Yobbu 42 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Mani Yobbu naakobola mu Omwaami.

Yobbu

² “Manyire endi onyala ebiindu byoosi, haandi esiindu syooba noheengereo ohuhola abulao onyala ohusikayira ohwoolerera.

³ ‘Wiina wuno owahakayira endekeha chao mani yaalomaloma byaataamanyire?’ Sakira nomanoome ebiindu bitaamanyire, ebiindu biwukisa biimbitiriireho, bi tahanyala ohumanya.

⁴ ‘Wulira, mani njia ohulomaloma; Njia ohuhuteeba, mani wungobolemo.’

⁵ Ndawuliraanga buwulira ebihudiiraho, nae bulaanu ndeboneereho omweene neende emoni chaange;

⁶ sakira omweene ndeelekere, mani ndeefunaka ni ndi mu lufu neende muukohe.”

Obumaliirisi

⁷ Omwaami niyamala ohulomaloma neende Yobbu emboosi chino, yaboolera Elifaasi Omutemaani ati: “Ndi omunyoolefu muno naawe neende abaasyo babiri abo; olwohuba haba simuunomanoomeho ebyadyeeri, koti lu muhalaabani waange Yobbu alomaloome.

⁸ Mani sakira, mubukule esurusi chitaanu-na-chibiri neende emiiku chitaanu-na-chibiri, mani muchie eyiri omuhalaabani waange Yobbu, mani abeene muchiyaaneyo koti esiyaanwa sisaambwa, mani omuhalaabani waange Yobbu achia ohubalaamira, olwohuba njia ohuwulira ohulaama hwae mani haye ohubasaandya ohweema hu biholwa byeeng'we; olwohuba haba simuunomanoomeho ebyadyeeri koti lu muhalaabani waange Yobbu alomaloome.”

⁹ Mani Elifaasi Omutemaani neende Bbiridaadi Omusuuhi alala neende Sofaari Omunamaati, bachia baahola koti lu Omwaami yali n'ababoolere; mani Omwaami yaafukiirira ohulaama hwa Yobbu.

¹⁰ Mani Yobbu niyamala ohulaamira abeecha bae, Omwaami yamukobosera emyaandu kyae; mani Omwaami yaaberesa Yobbu emyaandu kihira kiyalichiingi nakyo hale amahabi kabiri.

¹¹ Mani bamwanaang'ina Yobbu boosi neende bamboochoong'ene, neende abo boosi abali nibamumanya hale beecha yaali baalya nae esidyaalo mu nyuumba yae. Mani nibamusaasira haandi nibamulemya omwooyo mu bidinyu byoosi bi Omwaami yali namukwiisireho. Mani buli mulala naamuberesaho eseende neende engila y'esaabbu.

¹² Mani Omwaami naaberesa Yobbu ehabi nyiingi muno mu ndaalo chae chimaliirihayo ohuhira echataangira; mani Yobbu yaamaliiriha naali neende amakoondi elifu ehumi neende chine, engamia elifu chisaasaba, eng'oombe endaawu chirima elifu ndala, neende esuhiri hasi elifu ndala.

¹³ Haandi yali neende abaana basyaani bataanu-na-babiri neende abaana bahaana badatu.

¹⁴ Omwaana muhaana otaangira yamukuliha ati, Yemima; owohubiri yamukuliha ati, Kesia, nae owohudatu ati, Kereni Hapuuchi.

¹⁵ Nae mu syaalo syoosi, abulao omuhasi waali neende abaana bahaana baboneha bulai koti aba Yobbu; mani laata yaabwe yababeresa omukabo kw'obusiha bwaabwe nasilala neende bamboochoong'ene yaabwe.

¹⁶ Ebyo nibiweere, Yobbu yayiindira ohumala emyaaka emia ndala neende amahumi kane (140), mani yaabona abaana bae, neende abeechuhulu bae ohwoola hu lwiibulo lwohune.

¹⁷ Yobbu yafwa naali omusaacha mukofu, haandi ow'emyaaka miingi muno.