Yobbu 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yobbu

¹ Yobbu yakobolamo ati:

² “Mubwadyeeri manyire endi siri sityo: Nae omuundu anyala atye ohuba owadyeeri mu moni wa Nasaae?

³ Nae omuundu n'adaha ohuyaala nae omusaango, haba saanyala ohumukobolamo kata esiteebo silala mu biteebo elifu.

⁴ Nasaae mukesi mu mwooyo, haandi w'amaani niye wiina omweene owahamuyiingania, mani yaamuhira?

⁵ Oyo olikulula engulu, yabulao osimanya, mani mu tima lyae yachisihirisa.

⁶ Oyo okera esyaalo syaadengaana ohutulira elalira hu bwaalo bwasyo, mani esiiro chasyo chateengereha;

⁷ Oyo olagira elyuuba, mani lyaahaya ohutula; obwiiha hu ng'ining'ini mani chaahaya ohwaaduha.

⁸ Oyo owalandaasa ekulu yeeng'ene ataali omuundu omuhoonya, haandi yadiira amafwiinda komu nyaanja.

⁹ Nasaae niye owaaniha eng'ining'ini muukulu, Esolo y'Amaani, Orioni, Pileyade neende eng'ining'ini ch'emwaalo.

¹⁰ Nasaae niye ohola eby'amaani ebitamanyihana, neende eby'amayia bitabalihana.

¹¹ Nasaae yaambitaangaho, mani haya ohumubona; yemeedayo ohwechiira, ataali ese ohumumanyirisa.

¹² Bona, nanyuula esiindu neende amaani, wiina onyala ohumukayira? Wiina olimuteeba ati, ‘Ohola siina?’

¹³ “Etima lya Nasaae haba silyohwaakama; abahoonyi ba Rahabbu bamwiinamira.

¹⁴ Mani nyala endye ohumukaluhamo, emboosi ch'ohweosaho mu moni wae, chinyoola yeena?

¹⁵ Kata ndahaba mbwe mbulaho omusaango, haba siinyala ohumukobolamo; ndi neende ohwekweeda Nasaae akwiire esisa oyo owusitaaka.

¹⁶ Niwiichulisa ndamulaanga mani yangaluhamo, haba siinja ohufukiirira endi abeere naatekeeresa ekono lyaange.

¹⁷ Olwohuba atuma omuyaka mani kwaanyubulula, mani yameeda ebikoonjo byaange ataali esifune.

¹⁸ Haba safukiirira ndayeeraho omuuya, nae obulamu bwaange, yabwiichusamo ohusaanda.

¹⁹ Nihuba ohukerana amaani, bone! Nisiba esiindu sidiira hu bwadyeeri, wiina mweene onyala ohumulaanga?

²⁰ Kata ndahaba nitaali neende owunyiingania, emboosi choomunwa kwaange cheene chichia ohuuheengera omusaango kuuhire; kata ndahaba nimbulaho omusaango, achia ohweekesa koti lu ndi omuhyaamu.

²¹ Mbulaho omusaango; nae haba sindedeebaho omweene; ndebwaabire obulamu bwaange.

²² Byoosi biri nasilala sa; sakira mboola endi, asihirisa ababulaho omusaango neende abadoondobanu.

²³ Amasira nikakwaao mani keeterao abaandu, Nasaae achehaanga sa amasira k'abaandu bataaliho omusaango abo.

²⁴ Nasaae yata esyaalo mu mahono k'abahola-mbi. Yabwiiha hu moni ch'abaheengi b'emisaango. Nataali Nasaae, mani wiina niye?

²⁵ “Endaalo chaange chiiruha muno ohuhiraho omwiiruhi; chiwaayo, mani ndaahaya ohuchinyoolamo esilai.

²⁶ Endaalo chaange chiiruha koti amaato k'amaani hu nyaanja, koti eeswi yiiha ohugamula ahamwiinyi.

²⁷ Nimboola endi, ‘Njia ohwiibirira ohwekanyiirisa hwaange, njia ohuleha ohuhuluusa hwaange, mani mbe omusaangafu,’

²⁸ njichulisa ohusaanda hwaange mani ndya, olwohuba manyire endi soochia ohumboolera oti mbulaho omusaango.

²⁹ Omusaango kuchia ohuuhira; lwasiina nyaahana bihaya?

³⁰ Kata ndaheeyokera mu maachi manyifu, haandi ndesaaba amahono kaange neende esabbuuni,

³¹ ewe ochia ohuusukuna mu chorooni, mani engubo chaange cheene chichia ohundebwaaba.

³² Olwohuba Nasaae haba saali omuundu koti lu ndi hu mukobolemo, haandi hu hweeme alala nae mu siina ohuyaala omusaango.

³³ Abulao omukayi w'omusaango akatikaati waange nae, onyala ohutukaya fweembi.

³⁴ Leha Nasaae alehere ao ohuusaandya, haandi alehere ao ohundiisa.

³⁵ Mba njia ohulomaloma nitamutiire, olwohuba haba si ndi koti luhoyeere omweene.