Yobbu 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Bbiridaadi

¹ Bbiridaadi Omusuhi yakobolamo ati:

² “Onaakame liina ohulomaloma ebiindu bino? Emboosi ch'olomaloma chiri koti omuyaka kw'amaani.

³ Obaasa oti Nasaae anyala ohudoondobana? Oba ow'Obunyala bwoosi yaahola esitaali esyadyeeri?

⁴ Abaana bao nibaba nibo abahola esyonoono mu moni wa Nasaae, mani Nasaae yabasaandya ohweema hu byonoono byaabwe.

⁵ Nae ewe niwiichuhana wakoonya Nasaae mani waalirira ow'Obunyala bwoosi,

⁶ nooli omwoolerefu haandi omuluungifu, Mubwadyeeri bweene aba achia ohusiingira mani ahuhoonye haandi ahube omukabo kw'obumenyo buhoyera.

⁷ Kata neende ohuchaaka hwao hwahaba nihuli ohudiidi, nae mu ndaalo chiichayo, obulamu bwao buba bucha ohulyooyera elalira.

⁸ “Husaba endi yekaho omweene ohutula hu ndaalo hale, mani wehaliirise bulai bi bakuuka yeefwe bafumbula;

⁹ olwohuba efwe huli ab'ekulo, haandi sibulao sihumanyire, haandi endaalo cheefwe hu syaalo chiri koti esiiniha.

¹⁰ Mani leha abaandu bahale bahweekese, bahuboolere, mani bahwiikulire ebiindu bi bamanyire.

¹¹ “Esidutu sinyala ohuhula abuundu ataali omwaalo? Amakada kanyala ohuba abuundu ataali amaachi?

¹² Nae amaachi nikahama, niko akataangira ohuhooha, nikasisiiri ohwoola ohutemwa.

¹³ Luno nilwo lu baandu beebirira Nasaae bali; esuubi ly'omuundu otatya Nasaae lichia ohukoterao elalira.

¹⁴ Esiindu si yeesika sihaliha koti oluwuusi, haandi esuubi lyae liri koti enyuumba y'olububi.

¹⁵ Yegeeng'a hu nyuumba yae, nae enyuumba eyo yaahaya ohweema; ayomiiriraho, nae enyuumba yaachana eyo yaahaya ohuyiindira.

¹⁶ Ali koti esimera sihula elyuuba nilisisiiri ohutula, mani esisina syasyo syalaandira mu ndalo yae.

¹⁷ Emisi kyae kyeboyokania hu situuli sy'amakina; mani nikyediira hu buli kina.

¹⁸ Naaba nasihiirisirwa mu bwiihalo bwae, mani bucha ohumwekaana nibuboola buti, ‘Haba sisiiri ohuhubonaho.’

¹⁹ Bona, lino nilyo esangaalo ly'engeri yae; haandi abaandi bachia ohwiicha mani bayire obwiihalo bwae.

²⁰ “Bona, Nasaae haba saacha ohwekaana omuundu otaaliho esyonoono, oba yahoonya omwonooni.

²¹ Achia ohuhwiichusamo enjeho, haandi akere ohubbe engalaakasa.

²² Abo abahusyuuhira bachia ohudiirwa esoni, haandi amadaala k'abonooni kachia ohusihirira.”