Yobbu 39 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ “Omanyire ebiha bi mbusi chomu ngulu chibuliramo? Waali nobweeneho emboongo niyiibula?

² Onyala ohubala emyoosi kichimala nichiri asito, oba wamanya ebiha bi chiibuliramo,

³ ebiha bichiinamiramo mani cheebula otwaana twachio, mani chaawona obuchuuni bw'ohulumwa?

⁴ Otwaana twacho tuguma mani twaanyoola amaani, nituli mu siino; mani bwaahula twaakama ohukobola eyiri ng'ina yaabwo.

⁵ “Wiina owaleha esuhiri ndeende ohukeendaanga ataali omuundu ochaaya? Wiina owachiboolola mani chang'alaalaanga,

⁶ chi ndaberesa esiparara ohuba edaala lyacho, neende esyaalo sy'omuunyu ohuba obwiihalo bwaacho?

⁷ Haba sichidaha esiyoka syomu siko; haandi abulao onyala ohuchikeda mani yaachihosa emirimo.

⁸ Chikeendaana muungulu nichaaya, mani chikoonya obunyasi bw'ohulya.

⁹ “Endaawu njalaba yinyala yaahuhalaabanira? Yinyala yeyalisa esiro syoosi yi byaayo byao biriraanga?

¹⁰ Onyala ohuyiboya neende emikoye, oba yinyala yaahulimira mu mukuunda kwao?

¹¹ Onyala ohuyeesika olwohuba yiri neende amaani maangi, haandi onyala wayilehera emirimo kyao?

¹² Onyala ohuyeesika oti yinaakobole, mani yaaleeta emwo yao mu sihubbakiro?

¹³ “Embaya ch'ewudo chibaambuha bulai muno; nae abulao ewudo lyahabburuha ohuhira awudu.

¹⁴ Olwohuba ewudo lireha amaki kaalyo mu loba, mani obubafu bw'eloba bwaakabasa,

¹⁵ mani ewudo lyeebirira liti ohukulu hunyala ohukaata, haandi oba lyeebirira liti ebisolo biteende binyala ohukaseenakira.

¹⁶ Ewudo lisaandya muno otumwiinyi twalyo, twaaba koti otutaali otwalyo; mani lyeekesa liti haba sirideebayo ohuhalaabanira bihaya;

¹⁷ olwohuba Nasaae yaliloonga atyo lihaye ohuba neende amakesi, haandi haba siyaliba amakesi k'ohumanya.

¹⁸ Nae nilichaaka ohwiiruha, lidoong'a sa nilicheha efaraasi neende omwiirusi wayo.

¹⁹ “Niiwe oberesaanga efaraasi amaani? Niiwe ofwaasaanga ekosi lyayo amaani?

²⁰ Niiwe okeraanga niyiduuma koti esike? Ohufuuta hwaayo hw'amaani hutiisa abaandu.

²¹ Yedeeya niyiseenakira eloba, mani yeekesa yiti yiri neende amaani; yiiruhaanga neende amaani kayo koosi yikutaanira ebilwaaniso by'omusuku wayo mu biita.

²² Efaraasi haba siyimanyire obuti, haandi haba siyesiinduhaanga; haba siyiiruhaanga olugaanga.

²³ Ebilwaaniso bi beerusi bachio bakiinga bigwaaranaho mani byaamesamesera mu mubasu.

²⁴ Yibbachuha embiro neende obwaalaba buungi niyichia mu moni; niyiwulira ekono ly'eturumbete, haba siyesimiirisa.

²⁵ Buli luboobba eturumbete, yiboola yiti, ‘Otyoo!’ Yinyala ohuwunyiirisa eye nilisisiiri eyale, haandi yaawulira esiyoka sy'abahoongo b'eye nibasisiiri eyale.

²⁶ “Niiwe oweekesaanga eeswi ohubburuha, neende ohubaambula embaya chalyo nichewuunjire emwaalo?

²⁷ Niiwe olagiraanga eeswi ohuniina aakulu mani lyoombaha esiyu syalyo aakulu?

²⁸ Lyoombahaanga esiyu syalyo hu lwaanda mani limenya hu makina maleeyi.

²⁹ Eyo niyo yilibonera esiindu si lineete lyaalya; emoni chaalyo chaasibonera eyale.

³⁰ Otumwiinyi twalyo tunuuna amabaanga; haandi elyeene lyaaba eyiri esiindu sifwiire.”