu nyaanja eyo, mani enyaanja niyiiya muno, efwiinda nichihubba emeeri niyidaha ohwadihanamo.

⁵ Abahosi bomu meeri batya muno, mani buli otula n'achaaka ohusaba Nasaae wae. Bachaaka ohusukuna mu nyaanja emikuku kyali mu meeri, nibadaha ohuhendeesaho obusito bw'emeeri. Nae Yona yali n'achiire mu sisenge sy'aasi syomu meeri niyeyaliise aasi endoolo nyiingi nichimuyirire.

⁶ Mani omwiirusi w'emeeri niyamwoolaho, yamuteeba ati, “Ewe ho, sifune siina? Siingira, osabe nandoolo Nasaae wao! awuundi nasaae oyo anyala ohutubaasaho, mani hwahaya ohusihirira.”

⁷ Mani bachaaka ohuboolanira abeene-na-beene bati, “Mwiiche huhubbe eha, hubone wiina mweene okera esibi sino nisitukwaaho.” Mani nibahubba eha, niyikwa hu Yona.

⁸ Mani nibamuteeba bati, “Tuboolereho, wiina mweene otuleteere esibi siino. Ohola mulimo siina? Haandi otula yeena? Otula mu syaalo siina? Haandi oli omwiibulanwa wa yeena?”

⁹ Mani Yona naababoolera ati, “Ese ndi Omuibburania; haandi nyinamira Omwaami, Nasaae wo Muukulu, owaloonga enyaanja neende eloba.”

¹⁰ Mani abasaacha abo nibatya muno, nibamuteeba bati, “Siina syene sino sy'oholere?” Olwohuba abasaacha abo bali bamanyire bati Yona yali niyeeruha ohutula hu Omwaami, olwohuba yali naamalire ohubaboolera.

¹¹ Mani nibamuteeba bati, “Huhuholere siina, hu nyaanja yinyale ohuyenjeera?” Olwohuba enyaanja yali niyemeeda sa ohuyiiya.

¹² Yona naababoolera ati, “Mungiinge muusukune mu nyaanja; ao mani enyaanja yichia ohuyenjeera muwone, olwohuba manyire endi niise okera esidinyu sino nisibakwaho.”

¹³ Kata katyo, bateemaho n'amaani koti lu banyala ohwirusa emeeri bayikobye hu genya, nae haba sibanyala, olwohuba enyaanja yemeeda-bwemeeda ohwiiya.

¹⁴ Sakira nibalirira Omwaami nibaboola bati, “Huhwekweeda, ewe Omwaami, otaleha hwaafwa olwohuba obulamu bw'omusacha wuuno, haandi otatwoolobya olwohwiidisa amabaanga kataaliho omusaango. Ewe Omwaami, ohole esiindu sihusangaasa.”

¹⁵ Mani nibabukula Yona nibamusukuna mu nyaanja; enyaanja niyiyeenjeererao.

¹⁶ Abasaacha abo nibatya muno Omwaami, nibayaanira Omwaami esiyaanwa haandi nibeyama ohumuhalaabanira.

¹⁷ Mani Omwaami naatuma okung'eeni kuhoongo ohumira Yona; Yona naamala mu nda y'okung'eeni okwo endaalo chidatu neende ebiro bidatu.