Yobbu 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Elifaasi yaboolera Yobbu ati, “Bulaanu laangaho; aliwo omuundu yeesi ohukobolamo? Onaakaluuhanire eyiri omwoolerefu oli yeena?

² Mubwadyeeri bweene, ohwelalihira hwiita omusiru, haandi embaliha yeeta omuundu otalimo amakesi.

³ Mbweene omuundu musiru n'ayira emisi naahulaahulana, nae mu biha bidiidi ndabwaaba obwiihalo bwae.

⁴ Abaana bae baba mu bidinyu, baahuyirwa hu siruwa, mani waabulao omuundu obakayirira.

⁵ Abamanani babula esyohulya nibo abalya byaakesa, haandi baabukula kata ebiindu biri mu mawa; mani aboobuluwo bang'ang'abanira emyaandu kyae.

⁶ Olwohuba ohusaanda hwae haba sihutula mu lufu oba ebidinyu byae byaasobohera mu loba;

⁷ nae omuundu yeletera ohusaanda koti enyaanda ch'omuliro chaanyuhira aakulu.

⁸ “Nae ese hulwaange, ndaheeruhiire eyiri Nasaae, mani eyiri Nasaae niyo yi ndahate obulamu bwaange.

⁹ Nasaae niye ohola ebiindu by'amaani haandi ebitamanyihana, eby'amayia bitabalihana.

¹⁰ Niye okwiisa efula hu syaalo haandi yaachuhiirisira endalo.

¹¹ Nasaae niye oniinia abaloonga, haandi yaaberesa abalira omuleembe.

¹² Nasaae anyaasa-nyaasa endekeha ch'abaandu bo bukodyo, mani ebiindu bi bahola byaahaya ohutulamo esiindu.

¹³ Adiira abakesikesi mu bukodyo bwaabwe; mani yaakamya bwaangu endekeha ch'abaandu bahyaamu.

¹⁴ Baba mu siirima kata esideete, mani esideete babaaba koti esiro.

¹⁵ Nae Nasaae awonia banaambula-buchiiro ohutula mu minwa kyaabwe, haandi abali mu bidinyu yabawonia ohutula mu mahono k'abaandu b'amaani.

¹⁶ Nasaae aberesa abamanani esuubi, haandi yabuleesa abonooni baahaya ohulomaloma.

¹⁷ “Bona, omuundu yi Nasaae akolola aba ow'ehabi; sakira otalekeeresa ow'Obunyala bwoosi n'ahwoolobya.

¹⁸ Olwohuba aboya ebikoonjo byaaba n'ahuteereho; amahono kae kahuya niko haandi akaonia.

¹⁹ Achia ohuhuwonia mu bidinyu; mani nibuhya, ochia ohubulaho esyonoono syoosi.

²⁰ Mu ndaalo ch'enjala, achia ohuhuwonia ohaye ohufwa, haandi mu ndaalo ch'ebiita, achia ohuhuwonia olugaanga.

²¹ Nasaae achia ohuhuwonia abahulomalomaho bubi, haandi soocha ohutichaanga ohusihirira nihwahoole.

²² Ochia ohuchehaanga ohusihirira neende enjala, haandi soochia ohutichaanga esolo chohu syaalo.

²³ Olwohuba mu ndalo yao, amakina haba sikachia ohubaamo, haandi ebisolo byomu siino haba sibicha ohuhuseetaanga.

²⁴ Ochia ohumanya oti, enyuumba yaliindwa bulai, haandi ochia ohulambuulaanga ebyaayo byao mani sibuleo esyahakote.

²⁵ Haandi wahamanye oti abeechuhulu bao bahabe abaangi, olwiibulo lwao lwahabe koti obunyaasi bwohu syaalo.

²⁶ Wahafwe mani osiihihwe n'omalire ohukofulira elalira, koti engaano yaangala mani yaakeswa ebiha by'ohukesa nibyoolerefu.

²⁷ Eee, sino hwasikoonyeresa, mani syadyeeri. Yobbu, wulira mani omanye oti niiwe onyoolamo omusaara.”